مەملەكەت باسشىسى وبلىس اكىمدەرىن قاتتى سىنعا الدى
«بىلتىردان بەرى قازاقستان دۇنيەجۇزىلىك ساۋدا ۇيىمىنىڭ مۇشەسى اتاندى. ونى ۇمىتا باستاعانعا ۇقسايمىز. ال بۇل دەگەنىمىز دۇنيەجۇزىلىك ساۋدا ۇيىمىنا مۇشە 160 ەلدىڭ ۇلكەن نارىعىنا ەسىك اشىلدى دەگەن ءسوز. اسىرەسە، كورشىلەس ەلدەردىڭ نارىعى. وسى نارىقتاردىڭ بارلىعى ءبىز ءۇشىن ەندى اشىق. تاۋار تاسۋ ءۇشىن ەڭ جاقسى جاعداي جاسادىق. ەندى ءبىز وسى نارىقتاردى قالاي «جاۋلاپ الامىز» دەگەن ماسەلەگە نازار اۋدارىمىز كەرەك»، - دەگەن مەملەكەت باسشىسى ۇكىمەتكە قازاقستاندىق تاۋاردى شەتەل نارىعىنا شىعارۋ جولدارىن ىزدەۋ ءۇشىن كەشەندى شارالار جوسپارىن ازىرلەۋدى تاپسىردى.
«سوندىقتان، ۇكىمەت قازاقستاندىق تاۋارلاردىڭ شەتەلدىك نارىققا شىعۋىن قامتۋعا قاجەتتى شارالار كەشەنىن ازىرلەۋى كەرەك. بۇل - ۇكىمەتتىڭ عانا ەمەس، وبلىس، قالا، اۋدان اكىمدەرىنىڭ دە مىندەتى. ءاربىر اكىم ءوز ءوڭىرىنىڭ تاۋارىن ساتا ءبىلۋ كەرەك. ال سىزدەر (اكىمدەر) وزىڭىزگە كورشى جاتقان وبلىستارمەن قالاي جۇمىس ىستەۋدى دە ءالى ۇيرەنە الماي جۇرسىزدەر...» - دەدى ن. نازاربايەۆ.
اۆتور: كەنجەكەي توقتامۇرات قىزى
