15:54, 30 - ماۋسىم 2016 | GMT +5
ن. نازاربايەۆ يسپانيا حانزاداسىنىڭ تويىنا شاقىرىلعان جالعىز پرەزيدەنت بولىپتى
استانا. قازاقپارات - بۇگىن استانانىڭ يندۋستريالاندىرۋ ايماعىن ارالاعان كەزدە، «تۇلپار- تالگو» زاۋىتىنا بارعان ق ر پرەزيدەنتى نۇرسۇلتان نازاربايەۆ زاۋىتتىڭ سەرىكتەسى يسپانيا ەلىنىڭ وكىلدەرىنە العىس ءبىلدىردى.
«يسپاندىق ارىپتەستەرىمىزگە راقمەت! يسپانيانىڭ بۇرىنعى كورولىنە دە، جاس جاڭا كورولىنە دە سالەم ايتىڭدار. ايتپاقشى، مەن ونىڭ (يسپانيانىڭ قازىرگى كورولى VI فيليپتىڭ - اگەنتتىك) ۇيلەنۋ تويىنا بارعامىن جانە تويىنا شاقىرىلعان جالعىز پرەزيدەنت بولدىم. ونى دا قازاقستانعا شاقىرامىن»، - دەدى پرەزيدەنت.
ايتا كەتەيىك، يسپانيانىڭ بۇرىنعى كورولى حۋان كارلوس تاعىنان باس تارتقان سوڭ، 2014 -جىلى ونىڭ ۇلى VI فيليپپ يسپانيا كورولىنىڭ تاعىنا وتىرىپ، ەۋروپانىڭ ەڭ جاس مونارحى اتانعان ەدى. 2004 -جىلى حانزادا تاعىندا وتىرعان فيليپپ ۇلان- اسىر توي جاساپ، لەتيتسيا ورتيز ەسىمدى قىزعا ۇيلەنگەن ەدى.
اۆتور: كەنجەكەي توقتامۇرات قىزى
