ا. ەسىموۆ: جول جوندەپ، ءۇي سالۋعا بولىنگەن اقشانى ەكسپو «الىپ الدى» دەۋ - اقىلعا سىيمايدى
«مىنانداي ءۇردىستى بايقاپ ءجۇرمىن، كەيبىر شەنەۋنىكتەر ءوز سالاسىنداعى پروبلەمانى حالىق نازارىنا تۇسىرمەۋ ءۇشىن «ەكسپو» كورمەسىنە نازار اۋدارتادى. لاۋازىمدى تۇلعا ءوز ماسەلەسىن ەكسپو كورمەسىمەن «جاسىرىپ» وتىرسا، نە ايتۋعا بولادى. بۇعان جول بەرمەۋ كەرەك»، - دەدى تۋريزم جونىندەگى كەڭەس بارىسىندا ا. ەسىموۆ.
بۇل سوزىنە ۇلتتىق كومپانيا ءتوراعاسى ناقتى مىسالدار كەلتىردى. «بۇقارالىق اقپارات قۇرالدارىندا استانا قالاسى اۆتوكولىك جولدارى باسقارماسىنىڭ جەتەكشىسى «استانانىڭ كەيبىر كوشەلەرى ەكسپو- عا بايلانىستى جوندەلىپ، سالىنبايدى» دەدى.
ال، قوسشى قالاسىنىڭ اكىمى سۇحبات بەرە وتىرىپ، «جول سالۋعا بولىنگەن قارجىنىڭ ءبارى «ەكسپو» - عا كەتىپ جاتىر» دەدى. وڭتۇستىك قازاقستان وبلىسى ءتىپتى ەكسپونىڭ «سالدارىنان» كوپقاباتتى . ۇيلەردىڭ اراسىنداعى جەكە سەكتوردى «سالا الماي جاتىر» ەكەن. استانانىڭ جول پوليتسيا قىزمەتكەرلەرى «وسى اقشا ەكسپوعا كەتەدى دەپ، حالىقتان اقشا بوپسالاعان. ءتىپتى، بالالاردىڭ جاردەماقىلارى ەندى ەكسپونىڭ كەسىرىنەن تولەنبەي قالاتىن كۇيگە جەتىپپىز. بۇنىڭ بارلىعى اقىلعا سىيمايتىن دۇنيەلەر. ەكسپو كورمەسىن وتكىزۋ ءۇشىن حالىقتان تىكەلەي دە، جەرگىلىكتى بيلىك ورگاندارى ارقىلى دا، اسىرەسە، پوليتسيا ارقىلى ەشقاشان اقشا جينالماعان. پرەزيدەنت اتاپ وتكەندەي، ەكسپو داعدارىس كەزىندە داعدارىسقا قارسى جوباعا اينالدى»، - دەدى ا. ەسىموۆ.
ا. ەسىموۆ ءمالىم ەتكەندەي، سوڭعى ايلاردا جوبانىڭ قۇنى 130 ميلليارد تەڭگەگە قىسقارعان.
اۆتور: كەنجەكەي توقتامۇرات قىزى
