وقۋشىلار مەكتەپ پارتاسىنان دەنساۋلىعىنان ايىرىلۋدا - ت. دۇيسەنوۆا
بۇل تۋرالى بۇگىن حالىقپەن ەسەپتى كەزدەسۋىن وتكىزگەن ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ايتتى.
«الدىن الۋ شارالارى اۋرۋعا شالدىعۋ تاۋەكەلدەرى بار تۇلعالاردا عانا جالعاستىرىلماۋى كەرەك. ادامداردى دەنساۋلىق ساقتاۋ ىسىنە تارتا وتىرىپ، ولاردىڭ وزدەرىنىڭ دە قاتىسۋىن قامتاماسىز ەتۋ ارقىلى قامقورلىق جاساعان ءجون. مەنىڭشە، بۇل ەڭ ءبىرىنشى كەزەكتە بالالارعا قاتىستى»، - دەدى ول.
ونىڭ العا تارتقان دەرەكتەرىنە قاراعاندا، مەكتەپ وقۋشىلارىن الدىن الا تەكسەرۋ بارىسىندا اسقازان- ىشەك، كوز، تىنىس ورگاندارى اۋرۋلارى كوپتەپ تابىلعان.
«وزدەرىڭىز كورىپ وتىرعانداي، مەكتەپ پارتاسىنان دەنساۋلىقتان ايىرىلۋدامىز. وسىعان وراي ءبىز بالالاردى ساۋىقتىرۋ ءىس- شارالارى مەكتەپتەن باستالۋى قاجەت دەپ ۇيعاردىق. بۇگىندە ءبىز ءوزىمىزدىڭ قوعامدىق ۇيىمدارىمىزبەن بىرلەسىپ، «بالا- امان» جاڭا باعدارلاماسىن ازىرلەدىك»، - دەدى مينيستر.
ونىڭ مالىمەتتەرىنشە، اعىمداعى جىلدىڭ قاڭتارىنان 2,6 ميلليوننان استام بالا مەديتسينالىق تەكسەرۋدەن ءوتىپ، ونىڭ ىشىندە 306 مىڭ وقۋشى العاش رەت ديسپانسەرلىك ەسەپكە الىنعان.
«ونىڭ ىشىندە 25 مىڭ بالا دەمالىس كەزىندە شيپاجايلارعا، 144 مىڭى ستاتسيونارلىق ەم الۋعا جىبەرىلدى جانە شامامەن 100 مىڭ بالا قازىرگى ۋاقىتتا امبۋلاتوريالىق ەم الۋدا. ياعني، ءبىز تاۋەكەل توپتارىن، كىم، قايدا ەمدەۋ قاجەتتىگىن انىقتادىق. بۇل ساۋىقتىرۋ شارالارىنىڭ ناتيجەسى قىركۇيەك ايىندا باعالاتىن بولادى»، - دەدى ت. دۇيسەنوۆا.
اۆتور: مارلان جيەمباي
