قىزىلوردادا بەلكول تۇرعىندارىنىڭ كوپشىلىگى جاز بويى كيىز ۇيدە تۇرادى - فوتو
قىزىلوردا قالاسىنا جاقىن ورنالاسقان بەلكول كەنتىنىڭ تۇرعىندارى جاپپاي كيىز ءۇي تىگىپ، جاز ايلارىن سوندا وتكىزبەكشى.
بۇل تۋرالى stan.kz حابارلايدى.
ياكۋدا نيازباي ۇلىنىڭ وتباسى دا جىلداعى داستۇرلەرىن بۇزباي بيىل دا اۋلاعا كيىز ءۇي تىكتى. ۇلتتىق باسپانانىڭ سىرتى مەن ءىشىن دە تالاپقا ساي ارلەپ، بەزەندىرگەن.
«اتالارىمىزدىڭ بارلىعى ۇستا بولعان ادامدار. كيىز ءۇيدىڭ كەرەگەسى، ۋىعى مەن شاڭىراعى سول كىسىلەردەن قالعان مۇرا. نەگىزىنەن ءبىزدىڭ جانۇيامىزدا 4 قاراشا ءۇي بار. ونىڭ ۇشەۋى 8 قاناتتى بولسا، بىرەۋى 6 قاناتتى. بارلىعىنىڭ سۇيەگىن اتالارىمىز جاساپ بەرگەن. ءبىز تەك قوسىمشا دۇنيەلەرىن ساتىپ الدىق»، - دەيدى ول.
ەندى ياكۋدا نيازباي ۇلىنىڭ وتباسى تۇگەلدەي وسى كيىز ۇيگە كوشىپ، تاس بالقىتارلىق وڭتۇستىكتىڭ ىستىعىنان قورعانباق. ولار كيىز ءۇيدىڭ ىشىندە سالقىن سامال ەسىپ تۇرۋ ءۇشىن دە ەرەكشە ءتاسىل تاپقان.
«ادەتتە كيىز ءۇيدىڭ سىرتىنا كيىز جابادى. ودان سالقىن وتپەيدى. جاڭبىر جاۋسا كيىزدىڭ ءيىسى شىعىپ، بەرەكەڭدى الادى. بۇل دۇرىس ەمەس. اۋا ءوتۋى ءۇشىن ءبىز تۇسكيىز رەتىندە كادىمگى بوز ماتانى جابامىز. وعان قازاقتىڭ ۇلتتىق ويۋ- ورنەكتەرىن سالىپ، ادەمىلەيمىز»، - دەيدى ياكۋدا نيازباي ۇلى.
ىشتە كەرەكتىنىڭ بارلىعى بار. اياققاپ، كەسەقاپ پەن قابىرعادا قورجىن ءىلىنىپ تۇر، ءتىپتى ءسان ءۇشىن ىلىنگەن قاسقىر تەرىسىن دە كورۋگە بولادى. قازاقى مانەردە جاسالعان بۇيىمدار بولمە اجارىن اشىپ تۇر.
«بۇل دۇنيەلەردىڭ بارلىعىن مەنىڭ ەنەم ءوزى جاساعان. كەزىندە ەسىمى بەلگىلى قولونەر شەبەرى بولعان كىسى. ءتۇرلى زاتتاردى ءوزى تىگىپ، توقي بەرەتىن. مەن سول كىسىنىڭ تاربيەسىن كورىپ ءوستىم. ءقازىر تۇسكيىزگە ويۋدى ءوزىم تىگەمىن. مۇنان بولەك كيىز ءۇيدىڭ ىشىنە توسەيتىن كورپەشەلەر دە مەنىڭ قولىمنان شىققان تۋىندىلار»، - دەيدى وتاناسى گۇلبانۋ تۇرىمبەت.
كيىز ءۇيدىڭ ىستىقتان قورعاۋى مۇندا قونىستانۋعا باستى سەبەپ بولسا، ەكىنشىسى جاز ايىندا كيىز ءۇي ىشىندە ماسا دا بولمايدى ەكەن. وتباسى مۇندا تەك وزدەرى عانا قونىستانباي، ونى وزگەلەرگە جالعا بەرىپ، پايدا دا تابۋعا كىرىسكەن.
«قازىر كيىز ۇيلەرگە سۇرانىس جاقسى. اسىرەسە، ناۋرىز مەرەكەسىندە تاپسىرىس بەرۋشىلەر كوبەيىپ كەتەدى. مەن 4 كيىز ءۇيىمدى جالعا بەرەمىن. تويلارىن دا كيىز ءۇيدىڭ ىشىندە اتاپ وتۋگە نيەت بىلدىرەتىندەر از ەمەس. ارينە ۇلىستىڭ ۇلى كۇنىندە باعاسى ءسال قىمباتتاۋ بولادى. ال، بىلايعى كەزدەرى 50-60 مىڭ تەڭگەگە بەرەمىز»، - دەيدى ول.
بەلكول اۋلى قالاعا جاقىن جەردە ورنالاسقان. وندا 800 گە جۋىق وتباسى تۇرادى. اۋىل حالقىنىڭ كوپشىلىگى مال شارۋاشىلىعىمەن اينالىسادى. ءبىرازى قالاعا قاتىناپ جۇمىس ىستەيدى. كەنت اكىمىنىڭ سوزىنشە بۇل جەردە 30-عا جۋىق وتباسى جىل سايىن جازدا كيىز ءۇي قۇرىپ سوندا تۇرادى ەكەن. ارينە مۇنىڭ ءوزى ايتارلىقتاي قاراجاتتى قاجەت ەتكەندىكتەن وسىنداي ۇيگە قول جەتكىزە الماي جۇرگەندەر دە جەتەرلىك.
دەرەككوز: Stan.kz
