ق. توقايەۆ: ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىمىز - شىن مانىندە تاريحي وقيعا

استانا. قازاقپارات - بۇگىن پارلامەنت سەناتىنىڭ ءتوراعاسى قاسىم-جومارت توقايەۆ ق ر پرەزيدەنتى مەن بارشا قازاقستاندىقتاردى قازاقستاننىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋىمەن قۇتتىقتادى.

پالاتانىڭ جالپى وتىرىسىن اشقان سپيكەر ەڭ الدىمەن كەشە قازاقستان العاش رەت ب ۇ ۇ قاۋىپسىزدىك كەڭەسىنىڭ 2017-2018-جىلدارعا تۇراقتى ەمەس مۇشەسى بولىپ سايلانعانىن، باس اسسامبلەيادا وتكەن داۋىس بەرۋ كەزىندە قازاقستان 138 مەملەكەتتىڭ قولداۋىنا يە بولعانىن اتاپ ءوتتى.

«بۇل - شىن مانىندە تاريحي وقيعا»، - دەگەن سەنات ءتوراعاسى ەڭ الدىمەن بارلىق پالاتا دەپۋتاتتارى اتىنان ەلباسى ن. نازاربايەۆتى جانە بارشا قازاقستاندىقتاردى تاريحي وقيعامەن قۇتتىقتادى.

«بۇل - ەلباسى باستاعان وتاندىق ديپلوماتيانىڭ تاريحي جەڭىسى، بۇكىل الەم تانىعان سىرتقى ساياساتى سىندارلى ەل ەكەنىمىزدىڭ ايقىن كورىنىسى بولىپ تابىلادى. وسى وقيعا ورىن الۋى ءۇشىن ءبىر توپ قازاقستاندىق ديپلوماتتار، قوعام قايراتكەرلەرى وزدەرىنىڭ قوماقتى ۇلەسىن قوستى. سولاردىڭ ىشىندە ارىپتەسىمىز ءبىرعانىم ايتىموۆا دا بار. سەناتورلار اتىنان سىزگە العىس بىلدىرگىم كەلەدى»، - دەدى ق. توقايەۆ.

«دۇربەلەڭگە تولى اسا كۇردەلى عالامدىق احۋال جاعدايىندا قازاقستاننىڭ وسىنداي بەدەلدى ءارى جاۋاپتى ميسسيانى ابىرويمەن اتقاراتىنىنا كامىل سەنەمىز»، - دەدى سەنات سپيكەرى.

اۆتور: قانات مامەتقازى ۇلى