ايەل پوليتسەيلەردىڭ سانىن كوبەيتۋ كەرەك - باس پروكۋراتۋرا
«حالىقارالىق تاجىريبەگە سايكەس، دامىعان باتىس ەلدەرىندە «كەيس- مەنەدجەر» دەگەن قىزمەتكەر بار. ول جەكە كومەكشى رەتىندە ءتيىستى ورگاندارمەن بايلانىسىپ، جابىرلەنۋشىنىڭ الەۋمەتتىك پروبلەمالارىن شەشەدى. وسىنداي مىندەتتى ءبىز دە جەرگىلىكتى ءبىر ورگانعا جۇكتەسەك، اسىرەسە اۋىلدىق جەردە. ەكىنشىدەن، كوپتەگەن ەلدەردە ايەلدەردەن تۇراتىن ارنايى پوليتسيا ۋچاسكەلەرى قۇرىلعان. ولاردىڭ مىندەتى - زومبىلىققا ۇشىراعاندارعا كومەكتەسۋ، مەديتسينالىق قىزمەت كورسەتۋ، قۇقىقتىق كەڭەس بەرۋ، سوتقا ارىز جازۋ، جابىرلەنۋشىگە قۇقىقتارىن ءتۇسىندىرۋ. ايەلدەر ايەل ادامعا كوبىرەك سەنەدى. سوندىقتان پوليتسيا ۋچاسكەلەرىندە ايەلدەردىڭ سانىن كوبەيتسەك»، - دەدى باس پروكۋرور.
بۇدان بولەك، جاقىپ اسانوۆ زورلىق- زومبىلىقپەن كۇرەستى كۇشەيتۋ ءۇشىن قوعامنىڭ كوزقاراسىن وزگەرتۋ قاجەتتىگىنە ەرەكشە نازار بۇردى. ونىڭ ايتۋىنشا، بۇل ءۇشىن ادامنىڭ ىشكى دۇنيەسىن وزگەرتۋ قاجەت.
«ءبىزدىڭ قوعام زومبىلىققا تىم كەشىرىمدى. بىرەۋ تۇندە مۋزىكانى شۋلاتىپ قويسا، كورشىلەر جەتىپ كەلەدى. تىنىشتىق ساقتاۋدى، مۋزىكانى ءوشىرۋدى تالاپ ەتەدى. ال، كۇيەۋى ايەلىن ساباپ جاتسا، ەشكىم تىرپ ەتپەيدى. ايقايلاپ، كومەك سۇراسا دا پوليتسيا شاقىرمايدى. سانامىزدا قاتىپ قالعان ءبىر ستەرەوتيپ بار - بىرەۋدىڭ وتباسىنا ارالاسپاۋ. ايقاي- شۋ، توبەلەس بولسا، ول ءۇيدىڭ ىشكى شارۋاسى دەگەن قاتە تۇسىنىك قالىپتاسقان. ايەلىن ۇرعاندى كەيبىرەۋلەر ءتىپتى دۇرىس دەپ سانايدى. بۇل ءبىزدىڭ داستۇرىمىزگە، ۇلتتىق مادەنيەتىمىزگە جات نارسە. حالقىمىز بۇرىننان قىز بالانى قادىرلەگەن. «قىز وسسە - ەلدىڭ كوركى» دەپ ساناعان. سوندىقتان قىز- كەلىنشەكتەردىڭ، ايەل- انانىڭ قوعامداعى ءرولىن بيىككە كوتەرىپ، وتباسىلىق قۇندىلىقتاردى حالىقتىڭ ساناسىنا ءسىڭىرۋىمىز قاجەت»، - دەدى باس پروكۋرور.
اۆتور: قانات مامەتقازى ۇلى
