مۇحتار شاحانوۆ: ءبىزدىڭ بۇكىل ءومىرىمىز كۇرەسپەن ءوتىپ كەلە جاتىر

استانا. قازاقپارات - بۇگىن الماتىداعى «استانا» قوناق ۇيىندە «قازاقتىڭ ءتىلى مەن تاريحى - ۇلتتىڭ التىن قازىعى» دەگەن تاقىرىپتا قوعامدىق تالقىلاۋ ءوتتى.

قوعامدىق كەڭەستە العاش بولىپ ءسوز العان ءتىل جاناشىرى، اقىن مۇحتار شاحانوۆ وزەكتى ماسەلە تۋراسىندا بىلاي دەدى:

- مەن «ءوز انا تىلىندە سويلەمەۋ مەن ويلاماۋدىڭ زالالى» دەگەن تراكتات جازعام. ول جۇمىستى يۋنەسكو قارادى. سوندا وسى تىلگە بايلانىستى نەگىزگى ماسەلەلەردى العا قويدىم. ول كەزىندە ب ۇ ۇ- نا دا جولداندى. ءتىل ماسەلەسىن سابەت وداعىنىڭ كەزىندە كوتەردىم. سول كەزدە 93 ءتىل جويىلعان بولاتىن. سول تىلدەردىڭ باسىم بولىگى تۇركى تىلدەس ەلدەردىڭ ءتىلى ەدى. كەڭەس ۇكىمەتىنىڭ ساياساتى كۇنى بۇگىنگە دەيىن جالعاسىپ كەلە جاتىر.

شىن مانىندە قازاقتىڭ رۋحىنا تەرەڭ بايلانعان، ۇلتتىق مۇددەگە تامىر جىبەرگەن ادام بولسا، ونى بيلىك باسىنا جىبەرمەيدى. كوسموپوليتتەر عانا بارۋى كەرەك. ءۇش تۇعىرلى ءتىل دەگەن پايدا بولدى. وعان ءبىز ءاۋ باستا قارسى شىقتىق. ارنايى جيىن وتكىزدىك. ءبىراق بيلىك مۇنى تىڭداعان جوق. ءبىزدىڭ بۇكىل ءومىرىمىز كۇرەسپەن ءوتىپ كەلە جاتىر. ءبارىمىزدىڭ بىرلەسىپ جاساعان ۇلكەن ەڭبەگىمىز - «قازاقستاندىق ۇلتتى» توقتاتتىق. ءۇنسىز جاتا بەرگەننەن گورى، بىرلەسە قيمىلداعانىمىز ابزال. قازىر جەردى جالعا بەرۋ دەگەن شىقتى. جەردى ساتساق ءبارى ءبىتتى دەگەن ءسوز. قازىردىڭ وزىندە ساتىلماعان نە قالدى؟

ايتا كەتسەك، جيىندا قوعام بەلسەندىلەرى ۇشتىلدىلىك رەفورماسىنىڭ ۇلتتى جويۋعا باعىتتالعانىن اشىق ايتىپ، ءوز قارسىلىقتارىن ءبىلدىردى. سونداي-اق، ءبىلىم مينيسترلىگىنىڭ وكىلەرىنە قوعام بەلسەندىسى رۋزا بەيسەنبەكتەگىنىڭ 4 جارىم مىڭنان استام ادامنىڭ قولى جينالعان اشىق حاتىن تاپسىردى.

ۇلت پورتالى