مىنەزىڭىز جايلى قاسىڭىز نە دەيدى؟

استانا. قازاقپارات - ادامنىڭ سىرتقى ەرەكشەلىكتەرىنە قاراي مىنەز-قۇلقىن انىقتاپ، تاعىدىرىن بولجاۋ باعزى زامانداردان بەرى جالعاسىن تاۋىپ كەلەدى.

ال كۇنى بۇگىن ول فيزيگونوميكا عىلىمى رەتىندە قاراستىرىلۋدا. ادامنىڭ قاستارى كوڭىل-كۇيىن بىردەن اڭعارتاتىندىقتان، ولار مىنەز-قۇلقى جايلى دا كوپتەگەن اقپارات بەرە الادى. ءدال وسى سەبەپتى اتالعان عىلىم سالاسىندا الار ورنى ەرەكشە.

قاسىڭىز ارقىلى مىنەزىڭىزدى انىقتاۋعا مۇمكىندىك بەرەتىن تەستىنىڭ كومەگىمەن بولمىسىڭىزداعى وزگە تۇگىل، ءوزىڭىز بىلمەگەن قاسيەتتەرىڭىز جايلى بىلە الاسىز.

قاس

قاس - بەت-الپەتتەگى ءبىر ەلەمەنت قانا ەمەس، سونىمەن قاتار ادامدار اراسىنداعى قارىم-قاتىناس قۇرالى. ادام ەش ءسوز ايتپاستان-اق تەك قاس قيمىلى ارقىلى ىشىندەگىسىن وزگەگە جەتكىزە الادى. ءتىپتى، قاس ءپىشىنىن تۇزەۋ ارقىلى تاعدىردى دا وزگەرتۋگە بولاتىنى جايلى ايتىلىپ ءجۇر.

سۋرەتكە مۇقيات قاراپ، ءوزىڭىزدىڭ قاسىڭىزعا سايكەس كەلەتىن قاس ءتۇرىن تاڭداڭىز. وعان بەرىلگەن سيپاتتاما ارقىلى ءوز مىنەزىڭىزدەگى ەرەكشەلىك پەن جاسىرىن قاسيەتتەرگە قانىق بولىڭىز.

دوعا ءپىشىندى قاس

كوپشىلىك ءدال وسى قاس ءپىشىنىن ءمىنسىز سانايدى. دوعا ءپىشىندى قاس يەلەرى - اقىلمەن ەمەس، سەزىممەن ءومىر سۇرەتىن جاندار. جەڭىلتەكتىگى دە جوق ەمەس. ولار الدىنا قويعان ماقساتتارىن ءجيى وزگەرتەدى. ءتىپتى، ماقساتتارى ءبىر-بىرىنە قاراما-قايشى كەلىپ جاتاتىنى دا بار. بۇگىن عانا ساحناعا شىعىپ، جۇلدىز بولۋدى ارمانداسا، كۇنى ەرتەڭ گەولوگيالىق ەكسپەديتسياعا جول تارتۋدى كوكسەۋى عاجاپ ەمەس. دەسە دە اقىلعا سالىپ، دۇرىس-بۇرىسىن اجىراتا وتىرىپ ماقسات قويسا، دىتتەگەنىنە مىندەتتى تۇردە جەتەدى.

ادەتتە مۇنداي ادامداردان جاقسى ءارتىس شىعادى. ولار ومىردە ءار نارسەنىڭ جاقسى جاعىن كورە بىلەدى، وعان قوسا ازىلدەسە بىلەدى. وسى سەبەپتى اينالاسىنداعىلاردىڭ كوڭىلىن تاۋىپ، جاقسى - قارىم-قاتىناس ساقتايدى.

قيعاش قاس

قيعاش قاس يەلەرى -  كيۋى كەلمەس ماسەلەنىڭ شەشىمىن جىلدام تاۋىپ، باعىتىن دۇرىس انىقتاي بىلەتىن تالاپتى ءارى تاپقىر جاندار. ولاردى الداپ سوعۋ مۇمكىن ەمەس. سەبەبى تابيعاتىنان سۇڭعىلا، اقىلدى كەلەتىندىكتەن، ءبىر كورگەننەن-اق ادامنىڭ ىشىندەگىسىن ءبىلىپ، قۋلىعىن الدىن-الا سەزە الادى. ولار كەز كەلگەن قيىندىقپەن كۇرەسىپ، ەڭ قيىن جاعدايدىڭ وزىندە جەڭىپ شىعادى. قىزمەتتىڭ بارلىق سالاسىن وڭاي مەڭگەرەتىن مۇنداي جاندار قارجى سالاسىندا مول تابىسقا، جەتىستىككە كەنەلەدى. الايدا ولاردىڭ بويىنداعى سۇڭعىلالىق كەي جاعدايلاردا سەنىمسىزدىككە ۇلاسىپ جاتادى. ال ول ءوز كەزەگىندە ادامدارمەن قارىم-قاتىناسىندا قيىندىق تۋعىزادى.

سىنىق قاس

اۆانتيۋراعا، تاۋەكەلگە بەيىمدىلىك پەن ۇنەمى جاڭا اسەر الۋعا تالپىنۋ سىنىق قاس يەلەرىن وزگە ادامداردان ەرەكشەلەپ تۇرادى. مۇنداي ادامدار -  ماڭايىنداعىلاردى ءىش پىستىرارلىق ءىستىڭ وزىنە ىنتالاندىرىپ، قىزعۋشىلىق تۋعىزا الاتىن كوشباسشىلار. ۇزاققا سوزىلعان تۇراقتى ىستەر ولاردى قاجىتىپ، ەرىك-جىگەرىن بايلاسا، ومىرىندەگى، قىزمەتىندەگى ءجيى وزگەرىستەر بويىنا كۇش-قۋات سىيلايدى.

سىنىق قاس يەلەرىنىڭ جانىندا ەشقاشان زەرىكپەسىڭىز انىق. ولار، ءتىپتى، ماڭىزدى ءىستىڭ وزىنە ءتۇرلى وزگەرتۋلەر ەنگىزىپ، جاڭا سەرپىن بەرىپ، ءارقاشان جاڭالىقتىڭ باستاۋشىسى بولادى.

تىك قاس

تىك قاس - تىك ءارى تۇراقتى مىنەز بەلگىسى. مۇنداي قاس يەلەرى ومىردەن نە قاجەتىن بىلەدى، دىتتەگەن ماقساتىنا نىق قادام باسىپ، جولىنداعى كەز كەلگەن قيىندىقتى ەڭسەرە الادى. وعان قوسا ولار - بەلسەندى، بىلىكتى جانە ىنتالى. قىزمەتتەگى ارىپتەسەرى ولاردى كاسىبىن جەتىك مەڭگەرىپ، ءار ءىسىن اسقان جاۋاپكەرشىلىكپەن اتقاراتىندىقتارى ءۇشىن باعالايدى. ال جاقىندارى مەن دوستارى قانداي جاعدايدا دا قول ۇشىن سوزىپ، قيىن ءىستىڭ ءتۇيىنىن شەشە الاتىن قابىلەتى ءۇشىن ەرەكشە قۇرمەتتەيدى.

ءومىر كورسەتكەندەي، كوبىنە تىك قاس يەلەرى باسشىلىق قىزمەت اتقارادى. ولار ءۇشىن مانسابى ءومىرىنىڭ باستى ءمانى ەمەس. ءاردايىم دەمالىس پەن قارىم-قاتىناسقا ومىرىنەن ورىن تابا بىلەدى.

كوتەرىڭكى قاس

كوتەرىڭكى قاس - تاباندىلىق پەن ماقساتقا تالپىنۋشىلىق بەلگىسى. مۇنداي قاس يەلەرى تۇراقتىلىعىمەن، سەنىمىنە دەگەن ادالدىعىمەن ەرەكشەلەنەدى. كوبىنە ولار ءىستى بىردەن جىلدام قارقىنمەن باستامايدى. اقىرىن ءجۇرىپ، انىق باسقاندى ءجون كورەتىن بۇل جاندار بەلگىلى ءبىر دارەجەگە جەتكەن سوڭ جەتىستىككە تەز جەتىپ، تابىسقا، بايلىققا كەنەلەدى. ولار ءار جاعدايدا دا الدىن بولجاپ، دۇرىس باعدار تاڭداي الاتىندىقتان، كەز- كەلگەن ءىستى ءوز ىڭعايىنا كەلتىرۋدىڭ شەبەرى.

«ۇيشىك» ءتارىزدى قاس

نازىكتىك، سەزىمتالدىق، قايىرىمدىلىق -  «ۇيشىك» ءتارىزدى قاس يەلەرىنىڭ بويىنان تابىلاتىن قاسيەتتەر. كوبىنە مۇنداي ادامدارعا ومىرىندەگى قيىندىقتاردى ءوزى جالعىز ەڭسەرۋ قيىنعا سوعادى. سوندىقتان ولاردىڭ جانىندا قولداۋ بەرىپ، باسشىلىق ەتەتىن جانداردىڭ جۇرگەنى دۇرىس.

ولار قورشاعان ورتادا بولىپ جاتقان دۇنيەلەردى، ادامداردىڭ كوڭىل-كۇيىن ءتۇسىنىپ، اينالاسىنداعىلاردىڭ ارەكەتىنىڭ تۇپكى سەبەبىن اڭعارا الادى. باىسنا ءىس تۇسكەن ادامدارعا «ۇيشىك» ءتارىزدى قاس يەلەرى ناعىز جاناشىر بولىپ، كومەك قولىن سوزادى. قيال الەمى كەڭ، ءار جاعدايعا وزىندىك كوزقاراسى بار بۇل جاندار شىعارماشىلىق سالادا تابىسقا جەتەدى.

Stan.kz