بايان ەسەنتايەۆانىڭ جازباسى لايك جيناۋدان رەكورد ورناتتى
17- ماۋسىمدا بايان ەسەنتايەۆا اۋىر جاراقات العاننان كەيىن العاش رەت جەكە پاراقشاسىندا جازبا قالدىرعان بولاتىن. اتالمىش جازبا التى كۇن ىشىندە 110 مىڭنان استام لايك جيناپ، رەكورد ورناتتى. جەلى قولدانۋشىلارى بۇرىن-سوڭدى قازاقستاندا مۇندايدىڭ بولماعانىن ايتۋدا.
«تۇنەرگەن كۇننەن كەيىن ۇنەمى كۇن شىعادى! مەن ونى ءارقاشان بىلگەم! كۇندى بۇلتپەن، نايزاعايمەن، جاڭبىرمەن جاۋىپ قويۋعا بولادى، الايدا ول شىن مانىسىندە جارقىراسا، شۋاعى مىندەتتى تۇردە سىرتقا شىعادى! دۇعا-تىلەكتەرىڭىزگە، قولداۋلارىڭىزعا، تۇسىنىستىكپەن قاراعاندارىڭىز ءۇشىن، مەيىرىمدىلىكتەرىڭىز ءۇشىن العىس ايتامىن! مەنىڭ بۇكىل ءومىرىم، ۇمىتتەرىم، ارماندارىم، تەك جارقىن جانە جاقسى ساتتەرمەن عانا بايلانىستى بولماق! سىزدەردىڭ دۇعا-تىلەكتەرىڭىزدىڭ ارقاسىندا شىعار، مەن ءالى دە ءومىر سۇرگىم كەلەدى، سۇيگىم كەلەدى!»، - دەپ جازعان ەدى پروديۋسەر.
ەستەرىڭىزگە سالا كەتەيىك، 10- ماۋسىم كۇنى قۇلجا تاسجولىنىڭ بويىندا بايان ەسەنتايەۆانى كۇيەۋى اۋىر سوققىعا جىعىپ، پىشاقتاپ تاستاعان بولاتىن.
بەلگىلى بولعانداي، باقىت ەسەنتايەۆ سول كۇنى ماس بولعان. ول ۋاقىتشا وقشاۋلاعىشقا قاماۋعا الىنىپ، قىلمىستىق كودەكستىڭ 99- بابى بويىنشا ايەلىن ولتىرمەك بولدى دەپ كۇدىكتەلۋدە.
ەسەنتايەۆ ءوز كىناسىن مويىندادى. ول ەندى جەتى جىلعا سوتتالۋى مۇمكىن.
nur.kz
