جوعارعى سوت ءتوراعاسى جۋرناليستەردى كاسىبي مەرەكەلەرىمەن قۇتتىقتادى

كەزدەسۋدە ق. ءمامي: «زاماناۋي دەموكراتيالىق جانە قۇقىقتىق مەملەكەت ءۇشىن قوعامنىڭ بارلىق وكىلدەرىن ساياسي ومىرگە بەلسەندى ارالاستىرۋ ماڭىزدى. ال بۇل ماسس-مەديانىڭ قاتىسۋىنسىز مۇمكىن ەمەس. وسى رەتتە ب ا ق تۇرعىندار مەن بيلىك اراسىنداعى التىن كوپىر تارىزدەس. ءبىر جاعىنان ولار ادامداردى تولعاندىراتىن ماسەلەلەردى ايتسا، ەكىنشى جاعىنان ولاردى شەشۋدىڭ جولدارىن حابارلايدى»، - دەدى.

سوتتاردىڭ ب ا ق- پەن ءوزارا ءىس-قيمىلىنىڭ ماڭىزدىلىعىن ايتا كەلە، ول سوتتار قولدانىستاعى زاڭناما نەگىزىندە ب ا ق- پەن جۇمىس ىستەۋگە دايىن ەكەندىگىن اتاپ ءوتتى. بۇل ءۇشىن بارلىق قاجەتتى جاعداي جاسالعان. سوتتاردىڭ ب ا ق- پەن ءوزارا ءىس-قيمىلىنىڭ جاڭا تۇجىرىمداماسى قابىلداندى، وڭىرلەردە ۇيلەستىرۋشى- سۋديالار مەن باسپا ءسوز قىزمەتتەرى بەلسەندى جۇمىس ىستەۋدە. 2015-جىلدىڭ قورىتىندىسى بويىنشا ب ا ق- تا 53 مىڭنان استام ماتەريال جارىق كوردى.

كەزدەسۋ بارىسىندا جوعارعى سوت ءتوراعاسى «100 ناقتى قادام» ۇلت جوسپارىنىڭ زاڭ ۇستەمدىگىن قامتاماسىز ەتۋ بولىگىن ىسكە اسىرۋ بارىسى تۋرالى ايتىپ ءوتتى. اتاپ ايتقاندا، سوت جۇيەسىنە جۇكتەلگەن 11 قادامنىڭ بارلىعى ورىندالدى. وسى جۇمىستىڭ ناتيجەسىندە وتاندىق سوت جۇيەسى جاڭعىرتىلدى. ماسەلەن، 2016-جىلعى 1- قاڭتاردا سوتتار ءۇش ساتىلى سوت تورەلىگى جۇيەسىنە كوشتى، جوعارعى سوت جانىنان سوت تورەلىگى اكادەمياسى، حالىقارالىق كەڭەس پەن مامانداندىرىلعان سوت القاسى قۇرىلدى. پروكۋرورلاردىڭ ازاماتتىق ىستەر بويىنشا سوتقا قاتىسۋى زاڭنامالىق تۇرعىدا قىسقارتىلدى. تەرگەۋ سۋديالارىنىڭ قۇزىرەتى كەڭەيتىلدى.

سۋديالاردىڭ جاڭا ادەپ كودەكسىنىڭ جوباسى ازىرلەندى. جوبا جوعارعى سوت جانىنداعى حالىقارالىق كەڭەستىڭ وتىرىسىندا ماقۇلداندى. بۇل قۇجات بويىنشا ەۋروپا كەڭەسىنىڭ ۆەنەتسيا كوميسسياسى ساراپشىلارىنىڭ قورىتىندىسى الىندى. كودەكس بيىل جىلدىڭ كۇزىندە وتەتىن سۋديالاردىڭ سەزىندە قابىلدانادى دەپ كۇتىلۋدە.

كەزدەسۋ شەڭبەرىندە جوعارى سوت ورگانىنىڭ ب ا ق- پەن ءوزارا ءىس-قيمىلىن ۇيلەستىرەتىن جوعارى سوت سۋدياسى باعلان ماقۇلبەكوۆ ءسوز سويلەدى. ب ا ق وكىلدەرىن كاسىبي مەرەكەلەرىمەن قۇتتىقتاي وتىرىپ، ول: «سوت جۇيەسىنىڭ اقپاراتتىق اشىقتىعى مەن ايقىندىعى - سۋديالاردىڭ التىنشى سەزىندە مەملەكەت باسشىسى ايقىنداعان جۇمىستىڭ باسىم باعىتتارى. مۇنداعى ماڭىزدى مىندەت - سوتقا قۇجاتتار كەلىپ تۇسكەننەن باستاپ، شەشىم قابىلدانعانعا دەيىنگى كەزەڭدەگى سوت جۇمىسىن قوعامعا دۇرىس ءتۇسىندىرۋ»، - دەدى.

بۇعان قوسا ول جيىنعا قاتىسۋشىلاردى سوتتاردىڭ قىزمەتىن اقپاراتتىق سۇيەمەلدەۋ بويىنشا اعىمداعى جۇمىستىڭ بارىسىمەن تانىستىردى.

بارلىق وبلىستىق جانە وعان تەڭەستىرىلگەن سوتتاردا وڭىردەگى سوت كورپۋسىنىڭ باستى سپيكەرلەرى رەتىندە ب ا ق- پەن ءوزارا ءىس-قيمىلعا جاۋاپتى ۇيلەستىرشى-سۋديالار قىزمەتى ەنگىزىلدى. ولار بارلىق وڭىرلىك جانە رەسپۋبليكالىق ب ا ق ءۇشىن بارىنشا اشىق ءارى ءوزارا بايلانىستى قامتاماسىز ەتۋى ءتيىس. اتالعان سۋديالار ب ا ق- تا جاريالانعان بارلىق سىني ماتەريالدار، تۇيتكىلدى ماسەلەلەر جونىندە ۇنەمى ءبىلىپ قانا قويماي، ولار بويىنشا دەن قويۋ شارالارىن ازىرلەۋى قاجەت.

ءىس-شارا بارىسىندا اتىراۋ وبلىستىق سوتىنىڭ ب ا ق- پەن ءوزارا ءىس-قيمىل بويىنشا ۇيلەستىرۋشى سۋدياسى مارينا چەرنياحوۆسكايا ءسوز سويلەدى. ول جيىنعا قاتىسۋشىلاردى وڭىرلەردەگى اقپاراتتىق جۇمىستىڭ بارىسىمەن تانىستىردى.

سالتاناتتى ءىس-شارانىڭ سوڭىندا قايرات ءمامي ب ا ق وكىلدەرىنە قۇرمەت گراموتالارى مەن ەستەلىك سىيلىقتار تاپسىردى.