دارىگەر: بايان ەسەنتايەۆانىڭ مۇرنىنا پلاستيكالىق وتا جاساۋ قاجەت

استانا. قازاقپارات - دارىگەرلەر بايان ەسەنتايەۆانىڭ مۇرنىنا پلاستيكالىق وتا جاساۋ قاجەت دەپ وتىر.

بۇل تۋرالى oday.kzt حابارلايدى.

ماۋسىمنىڭ 10- كۇنى كۇيەۋى پىشاقتاعان بايان ەسەنتايەۆا تالعار اۋداندىق اۋرۋحاناعا شۇعىل جەتكىزىلدى. اتالعان اۋرۋحانادا ءۇش ساعاتقا جۋىق ۋاقىت وتا جاسالدى. بۇگىندە دەنساۋلىعى جاقسارىپ، پروديۋسەر ۇيىنە شىعارىلعان. دارىگەرلەر ءالى دە ءبىر اي ۋاقىت مامانداردىڭ قاتاڭ باقىلاۋىندا بولىپ، ەمدەلۋى قاجەت ەكەنىن ايتىپ جاتىر.

بايان ەسەنتايەۆاعا اجال اۋزىنان امان الىپ قالعان دارىگەر وعان پلاستيكالىق وتا جاسالۋى مۇمكىن ەكەنىن ايتتى.

« پلاستيكالىق وتانىڭ قالاي جاسالاتىنىن بەت پەن جاقسۇيەك حيرۋرگى شەشەدى. مەنىڭ ويىمشا، وعان مۇرىن سۇيەكتەرىن قالپىنا كەلتىرۋ قاجەت. كوزىن وفتالمولوگ جانە وكۋليست ماماندار ەمدەيدى.

كوزى ورنىندا بولعانىمەن، قان قۇيىلىپ، الماسى زاقىمدانعان. ءدال قازىر قوزعالادى جانە دۇرىس كورەدى. شىعاراتىن كەزدە دەنساۋلىعىنىڭ جاقسارا تۇسكەنىن بايقادىق. كوزى دە دۇرىستالادى دەگەن ۇمىتتەمىز»، - دەيدى حيرۋرگ ەربول سارسەنبايەۆ.

دارىگەرلەر مەن وتباسى پروديۋسەرگە ءبىر اپتا بويى ينتەرنەتكە كىرۋگە تىيىم سالعان ەكەن. ءوزى تۋرالى جاڭالىقتاردى ەستىپ، كۇيزەلىسكە ءتۇسىپ كەتەدى دەپ ويلاسا كەرەك.

ەستەرىڭىزگە سالا كەتسەك، ماۋسىمنىڭ 10 ى كۇنى بايان ەسەنتايەۆانى كۇيەۋى سوققىعا جىعىپ، ءۇش جەرىنەن پىشاقتاعان بولاتىن. ارتىنشا پروديۋسەرگە 3 ساعات بويى وتا جاسالىپ، كۇيەۋى باقىتبەك ەسەنتايەۆ قاماۋعا الىنعان-دى. قايعىلى وقيعا تالعار اۋدانىن تراسساسىندا بولعان. پروديۋسەر ماۋسىمنىڭ 19 ى كۇنى اۋرۋحانادان شىعارىلدى.