جاستارعا لايىقتى جۇمىستى اۋىلدان دا تابۋعا بولادى - ج. ەركىن

ورال. قازاقپارات - جاستارعا لايىقتى جۇمىستى اۋىلدان دا تابۋعا بولادى. بۇعان مەملەكەتتىك باعدارلامالار مۇمكىندىك بەرەدى.

بۇل تۋرالى بۇگىنگى تاڭدا سىرىم اۋدانىندا بۇلان اۋىلدىق مادەنيەت ۇيىندە قويۋشى رەجيسسەر بولىپ ەڭبەك ەتىپ جۇرگەن جاس مامان جولامان ەركىن ءمالىم ەتتى.

ەلباسى تاپسىرماسىنا سايكەس ەلىمىزدە جاستاردى اۋىلعا تارتۋ ماقساتىندا «ديپلوممەن اۋىلعا!» باعدارلاماسى قولعا الىنعانى بەلگىلى. جولامان ەركىن - وسى باعدارلامانىڭ جەمىسىن تاتىپ وتىرعانداردىڭ ءبىرى.

ج. ەركىن 2011-2015 -جىلدارى قۇرمانعازى اتىنداعى ورال مۋزىكا كوللەدجىندە وقىپ، ونى رەجيسسەرلىك ماماندىق بويىنشا ءتامامدادى. اتا- اناسىنىڭ ۇسىنىسىمەن سىرىم ەلىنە كەلىپ، اۋداندىق جۇمىسپەن قامتۋ ورتالىعىنان جۇمىس سۇرايدى. سول كەزدە اۋداندىق دەمالىس ورتالىعىنا قاراستى بۇلان اۋىلدىق مادەنيەت ۇيىنە «جۇمىسپەن قامتۋدىڭ جول كارتاسى - 2020» باعدارلاماسىنا سايكەس جاستار تاجىريبەسىنەن وتۋگە جولداندى. 1989 -جىلى قۇرىلعان، 27 -جىلدىق تاريحى بار بۇلان حالىق تەاترىنا قويۋشى رەجيسسەر بولىپ ورنالاستى.

«جاس كەلسە - ىسكە» دەگەندەي، جولامان سۇيىكتى ماماندىعىمەن جۇمىسقا قۇلشىنا كىرىستى. بۇگىندە بۇلانداعى دراما ۇيىرمەسىنىڭ بالالارىمەن «ادىلدىك الەمى» اتتى ەرتەگى قويىپ ۇلگەرسە، قانات ءجۇنىسوۆتىڭ «ماحاببات» مەلودراماسىنا دايىندىق جۇرگىزىلىپ جاتىر. جولاماننىڭ جۇمىسى تەك قويۋشى رەجيسسەرلىكپەن شەكتەلمەيدى، اۋدان ورتالىعىنداعى سالتاناتتى شارالاردا، مەرەكەلىك كونتسەرتتە جۇرگىزۋشى بولىپ ءجۇر. بۇلان اۋىلىندا مادەنيەت ءۇيى، كىتاپحانا، مەكتەپ بولىپ بىرلەسىپ، قويان- قولتىق جۇمىس جاسايدى. ءاربىر مەرەكەگە ارناپ قىسقا قويىلىمدار دايىندايدى. وتە ەڭبەكقور جىگىت. جاس مامان جولامان بۇلان حالىق تەاترىنىڭ بيىككە ورلەي تۇسۋىنە، سىرىم ەلىنىڭ تەاتر ونەرىنىڭ دامۋىنا ۇلەس قوسۋدى ماقسات تۇتادى.

- «ديپلوممەن - اۋىلعا!» باعدارلاماسى - جانام دەگەن جاستارعا جىگەر بەرىپ، بويىنا قانات بىتىرەتىن جوبا. جۇمىسسىزدىقتى جويىپ، جاستاردىڭ جات قىلىقتارعا، ءتۇرلى اعىمدارعا ىلەسىپ كەتپەۋىنە بىردەن- ءبىر سەپ بولاتىن باعدارلاما. اۋىلدى، ونىڭ حالقىن ءسۇيۋدى، بەيتانىس ادامدارمەن ەت- جاقىنىڭداي ارالاسۋدى ۇيرەنىپ، ورتاعا ءوزىڭدى بەيىمدەپ، ءوزىڭنىڭ دە جۇمىسقا دەگەن كۇش- جىگەرىڭدى كورسەتۋگە مۇمكىندىك بەرەدى ەكەن. بۇيىرتسا، وسى باعدارلامامەن ءۇي الىپ، ءبىر شاڭىراققا يە بولسام دەيمىن، - دەيدى جاس مامان.

مادەنيەت سالاسىنىڭ ارداگەرى، بۇلان حالىق تەاترىنا ۇزاق جىل رەجيسسەرلىك ەتكەن گۇلبادان وتەشوۆا بۇلان حالىق تەاترىنىڭ باس رەجيسسەرى نۇرسۇلتان قالەشوۆ پەن قويۋشى رەجيسسەر جولامان ەركىنگە ۇنەمى اقىل- كەڭەسىن ايتىپ وتىرادى. ءاربىر جۇمىستىڭ ءوز قيىندىعى بار، رەجيسسەر بولۋدىڭ جاۋاپكەرشىلىگى دە مول. «رەجيسسەردىڭ ماقساتى - قويىلىمدى شەبەر قويىپ، ايتامىن دەگەن ويىڭدى حالىقتىڭ جۇرەگىنە جەتكىزۋ. ادامنىڭ پسيحولوگياسىنا قالاي اسەر ەتەتىنىن ءبىلۋ جانە اسەر ەتۋ. حالىق تەاترىندا دايىن، كاسىبي اكتەر بولماعاندىقتان، ارتىستەردى حالىق اراسىنان رولگە ساي ەتىپ تابا ءبىلۋ ءۇشىن قىراعىلىق قاجەت. ولارعا قالاي ويناۋ كەرەكتىگىن ۇيرەتۋ دە ۇلكەن شەبەرلىكتى، ءبىلىمدى تالاپ ەتەدى. تانىمايتىن اۋىلعا كەلىپ، بۇرىن- سوڭدى كورمەگەن بەيتانىس ادامداردىڭ اراسىنان رولگە ساي ءارتىس تاڭداۋ العاشىندا جەڭىل بولماعانىمەن، ءقازىر بۇلاندىقتاردىڭ اشىق- جارقىن، باۋىرمال، جاناشىرلىق تانىتۋلارىنىڭ ارقاسىندا ول قيىندىقتى وڭاي ەڭسەردىم»، - دەيدى جولامان ەركىن.

جۋىردا جىمپيتى حالىق تەاترى بەك رامازاننىڭ «شىرماۋىق» اتتى دراماسىن قويعان بولاتىن. ءداستۇرلى دىننەن اجىراپ، جات اعىمنىڭ جەتەگىنە كەتكەننىڭ جاس جىگىتتىڭ ءومىرىن بەينەلەيتىن درامادا جولامان ءدىنتانۋشىنىڭ بەينەسىن كەرەمەت سومداپ شىقتى.

ايتا كەتەيىك، جاستار تاجىريبەسىنە سىرىم اۋدانىندا بيىل 30 ادامعا رەسپۋبليكالىق بيۋدجەتتەن 6 ملن. 872 مىڭ تەڭگە بولىنگەن بولاتىن. اتالعان قارجىعا وسى جىلدىڭ اقپان ايىنان بەرى 23 ادام ۋاقىتشا جۇمىسقا جولدانىپ، سونىڭ التاۋى مەرزىمىنەن بۇرىن تۇراقتى ەڭبەك ورنىن تاپتى. قالعان جەتى ادام وسى جىلدىڭ شىلدە ايىنان جولداناتىن بولادى.

اۆتور: قانات مامەتقازى ۇلى