استانا ەلوردا كۇنىن مەرەكەلەۋگە دايىندىق ۇستىندە

 قالا اكىمدىگى ءاربىر ەلوردا تۇرعىنى مەن قوناعىنا قىزىقتى بولاتىن ءار الۋان مادەني- سپورتتىق شارالار باعدارلاماسىن ازىرلەدى. مەرەكەلىك شارالار گەوگرافياسى، سونىڭ ىشىندە قالا ماڭىن، گۇلباقتار مەن پاركتەردى، سونداي- اق، قالالىق الاڭداردى، ياعني، قالانى تۇتاستاي قامتيدى،

 دەپ حابارلادى قالا اكىمىنىڭ باسپا ءسوز قىزمەتى.

مەرەكە كۇندەرى استاناعا ارنايى كەلەتىن قوناقتار سانى جىل سايىن ۇلعايىپ كەلەدى.

مەرەكەلىك باعدارلامانىڭ شىمىلدىعى ماۋسىمنىڭ 20-نان 26-ىنا دەيىن وتەتىن «ساحنادان سالەم» تەاتر فەستيۆالىمەن اشىلادى. ونەر سۇيەر قاۋىم ەلىمىزدىڭ وڭىرلەرىنەن، سونداي- اق، رەسەي مەن ۋكراينادان كەلگەن ساحنا مايتالماندارىنىڭ ۇزدىك قويىلىمدارىن تاماشالايتىن بولادى.

ەستافەتانى AstanaArtFest 2016 قازىرگى زامانعى ونەر فەستيۆالى جالعاستىرادى. شارا اياسىندا سۋلى- جاسىل جەلەكتە بي مەن مۋزىكا فەستيۆالدەرى، كىتاپ پەن پوەزيا مەرەكەلەرى، سۋرەتشىلەر سيمپوزيۋمى جانە ت. ب. قىزىقتى شارالار ۇيىمداستىرىلادى.

 بيىل استانا تۇرعىندارى مەن قوناقتارى ءتۇرلى مەملەكەتتەردىڭ ارتىستەرىنىڭ قاتىسۋىمەن وتەتىن «ازيا جاڭعىرىعى» سيرك ونەرى فەستيۆالىن، مۋزىكا يندۋسترياسى ۇزدىكتەرىنىڭ قاتىسۋىمەن وتەتىن «استانا ارقاۋ» تۇركى مۋزىكاسىنىڭ فەستيۆالىن كورە الادى.

ەلوردا كۇنى اياسىندا وتاندىق ءسان يندۋسترياسىنىڭ كورسەتىلىمى مەن العاش رەت ءسان مەن ستيل سالاسىنداعى ELLE جۋرنالىنىڭ سىيلىعىمەن ماراپاتتاۋ سالتاناتى ۇيىمداستىرىلادى. قازاقستاندىقتاردىڭ نازارىنا «ارقايىم - كۇننىڭ قالاسى» تەحنولوگيالىق D3- شوۋى ۇسىنىلادى. «استانا ءازىل فەست» جانە «كوڭىلدى استانا» جوبالارى اياسىندا ءازىل- سىقاق كەشتەرى كورەرمەندەرگە كوتەرىڭكى كوڭىل كۇي سىيلايدى.

ايتا كەتەيىك، بيىل قازاقتىڭ باي مۇراسى مەن مادەنيەتىن ناسيحاتتايتىن ءىس- شارالارعا باسا نازار اۋدارىلماق. «مىڭجىلدىقتار توعىسىنداعى استانا» فەستيۆالى اياسىندا ۇلكەن ەتنواۋىل ورىن تەبەدى، بۇدان باسقا، العاش رەت «قىمىزمۇرىندىق» ەتنوگرافيالىق قىمىز فەستيۆالى، حالىق اسپاپتارى وركەسترلەرىنىڭ «سەرپەر» مۋزىكالىق فەستيۆالى وتەدى. جازدىڭ جارقىن وقيعالارىنىڭ ءبىرى «باعانالى وردام - باستى وردام» رەسپۋبليكالىق اقىندار ايتىسى بولماق. قازاقستاندىق كومپوزيتور سەيدوللا بايتەرەكوۆتى ەسكە الۋعا ارنالعان كەش پەن «مۋزارت» توبى شىعارماشىلىعىنىڭ مەرەيتويىنا ارنالعان كونسەرت انشلاگپەن وتەدى دەپ كۇتىلۋدە.

سالاۋاتتى ءومىر سالتىن ۇستاناتىندارعا ارنالعان سپورتتىق باعدارلاما ەلوردا كۇنىنە ارنالعان شارالاردىڭ اجىراماس بولىگى بولىپ تابىلادى. كورەرمەندەر مەن سپورتشىلار حالىقارالىق جاۋىنگەرلىك ونەر فەستيۆالىن، دۋاتلوننان قالالىق تۋرنير، ۇلتتىق سپورت تۇرلەرى - اسىق اتۋ مەن قازاق كۇرەسىنەن - «قازاقستان بارىسى» تۋرنيرىن تاماشالايدى.

بيىل ەلوردا كۇنىن مەرەكەلەۋگە قازاقستاندا اككرەديتتەلگەن باسقا ەلدەردىڭ ەلشىلىكتەرى دە وتە بەلسەندى قاتىسادى. مىسالى، ا ق ش ەلشىلىگى استاناعا «Broadway Bound»  ميۋزيكلىن اكەلۋ باستاماسىن كوتەردى، ول بەيبىتشىلىك جانە كەلىسىم سارايىندا جانە بايتەرەكتىڭ جانىنداعى اشىق الاڭدا كوپشىلىك نازارىنا ۇسىنىلادى. ال يتاليا ەلشىلىگى «استانا سامالى» ۇرمەلى اسپاپتار وركەسترلەرىنىڭ فەستيۆالىنە قاتىساتىن تۋ كوتەرىپ جۇرەتىندەردى اكەلەدى.

شارالاردىڭ تولىق باعدارلاماسىمەن، اڭداتپالار مەن الداعى وقيعالار تۋرالى اقپاراتپەنwww.astanaday.kz سايتىندا تانىسۋعا بولادى.