استانانىڭ جەدەل جاردەم قىزمەتىنىڭ دارىگەرلەرى قازاقستاندا ۇزدىك ەكەنىن دالەلدەدى - فوتو
استانا. قازاقپارات - ەلوردالىق جەدەل جاردەم قىزمەتى الماتىدا وتكەن رەسپۋبليكالىق جەدەل جاردەم بريگادالارىنىڭ جارىسىندا جەڭىسكە جەتتى.
بۇل تۋرالى استانا قالالىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن حابارلادى.
تۋرنيرگە قازاقستاننىڭ بارلىق ايماعىنىڭ جەدەل جاردەم بريگادالارى قاتىستى.
جارىس ەكى كەزەڭدە ءوتتى. بىرىنشىسىندە جەدەل جاردەم قىزمەتىنىڭ دارىگەرلەرى جەدەل قان تامىر سيندرومى، جول- كولىك اپاتى كەزىندەگى سىنىقتار سياقتى دياگنوزدارمەن ناۋقاستاردى قورعاپ، بالالار مەن ەرەسەكتەردىڭ جۇرەگى جانە وكپەسىنە رەنايماتسيا جاسادى، بالانى انافيلاكتيكالىق شوكتان قورعادى.
ەكىنشى كەزەڭدە دارىگەرلەر ۇيدە ايەلدى بوساندىرۋ، شاقالاققا رەانيماتسيا جۇرگىزۋ، بوسانعاننان كەيىن قاندى توقتاتۋ بويىنشا ۇزدىگىن انىقتادى.
مۇنداي جارىستاردى 10 جىلداي ليتۆا ەلى ۇيىمداستىرىپ كەلەدى. قازاقستاندىق دارىگەرلەر ونى ەلىمىزدە وتكىزۋدى ۇيعاردى. اتاپ ءوتۋ كەرەك، قازىلار القاسىنىڭ قۇرامىنا ليتۆا جەدەل جاردەم قاۋىمداستىعىنىڭ ساراپشىلارى ەندى.
«ەلوردالىق دارىگەرلەر ەلدىڭ باس قالاسىنىڭ دارەجەسىنە لايىق ەكەنىن كورسەتتى. ەندى رەسپۋبليكادا ۇزدىك ەكەنىمىزدى ايتا الامىز»، - دەدى استانا قالالىق جەدەل جاردەم قىزمەتىنىڭ باس دارىگەردىڭ ورىنباسارى راۋشان مولدابەكوۆا.
بۇگىندە استانا قالالىق جەدەل جاردەم ستانساسىندا 85 بريگادا جۇمىس ىستەيدى. وعان كۇن سايىن 2000 شاقىرتۋ تۇسەدى.
