ەلىمىزدە وقۋشىلارعا ءبىلىم بەرەتىن «تاريحشى- ءدىنتانۋشى» ماماندىعى پايدا بولادى
بۇگىن «ەكسپرەت» پىكىرتالاس كلۋبىنىڭ وتىرىسىنا قاتىسقان ءدىن ىستەرى كوميتەتىنىڭ ءتوراعاسى عالىم شويكين وسى سۇراققا جاۋاپ بەردى.
«جالپى، تەرروريزم مەن ەكسترەميزم قازاقستاندا عانا ەمەس، الەم بويىنشا ۋشىعىپ تۇر. قازاقستاندا دىنگە قاتىستى ارتىقشىلىق پەن كەمشىلىكتى ايتاتىن بولساق، ارتىقشىلىعى - اعا بۋىننىڭ لاڭكەستىككە قارسى يممۋنيتەتى كۇشتى. ال، جاس بۋىن مۇلدە باسقا ورتادا ءوسىپ كەلەدى. ولار ەڭ الدىمەن ينتەرنەتتىڭ تۇساۋىندا، ياعني، ەكسترەميزمنىڭ ءدال نازارىندا. سوندىقتان، ءبىزدىڭ ءبىلىم وسى زاماننىڭ تالابىنا ساي بولۋ كەرەك. ءبىراق، وبەكتيۆتى تۇردە الىپ قاراساق، زايىرلى مەملەكەتتىڭ مەكتەبىندە، زايىرلى مەكتەپتە ءبىز ءدىندى ناسيحاتتاي المايمىز، ءبىراق، ەسەسىنە، بۇكىل دىندەر تۋرالى وبەكتيۆتى عىلىمي ءبىلىم بەرە الامىز. بۇگىندە ءبىز ۇستازداردىڭ بىلىكتىلىگىن ارتتىرىپ جاتىرمىز، ءۇش جىلدان بەرى وسى باعىتقا قاتتى كوڭىل ءبولىپ كەلەمىز»، - دەگەن عالىم شويكين مەكتەپ وقۋشىلارىنا ءبىلىم بەرەتىن «تاريحشى- ءدىنتانۋشى» ماماندىعى پايدا بولاتىنىن حابارلادى.
«ءبىز جاڭا ماماندىق ەنگىزىپ وتىرمىز، بيىل «تاريحشى- ءدىنتانۋشى» ماماندىعىنا العاشقى ستۋدەنتتەر قابىلدانادى. ياعني، مەكتەپتە كاسىبي ءبىلىم بەرە الاتىن ماماندار دايارلانادى. ەكىنشى ءبىر باستى ماسەلە - ءبىز وقۋ بازاسىن تۇگەل اۋىستىرامىز. وسى جىلدان باستاپ جاڭادان ەكى كىتاپ شىعارىلادى. ياعني، ءبىز زايىرلى مەكتەپتە ەكسترەميزمنىڭڭ الدىن الۋ ءۇشىن وسى ءادىستى قولدانامىز»، - دەپ ءتۇسىندىردى ع. شويكين.
اۆتور: كەنجەكەي توقتامۇرات قىزى
