الماتىداعى «نۇر مۇباراك» ۋنيۆەرسيتەتى جانىنان مىقتى ۋاعىزشىلار دايىندايتىن ورتالىق اشىلادى

استانا. قازاقپارات - بۇگىن «ەكسپەرت» پىكىرتالاس كلۋبىنىڭ كەزەكتى وتىرىسىندا «قازاقستاننىڭ يمامدارى تەرىس ءدىندى ۋاعىزداۋشى شەتەلدىك تەولوگتاردىڭ ۋاعىزدارىنا قارسى تۇرا الا ما؟» دەگەن سۇراق تۋىندادى.

ق م د ب ءتوراعاسىنىڭ ورىنباسارى، استاناداعى «ازىرەت سۇلتان» مەشىتىنىڭ باس يمامى سەرىكباي قاجى وراز قازاقستاننىڭ يمامداردىڭ ءبىلىمى تومەن دەگەن پىكىرمەن كەلىسپەيتىنىن ايتتى.

«قازىرگى كەزدە ءبىزدىڭ جاماعاتىمىزدىڭ ىشىندە كۇندەلىكتى ناماز وقىپ جۇرگەندەردىڭ 30 پايىز شاماسى باسقا اعىمداردىڭ وكىلدەرى. يمامدارعا قۇرمەتپەن قارايدى، ۋاعىز تىڭداعان كەيىپ تانىتىپ وتىرادى. ءبىراق، نەگىزگى يدەولوگيالىق كۇشتى، نەگىزگى باعىتتى ينتەرنەت ارقىلى سىرتتاعى شەيحتاردان، نەمەسە سول تەرىس اعىمداعى تەولوگتاردان الادى. «ءبىزدىڭ يمامدارىمىز سول ينتەرنەتتەگى تەرىس اعىمداعى تەولوگتارعا قارسى تۇراتى الاتىن دەڭگەيدە مە؟» دەسەك، «ارينە، سونداي دەڭگەيدە» دەپ جاۋاپ بەرەمىن. «ءبىزدىڭ يمامدارىمىزدىڭ يدەولوگياسى تەرىس اعىمعا شاقىراتىن تەولوگتاردىڭ دەڭگەيىنەن تومەن» دەگەن پىكىرگە كەلىسپەيمىن»، - دەدى يمام.

ال، ءدىن ىستەرى كوميتەتىڭ ءتوراعاسى عالىم شويكيننىڭ ايتۋىنشا، 2016 -جىلدىڭ 1-قىركۇيەگىنەن باستاپ «نۇر مۇباراك» ۋنيۆەرسيتەتىنىڭ جانىنان مىقتى ۋاعىزشىلاردى دايىندايتىن ورتالىق اشىلادى.

«جالپى، يمامداردى دايارلاۋعا كەلەتىن بولساق، مەنىڭ ايتارىم، سوڭعى جىلدارى يمامداردىڭ بىلىكتىلىگىن ارتتىرۋ بويىنشا كوپ جۇمىستار اتقارىلدى. سەرىكباي قاجىنىڭ سوزىنە قوسىلامىن، يمامداردى اتتەستاتسيادان وتكىزۋ جۇيەسى قوسىلدى. ەلىمىزدەگى جانە شەتەلدەگى ىلگەرلى وقۋ ورىندارمەن كەلىسىسوزدەر جۇرگىزىپ، وسىنداي كادرلاردى دايىنداۋ ماسەلەسى تالقىلانادى. جوعارى وقۋ ورىنداردىڭ ءوزى يەدولوگيالىق كۇرەسكە 100 پايىز قارسى تۇرا الاتىن ماماندار دايارلاپ شىعا المايدى. ولار ءدىني امالدارعا ۇيرەتەدى. سوندىقتان، ءبىز مەملەكەتتىك ورگاندار يمامدارعا كومەكتەسۋىمىز كەرەك. 1 -قىركۇيەكتەن باستاپ «نۇر مۇباراك» ۋنيۆەرسيتەتىنىڭ جانىنان ەكى ورتالىق قۇرىلادى دەپ ۇمىتتەنىپ وتىرمىز. ءبىرىنشى ورتالىق - ءدىني ەكسترەميزيم مەن تەرروريزمگە قارسى تۇراتىن ءدىن ماماندارىن دايارلايتىن ورتالىق. ەكىنشىسى - كاسىبي ءدىني ۋاعىزشىلاردى دايىندايتىن ورتالىق بولادى»، - دەپ حابارلادى ع. شويكين.

بۇل رەتتە، كوميتەت ءتوراعاسى «يمامدار نەگە بالالار مەن جاستارعا ۋاعىز جۇرگىزبەيدى؟» دەگەن سۇراققا جاۋاپ بەرە وتىرىپ، «مەكتەپتەرگە بارىپ، ۋاعىز جۇرگىزە المايمىز. ءبىز زايىرلى مەملەكەتپىز. مەملەكەتتىك جانە مەملەكەتتىك ەمەس ۇيىمدارعا، زاۋىتتارعا دا بارا المايمىز»، - دەدى.

اۆتور: كەنجەكەي توقتامۇرات قىزى