اقتوبەدەگى وقيعاعا بايلانىستى لاڭكەستىك بويىنشا قىلمىستىق ءىس قوزعالدى - ا. كراۆچەنكو

استانا. قازاقپارات - اقتوبەدە لاڭكەستىك ورىن العانى انىق. سوندىقتان لاڭكەستىك بويىنشا قىلمىستىق ءىس قوزعالدى.

بۇل تۋرالى بۇگىن ق ر باس پروكۋرورىنىڭ ورىنباسارى اندرەي كراۆچەنكو ءمالىم ەتتى.

«اقتوبەدە لاڭكەستىك ورىن الدى، سوندىقتان لاڭكەستىك بويىنشا قىلمىستىق ءىس قوزعالدى. قىلمىستىق ىستەر وتە كوپ بولۋى مۇمكىن، ونىڭ بارلىعى ءبىر وندىرىسكە توپتاستىرىلۋى دا عاجاپ ەمەس. جانە ول ءبىر جەردە تەرگەلەدى»، - دەدى ول بۇگىن ق ر ۇ ك پ وتىرىسىنان كەيىن تىلشىلەرگە بەرگەن سۇحباتىندا.

ەسكە سالا كەتەيىك، 5- ماۋسىم كۇنى اقتوبەدە لاڭكەستىك ورىن الدى. 29 لاڭكەس قارۋ ساتاتىن دۇكەنگە جانە ۇلتتىق ۇلاننىڭ اسكەري بولىمشەسىنە شابۋىل جاسادى. ازاماتتاردىڭ ىشىندە ۇشەۋى قازا تاۋىپ، ەكەۋى جاراقات الدى. سونداي-اق قارۋ ساتاتىن ورىنعا ءبىرىنشى جەتكەن پوليتسيا قىزمەتكەرلەرى كوز جۇمدى. تۇنگى ۇستاۋ بارىسىندا دا پوليتسيا قىزمەتكەرلەرى جاپا شەكتى. اسكەري قىزمەتكەرلەر اراسىنان ءۇش ادام قازا تاۋىپ، التاۋى جاراقات الدى. ەلىمىزدە 40 تاۋلىككە لاڭكەستىك قاۋىپىنىڭ «سارى» دەڭگەيى ەنگىزىلدى. وسى ۋاقىت ارالىعىندا 13 لاڭكەس جويىلدى، 14 جاراقات الىپ، 2 ءى قاماۋعا الىندى.

اقتوبە وبلىسىندا لاڭكەستىككە قارسى وپەراتسيا ءالى جالعاسۋدا. ارنايى ءىس-شارا بارىسىندا ىزدەۋدە بولعان تاعى 5 لاڭكەستىڭ كوزى جويىلدى. كەلىسسوزدەر بارىسىندا ولار ءوز ەرىكتەرىمەن بەرىلۋدەن باس تارتىپ، قارۋدان وق اتقان. تۇرعىندار مەن قۇرىلىمدىق كۇشتەر قاتارىنان شىعىن جوق.

قازىرگى ۋاقىتتا ق ر باس پروكۋراتۋراسى اقتوبەدەگى وقيعالارعا بايلانىستى 20 دان استام قىلمىستىق ءىس قوزعادى.

اۆتور: جاسۇلان جولدىبايەۆ