بالامنىڭ كىناسى دالەلدەنسە، مەنىڭ كوزىمشە اتىپ تاستاسىن - ىزدەۋدە جۇرگەن لاڭكەستىڭ اناسى
«قازاقستان» تەلەارناسى اقتوبەدەگى تەراكتىگە بايلانىستى ىزدەستىرىلىپ جاتقان باقىت قۋانىشبايەۆتىڭ اناسىنىڭ ۆيدەو ۇندەۋىن جاريالادى. گۇلسىم قۋانىشبايەۆانىڭ ايتۋىنشا، ول بالاسىنىڭ مۇنداي ارەكەتكە بارعانىنا سەنبەيدى. ول بالاسى كىناسىن مويىنداعان جاعدايدا، ودان باس تارتۋعا دايىن ەكەنىن مالىمدەدى.
«بالامنىڭ مۇنداي ارەكەتكە بارعانىنا سەنبەيمىن. بالام ادامدارعا سەنگىش. ەگەر ول سوندا ءوز ەركىمەن بارىپ، شىنىمەن دە كىنالى بولسا، انا رەتىندە ايتامىن، وندا ونى مەنىڭ كوزىمشە اتىپ تاستاسىن، مەن وعان قارسى ەمەسپىن. ەستىپ تۇرسىزدار ما! مەن ونى بۇلاي تاربيەلەگەن جوقپىن. ەگەر بارلىعى راستالسا، وندا ول مەنىڭ بالام ەمەس، ول بوتەن ادام. بۇدان باسقالار ساباق السىن»، - دەدى گۇلسىم قۋانىشبايەۆا.
23 جاستاعى باقىت قۋانىشبايەۆ اقتوبەدەگى تەراكتى بويىنشا ىزدەستىرىلىپ جاتقانداردىڭ قاتارىندا. بۇعان دەيىن وڭىرلىك ءى ءى د قىلمىسكەرلەردىڭ سۋرەتتەرىن جاريالادى. ولاردىڭ اراسىندا باقىت قۋانىشبايەۆ تا بار.
باقىت قۋانىشبايەۆتىڭ اناسى گۇلسىم قۋانىشبايەۆا حالىقتىڭ قايعىسىنا ورتاقتاسىپ، كوڭىل ايتتى. انا جۇرەگى بالاسىنىڭ ادام ولتىرگەنىنە سەنگىسى جوق، دەپ حابارلايدى Bnews.kz.
ال جۇبايى اينۇر وماروۆا كۇيەۋىنىڭ ءبىر كۇشتىڭ جەتەگىندە كەتكەنىن ايتىپ نالىدى.
«كۇيەۋىم جۇمىستان شىعاردا «قازىر كەلىپ، ورازاعا ازىق- تۇلىك الامىز» دەدى. ءبىراق سول كەتكەننەن حابار جوق. مەن ونىڭ ادام ولتىرگەنىنە سەنبەيمىن. ول اڭعال، ادامعا سەنگىش، ءتىپتى مىسىقتان قورقاتىن ادام. كىشكەنتاي بالا سياقتى بولدى. ءبىر ويىم بار، وعان ءدارى ەگىپ، اقىل- ەسىنەن اداستىرىپ، سول جەرگە اپارعان بولار»، - دەيدى ا. وماروۆا.
ال اناسى گۇلسىم قۋانىشبايەۆانىڭ قايعىلى كۇننەن بەرى كوز جاسى ءبىر قۇرعاعان ەمەس.
«ەكى بالام بار. بالالارىم ەشتەڭەدەن تارشىلىق كورمەي، قاتارىنان قالماي ءوستى. ءوزىم قاتتى تاڭ قالىپ وتىرمىن. 2-3 -جىلدان بەرى اللانىڭ اق جولىنا ءتۇسىپ، بەس ۋاقىت نامازىن وقىدى. ءبىر قاسيەتى بار، ول - سەنگىش، اڭعال. جەتەككە ەرىپ كەتكەن بولار. وقيعا بولعان كۇنى «حالىقتى قىرىپ جاتقان ادامدار وڭباعاندار، ادام ەمەس، جاۋىز شىعار» دەپ ايتتىم. ءوز بالام بار دەپ ويلامادىم. ونداي وي دا بولعان جوق. مەن انا رەتىندە حالىقتىڭ قايعىسىنا ورتاقپىن. انا رەتىندە جۇرەگىم جىلاپ وتىر. بالام وندايعا بارمايدى. «جۇمىسقا كەتىپ بارا جاتىرمىن، تۇستەن كەيىن كەلەمىن. ەرتەڭ ورازا، تۇستەن كەيىن بازارعا شىعىپ، ازىق- تۇلىك الامىز» دەدى. ال بۇگىن مىناداي جاعدايعا تاپ بولىپ وتىرمىز. مەن نە ايتارىمدى بىلمەيمىن. بالامدى بىرەۋ الداپ الىپ كەتكەن شىعار»، - دەيدى ول.
گۇلسىم قۋانىشبايەۆا حاباردى ەستىگەن كورشىلەرىنىڭ الاڭداپ، ونىڭ مۇنداي ارەكەتكە بارعانىنا سەنە الماي جۇرگەندەرىن، وتباسىنىڭ اينالاعا سىيلى ەكەنىن ايتادى.
«ەكى بالاسى بار. «ماما مەنىڭ بەس بالام بولادى» دەپ ارمانداپ وتىراتىن ەدى. بالالارىمدى ءتارتىپتى، تاربيەلى ەتىپ تاربيەلەدىم. ءدال وسىندايعا بارادى دەپ ويلاعان جوقپىن. بالاسىنان ايىرىلعانداردىڭ قايعىسىنا ورتاقپىن. باسشىلاردىڭ ايتىپ وتىرعان ءسوزىن دە تولىق قولدايمىن. ءبىراق، مەنىڭ بالام ءدال سول جەرگە باردى دەگەنگە سەنبەيمىن. قانداي دا ءبىر كۇش- قۋات ونى الداپ الىپ كەتتى. مەن ەندى ول بالانى كورەمىن دەپ تە ويلامايمىن»، - دەيدى ول.
ەسكە سالايىق، 5- ماۋسىم كۇنى اقتوبە قالاسىندا كەڭ اۋقىمدى تەراكت بولدى. قالانىڭ ءۇش اۋدانىندا بولعان اتىس سالدارىنان جەتى ادام قازا تاۋىپ، 38 ادام جاراقات الدى.
