اقتوبەدەگى اسكەري قىزمەتكەر شابۋىلعا قالاي تويتارىس بەرگەنىن ايتىپ بەردى
«ول كۇنى ءبىز ىشكى كۇزەتتە تۇردىق. التى ادام بولدىق. كۇزەتتى قابىلدادىق، سوسىن تۇسكى استى ءىشىپ الىپ، ۇيىقتادىق. №2 -ساقتىق توبى تارتىپكە سايكەس كۇزەت ورنىندا ۇيىقتاۋى كەرەك بولاتىن. كەيىن ءبىزدى اسكەري قىزمەتشى وياتتى. سودان اسكەري بولىمگە شابۋىل جاسالىپ جاتقانى جايلى دابىل ءتۇستى. №1 -ساقتىق توبى كۇزەت باستىعىمەن بىرگە شابۋىلعا تويتارىس بەرۋگە كەتتى، ولار ەڭ ءبىرىنشى بولىپ سوعىستى. ءبىز، №2 -ساقتىق توبى كۇزەتتى كۇشەيتە باستادىق. ءوزىمنىڭ كۇزەت ورنىما جۇگىرىپ بارا جاتقاندا، اتىستىڭ بولىپ جاتقانىن ەستىدىم. ءۇشىنشى كۇزەت ورنىنا جۇگىرىپ بارىپ، بەكىنىستە تۇردىم. سوسىن ساياباق جاققا بارىپ، شابۋىلعا تويتارىس بەردىك»، - دەدى اۆدەيەۆ.
اسكەري قىزمەتكەر اۆدەيەۆ جاراقات العان، قازىر قارالىپ جاتىر. نە بولعانىن تەك جەدەل جاردەمدە ءتۇسىندىم.
«بارلىعى نۇسقاۋعا سايكەس جۇمىس ىستەدى»، - دەيدى اۆدەيەۆ.
قازا تاپقاندار جايلى ايتا كەلە، اۆدەيەۆ بىلاي دەدى: «مەن ونىمەن جارتى جىلداي اسكەري بولىمدە تۇردىم. ەندى مىنانداي جاعداي بولىپ قالدى... ەشكىم دە ول كۇنى ءبىر جاعداي بولادى دەپ ويلامادى دا. ءبىز اسكەردەن قايتۋ تۋرالى ويلادىق. وسىنداي بەيبىت ۋاقىتتا ەندى مىنانداي جاعداي بولىپ وتىر».
گەنەرال- مايور، ۇلتتىق گۆارديا باس كومانديرىنىڭ ورىنباسارى مۇحامەتقالي ساتوۆ اقتوبەدەگى اسكەري بولىمدە بولعان شابۋىلدىڭ ءمان- جايىن ايتىپ بەردى. قىلمىسكەرلەر 5 -ماۋسىمدا اسكەري بولىمگە شابۋىل جاساعاندا مارشرۋتتىق اۆتوبۋستى باسىپ العان بولاتىن. جولاۋشىلاردى اۆتوبۋستان شىعارىپ، كەيىننەن اسكەري ءبولىمنىڭ اۋماعىنا كىرىپ، شابۋىل جاساعان. سالدارىنان ءۇش ادام قازا تاۋىپ، التى اسكەري قىزمەتكەر جاراقات العان.
اسكەري بولىمدە بۇگىن قازالى ميتينگ ءوتتى. اقتوبەدەگى تەراكتىنىڭ سالدارىنان قازا تاپقاندارعا بايلانىستى قازاقستاندا 9 -ماۋسىم ۇلتتىق ازا تۇتۋ كۇنى بولىپ بەلگىلەندى.
ەسكە سالايىق، بيىل 5 -ماۋسىمدا اقتوبەدە تەراكت بولعان ەدى، ونىڭ سالدارىنان ونداعان ادام قازا تاپتى. قازاقستاندا تەررورلىق ءقاۋىپتىڭ سارى دەڭگەيى، ال اقتوبەدە قىزىل دەڭگەيى ەنگىزىلدى. شابۋىل جاساعان 13 ادام ءولتىرىلدى، تاعى تورتەۋى جارالاندى، ەندى التى ادام ىزدەۋدە ءجۇر.
