بولگاريا دەپۋتاتتارى اقتوبەدەگى تەرروريستىك اكتىگە بايلانىستى كوڭىل ايتتى

استانا. قازاقپارات - بۇگىن پارلامەنت ماجىلىسىنە بولگاريا رەسپۋبليكاسى حالىقتىق جيىنىنىڭ دەنساۋلىق ساقتاۋ جونىندەگى كوميسسيا ءتورايىمى، قازاقستان پارلامەنتىمەن دوستاستىق توبىنىڭ جەتەكشىسى دانيەلا داريتكوۆا باستاعان دەلەگاتسيا كەلدى.

دەلەگاتسيانى ءماجىلىستىڭ الەۋمەتتىك- مادەني دامۋ كوميتەتىنىڭ ءتورايىمى گۇلنار ىقسانوۆا قابىلدادى.

دەلەگاتسيا تاراپى اڭگىمەنى قازاقستاندا جاريالانعان قارالى كۇنگە، سونىمەن قاتار، اقتوبەدەگى تەرراكتىگە بايلانىستى قايعىلى وقيعاعا كوڭىل ايتۋدان باستادى. بۇدان بولەك، بولگاريا دەپۋتاتتارىمەن بولعان جۇزدەسۋدە تەروريزمگە قارسى كۇرەستە بىرلەسكەن كۇش- جىگەردىڭ قاجەتتىلىگى اتاپ ءوتىلدى. وسى رەتتە كەزدەسۋ بارىسىندا قر پرەزيدەنتى ن. نازاربايەۆتىڭ ۆاشينگتون سامميتىندەگى «الەم. 21- عاسىر» مانيفەسىنىڭ وزەكتىلىگىنە نازار اۋداردى. «جاڭا تۋىنداپ جاتقان قاتەرلەرمەن كۇرەس تۋرالى اڭگىمەدە ءبىز ەلدەر اراسىنداعى ىنتىماقتاستىقتىڭ حالىقتار يگىلىگىنە جۇمىس ىستەۋى كەرەكتىگىن ەشقاشان ەستەن شىعارماۋعا ءتيىسپىز»، - دەدى دانيەلا داريتكوۆا.

ءوز كەزەگىندە ءماجىلىس دەپۋتاتى گۇلنار ىقسانوۆا ەكى ەل اراسىنداعى ىنتىماقتاستىقتىڭ بارلىق باعىتىن دامىتۋ بويىنشا تالقىلاۋلارعا ءازىر ەكەنىن جەتكىزدى. وسىعان بايلانىستى تاراپتار دەنساۋلىق ساقتاۋ، مەديتسينا، دەموگرافيا ماسەلەلەرىنە كوڭىل بولە وتىرىپ، الەۋمەتتىك دامۋ باعىتىنداعى ىنتىماقتاستىققا نازار اۋداردى. «قازاقستان «نۇرلى جول» ستراتەگياسىن جۇزەگە اسىرۋ بارىسىندا ەۋروپالىق ەلدەردىڭ ينۆەستيتسيالىق مۇمكىندىكتەرىن كەڭىنەن پايدالانۋعا قىزىعۋشىلىق تانىتادى. سونىمەن قاتار، بولگاريانى استانادا وتەتىن «ەكسپو-2017» حالىقارالىق مامانداندىرىلعان كورمەسىنەبەلسەندى تۇردە قاتىسۋعا شاقىرعىم كەلەدى»، - دەدى گۇلنار ىقسانوۆا.

اۆتور: قانات مامەتقازى ۇلى