لاڭكەستەر باسىپ العان اۆتوبۋستىڭ جۇرگىزۋشىسى اسكەري ءبولىمنىڭ قاقپاسىن قالاي سوعىپ كىرگەنىن ايتىپ بەردى
«سول كۇنى مەن ادەتتەگىدەي ءبىرىنشى مارشرۋتىما شىقتىم. ساعات 13.00-دە اۆتوبۋستىڭ قوزعالتقىشى قىزىپ كەتە باستادى. ابىروي بولعاندا، قالانىڭ ەسكى بولىگىنەن ىقشاماۋدانعا بارا جاتقان ادامدار از بولدى، سوندىقتان مەن ايالدامالارعا توقتاماي ءجۇرىپ كەلە جاتتىم.
تۇراقتايتىن جەرىمىزگە جەتۋگە اسىقتىم، قوزعالتقىشتى كورۋىم كەرەك بولدى. كوپىردەن ءتۇسىپ كەلە جاتىپ، ءاليا مولداعۇلوۆا داڭعىلىندا كەپتەلىس پايدا بولعانىن كورىپ، كىشى «ءالياعا» ءوتىپ كەتتىم. بارلىعى وسى جەردە باستالدى. الدىمنان پاترۋلدىك پوليتسيا كولىگى اتىپ شىعىپ، جولدى جاۋىپ قالدى. قۇقىق قورعاۋ ورگاندارىنىڭ قىزمەتكەرلەرى اتىپ شىعىپ، سول جەردە اتىس باستالىپ كەتتى. ايقاي- شۋ، اتىس ءبارىن ەسەڭگىرەتىپ تاستادى. مەنىڭ قاۋىپسىزدىك بەلبەۋىم اعىتىلماي قالدى، اعىتا الماي قالدىم. جولاۋشىلارعا «قاشىڭدار» دەپ ايعايلاعانىم ەسىمدە. ءبىراق ولاردىڭ بارلىعى ەدەنگە جاتا قالدى. جانىمدا ايەلىم بولعان، ول كوندۋكتور (بەلەت ساتۋشى)، وعان قاراپ قويامىن. سول امان بولسا ەكەن دەگەن جالعىز وي بولدى. ءوزىم جايلى ويلاماپپىن دا»، - دەپ ەسكە الادى تەراكت جايلى مۇرات.
ونىڭ ايتۋىنشا، لاڭكەستەر اۆتوبۋستى باسىپ الىپ، جولاۋشىلاردىڭ بارلىعىن جىبەرە سالىپتى.
«ايەلىم ايگۇل مەنى دە بوساتۋلارىن قالادى، ءبىراق لاڭكەستەر وعان قارۋ كەزەپ تۇرىپ، قاشۋىن بۇيىردى. ال مەنىڭ باسىما اۆتوماتتارىن كەزەدى دە، جيلگورودكا جاققا ءجۇرۋىمدى تالاپ ەتتى. ەشكىمگە توقتاماي، جولعا تۇسكەننىڭ بارلىعىن سوعىپ جۇرە بەرۋىم كەرەكتىگىن ايتتى. ءبىراق مەن كەدەرگىلەردەن اينالىپ ءوتىپ ۇلگەردىم. كەيدە قارسى باعىتقا شىعىپ كەتىپ جاتىپ، كەيدە تەجەگىشتى باسۋمەن بولدىم. ءوزىمنىڭ ءومىرىمدى ساقتاۋ ءۇشىن بىرەۋدىڭ ءومىرىن جالمامايمىن عوي. اسكەري بولىمگە جاقىنداعاندا لاڭكەستەر ءومىرىمدى امان الىپ قالۋعا ءبىر عانا مۇمكىندىگىمنىڭ بارىن ايتتى. ءتىرى قالۋىم ءۇشىن قاقپانى سوعىپ، قويمالارعا دەيىن كىرۋىم كەرەك بولدى»، - دەيدى اۆتوبۋس جۇرگىزۋشىسى.
ول وسى ۋاقىتتا نە ويلارىن دا بىلمەگەنىن ايتتى، ءبىراق قىلمىسكەرلەرگە قارسىلىق كورسەتكىسى كەلىپتى.
«قاقپانى سوعىپ كىرگەنىمدە اۆتوبۋستىڭ قوزعالتقىشىن قاساقانا ءوشىردىم. كۇزەتشىلەر بايقاپ قويىپ، قىلمىسكەرلەردى اسكەري بولىمگە كىرگىزبەيتىن شىعار دەگەن وي بولدى. ءبىراق لاڭكەستەر دەرەۋ وق اتا باستادى. قۇلاعىمنىڭ تۇبىنەن تۇرىپ اۆتوماتپەن، قارۋمەن اتتى. ەسىمنەن تانىپ قالعانداي بولدىم. «ەسىكتى اش» دەگەن ايعايدان ەسىمدى جيدىم. ولار ءبولىمنىڭ اۋلاسىنا جۇگىرىپ كەتتى. وسى قاربالاستا ارتقى ەسىككە بارىپ، سىرتقا شىعىپ كەتتىم. مەنى دە اتا باستادى. ءبىراق مەن قاقپانى جاعالادىم. ايتەۋىر امان شىعىپ كەتتىم. وسى كۇيىمدە جيلگورودتاعى تۇراققا جەتتىم»، - دەيدى مۇرات.
ول وسى وقيعادان كەيىن اۋرۋحاناعا تۇسكەنىن ايتتى. دارىگەرلەر ونى قالا سىرتىنداعى ەمحاناعا جىبەرىپتى.
«وسى ەمحانادا كوز دارىگەرى ەندىگى ەمدى ۋچاسكەلىك دارىگەردەن الۋىم كەرەكتىگىن ايتتى. قاربالاس بولىپ كەتتى. ءالى دە باسىم اۋىرادى، ەم تاعايىنداعان دا جوق. قازىر قوبدادامىن، سوندا تۋعانمىن. تىنىش جەردە تۋىستارىممەن بىرگە بۇل وقيعانى ۇمىتاتىن شىعارمىن. وسىدان كەيىن تولىقتاي تەكسەرىلەمىن.»، - دەيدى ول.
اۆتوبۋس جۇرگىزۋشىسىنىڭ ايەلى ايگۇل جۇمابايەۆا كوندۋكتور بولىپ جۇمىس ىستەيدى.
«وسى ۋاقىتتا الدىڭعى ەسىكتەن قىلمىسكەرلەر كىرە جونەلدى. سىرتقى كەلبەتىنە قاراپ ولاردى قاراپايىم ادام دەپ ويلايسىڭ. بارلىعىنىڭ قولىندا قارۋ بولدى. مەن كۇيەۋىمدى تاستاپ كەتپەيتىنىمدى، اۆتوبۋستا قالاتىنىمدى ايتتىم. دەگەنمەن ولار بارلىعىمىزعا ارتقى ەسىكتەن شىعۋدى بۇيىرىپ، ايعايلادى. ءبارىمىز شىعىپ كەتتىك. كۇيەۋىمە اسكەري بولىمگە اپارۋدى بۇيىردى.
مەن ءبىرىنشى كەزدەسكەن كولىككە وتىرىپ، اۆتوبۋستىڭ ارتىنان ءجۇردىم. دەگەنمەن اسكەري بولىمگە جاقىنداعان كەزدە اۆتوبۋستىڭ سوندا كىرگەنىن كوردىك تە، توقتادىق. كەيىن ماعان كۇيەۋىم حابارلاستى. اۆتوبۋستىڭ ارتىندا ماشينا كوپ بولدى. كولىككە قالاي وتىرعانىم ەسىمدە جوق. جۇرگىزۋشىدەن اۆتوبۋستىڭ ارتىنان ءجۇرۋدى سۇراپ جىلادىم. دەگەنمەن ءبىز سوڭىنا دەيىن بارمادىق، مەن ونى سىرتتا كۇتتىم»، - دەيدى ايگۇل.
ەسكە سالايىق، بيىل 5 - ماۋسىمدا اقتوبەدە تەراكت بولعان ەدى، ونىڭ سالدارىنان ونداعان ادام قازا تاپتى. قازاقستاندا تەررورلىق قاۋىپتىڭ سارى دەڭگەيى، ال اقتوبەدە قىزىل دەڭگەيى ەنگىزىلدى. شابۋىل جاساعان 13 ادام ءولتىرىلدى، تاعى تورتەۋى جارالاندى، ەندى التى ادام ىزدەۋدە ءجۇر.
Kaz.tengrinews.kz
