اقتوبەدەگى تەراكت: كۇدىكتىلەر قاتارىندا سۋرەتى جۇرگەن اۋىل تۇرعىنى ۇيقىسى بۇزىلعانىن ايتتى
43 جاستاعى سامات قوجانيازوۆ مەكتەپتە جۇمىس ىستەيدى. ول تەراكت جايىندا كەلەسى كۇنى ءبىراق بىلگەنىن ايتتى. ال ءوز سۋرەتىن ينتەرنەتتەن كورىپ قالىپتى. ەر ادام 5- ماۋسىمدا اكەسىنىڭ ساداقاسىن بەرگەنىن، مۇنى اۋىل تۇرعىندارىنىڭ بارلىعى بىلەتىنىن ايتتى.
«ماعان وبلىس اكىمىنىڭ وكىلى كەلىپ، جەكە مالىمەتتەرىمدى الىپ كەتتى. ولار ازىرشە اۋىلدا بولۋىم كەرەك ەكەنىن ايتتى. بۇعان دەيىن سوتتى بولماعانمىن. سوسىن ماعان پوليتسەيلەر كەلىپ، جاعدايدى سۇراستىرىپ، تۇسىنىكتەمە جازعىزدى. وندا اۋىلدا بولعانىمدى جازدىم، اۋىلداعىلاردىڭ بارلىعى، اۋىل اكىمى دە بىلەدى عوي مەنىڭ اۋىلدا بولعانىمدى. ءۇش بالانىڭ اكەسى ەكەنىمدى، ءبىرىنىڭ بالاباقشادا، ءبىرىنىڭ ونىنشى سىنىپتى ءبىتىرىپ جاتقانىن، ءبىر بالامنىڭ اسكەردە جۇرگەنىن جازىپ بەردىم. ءوزىم اۋىلدا مەكتەپتە جۇمىس ىستەيمىن، ايەلىم مەدبيكە بولىپ جۇمىس ىستەيدى»، - دەيدى قوجانيازوۆ.
ءبىراق ول سوتقا بەرە مە، جوق پا، مۇنى ءالى شەشپەپتى. ال ايەلى سوتقا بەرۋىن سۇراپ وتىر ەكەن. ونىڭ ايتۋىنشا، جەرگىلىكتى اكىمدىكتەگىلەر ونىڭ اقتوبەدەگى اتىسقا ەش قاتىسى جوق ەكەنىن جانە قاتەلىك بولعانىن ب ا ق ارقىلى رەسمي تۇردە ايتۋعا ۋادە بەرىپتى.
سونىمەن قاتار، ەر ادام بۇل جايتقا قاتتى ۋايىمداپ جۇرگەنىن ايتتى. «سۋرەتىمدى قايدان العاندارىن دا بىلمەيمىن، مۇنى كىمنىڭ نەلىكتەن تاراتقانىن بىلمەيمىن. ەشكىممەن ءىسىم جوق، قاراپايىم اداممىن عوي. بىرەۋلەر اتى-ءجونىم بىرەۋدىڭ اتى-جونىمەن بىردەي بولدى، سوندىقتان قاتەلىك كەتكەن بولار دەپ ايتىپ، بولجام جاساپ وتىر. بۇل وقيعا مازامدى الدى، وسىمەن ءتورتىنشى كۇن تىنىش ۇيىقتامادىم»، - دەيدى اۋىلدىق ازامات.
ەسكە سالايىق، ءى ءى د الەۋمەتتىك جەلىدە تارالىپ جاتقان باعىتتاماداعى سۋرەتتەرگە قاتىستى تۇسىنىك بەرگەن بولاتىن. مينيسترلىكتىڭ رەسمي وكىلى الماس سادۋبايەۆ بۇل سۋرەتتەردە اقتوبەدەگى تەراكتىگە قاتىسى بارلاردىڭ تىزىلگەنىن راستاعان ەدى.
كەيىن اقتوبەدە قىلمىس جاسادى دەلىنگەن كۇدىكتىلەردىڭ باعىتتامالارى تارالدى. وندا جەتى ادام بولدى.
ەسكە سالايىق، بيىل 5- ماۋسىمدا اقتوبەدە تەراكت بولعان ەدى، ونىڭ سالدارىنان ونداعان ادام قازا تاپتى. قازاقستاندا تەررورلىق قاۋىپتىڭ سارى دەڭگەيى، ال اقتوبەدە قىزىل دەڭگەيى ەنگىزىلدى. شابۋىل جاساعان 13 ادام ءولتىرىلدى، تاعى تورتەۋى جارالاندى، ەندى التى ادام ىزدەۋدە ءجۇر.
