جالعا بەرىلەتىن باسپانانىڭ ەرەجەلەرى قانداي؟
بۇگىن ماجىلىستە «نۇرلى جول» باعدارلاماسىن ىسكە اسىرۋ شەڭبەرىندە جالعا بەرىلەتىن تۇرعىن ءۇي قۇرىلىسىنىڭ بارىسى مەن تۇرعىن ءۇي ينفراقۇرىلىمىن نىعايتۋ شارالارى تاقىرىبىنداعى دوڭگەلەك ۇستەلدە «بايتەرەك» ۇلتتىق باسقارۋشى حولدينگى» ا ق باسقارما ءتوراعاسىنىڭ ورىنباسارى لياززات يبراگيموۆا وسى ماسەلەنى ءتۇسىندىردى.
بايانداما بارىسىندا ل. يبراگيموۆا جالعا بەرىلەتىن تۇرعىن ۇيلەردىڭ ەرەجەلەرىنە توقتالىپ ءوتتى. «جالعا الۋدىڭ ەكى ساناتى قاراستىرىلعان: ءبىرىنشى - ساتىپ الىناتىن جالعا بەرىلەتىن باسپانا، ەكىنشى - ساتىپ الۋ قۇقىعىنسىز جالعا الۋ. ەكىنشى ساناتتاعىلار باسپانانى ساتىپ الا المايدى. ال ساتىپ الۋعا بولاتىن باسپانانى جالعا الۋدىڭ مەرزىمى 20 جىلعا دەيىن بەلگىلەنەدى، باستاپقى جارنا تولەمدەرىن ەنگىزۋدىڭ قاجەتى جوق. مەرزىمىنەن بۇرىن ساتىپ الۋ شارتتارى دا قاراستىرىلعان.
مەرزىمىنەن بۇرىن ساتىپ الۋدى تەك 5 جىلدان سوڭ عانا جۇزەگە اسىرۋعا بولادى. سونىمەن قاتار، مۇلىكتى ۇستاۋعا قاتىستى تولەمدەر، سونىڭ ىشىندە مۇلىك سالىعى، كوممۋنالدىق جانە باسقا دا شىعىستار جالعا الۋشى ەسەبىنەن تولەنەدى»، - دەدى ل. يبراگيموۆا.
ونىڭ ايتۋىنشا، وتكەن جىلى وسى ساناتتاعىلار تاراپىنان ءۇش ايدا ءبىر رەت مۇلىك سالىعىنىڭ تولەنگەنى تۋرالى شاعىمدار كوپ بولعان. وسىعان وراي، زاڭناماعا وزگەرىستەر ەنگىزىلىپ، بۇل سالىق ون ەسەگە تومەندەتىلگەن. ساتىپ الىناتىن جالعا بەرىلەتىن باسپانانىڭ جالپى اۋماعى 80 شارشى مەتردەن اسپاۋى كەرەك. ونى قايتا جالعا بەرۋگە، ساتۋعا، سىيلاۋعا تىيىم سالىنادى.
«2 بولمەلى پاتەردى مىسال رەتىندە الايىق. ەگەر ءسىز ساتىپ الىناتىن جالعا بەرىلەتىن باسپاناعا يە بولساڭىز، استانا مەن الماتى قالالاردىڭ نارىعىندا بۇنداي ۇيلەردىڭ شارشى مەترىنىڭ جالعا بەرۋ باعاسى 1120 تەڭگە بولسا، وندا ءبىزدىڭ جالعا الۋشى 80 شارشى مەتردى قۇرايتىن ەكى بولمەلى پاتەرى ءۇشىن شامامەن ايىنا 56 مىڭ تەڭگە تولەيدى. باسقا وڭىرلەر ءۇشىن ارينە تولەمدەر سايكەسىنشە ارزانداۋ كەلەدى»، - دەيدى «بايتەرەك» حولدينگىنىڭ وكىلى.
ونىڭ ايتۋىنشا، ەكىنشى ساناتتاعى، ياعني ساتىپ الۋ قۇقىعىنسىز جالعا الىناتىن باسپانالار نەگىزىنەن ساتىپ الىناتىن جالعا بەرىلەتىن باسپاناعا تولەۋ قابىلەتى تومەن ازاماتتارعا ارنالادى. «بۇلاردىڭ اي سايىن تولەيتىن تولەمدەرى دە ەكى ەسەگە از بولادى، ماسەلەن استانا مەن الماتى قالالارىندا بۇل شامامەن 28 مىڭ تەڭگە بولادى. ساتىپ الۋ قۇقىعىنسىز جالعا الىناتىن باسپانانىڭ مەرزىمى 10 جىلعا دەيىن، ونى كەيىننەن تاعى دا 5 جىلعا ۇزارتۋ شارتتارى كورسەتىلەدى. ەڭ باستىسى بۇل باسپانالار نەگىزىنەن وزدەرى ءۇي ساتىپ الۋعا مۇمكىندىگى تومەن ازاماتتارعا بەرىلەدى»، - دەدى ل. يبراگيموۆا.
اۆتور: قانات مامەتقازى ۇلى
