لاڭكەستەرگە قايمىقپاي، قارسى تۇرعان ب. قاليەۆتى جەرلەستەرى قادىر تۇتادى
قاپيادا مەرت بولعان باتىس قازاقستان وبلىسىنىڭ جانىبەك اۋدانىندا تۋىپ- وسكەن 37 جاستاعى ب. قاليەۆ 8 - ماۋسىم كۇنى جاقسىباي اۋىلىندا جەرلەنىپ، وعان وبلىس اكىمى التاي كولگىنوۆ باستاعان ءوڭىر جۇرتشىلىعى قاتىستى.
«بۇل قايعىلى جاعدايدى ەستىگەندە، ءبارىمىزدىڭ قابىرعامىز قايىستى. بۇگىنگى تاڭدا بۇكىل ەل قايعىرىپ وتىر. قيماس ازاماتتان ايىرىلىپ تۇرمىز. باۋىرجان مومىش ۇلى «وتان ءۇشىن وتقا ءتۇس، كۇيمەيسىڭ» دەگەن ەكەن. بەرىكجان ءسىز بەن ءبىزدىڭ تىنىشتىعىمىز ءۇشىن، تاۋەلسىزدىگىمىز ءۇشىن جانىن پيدا قىلدى. باتىر ازاماتتىڭ، ونى ومىرگە الىپ كەلگەن اتا- اناسىنىڭ، تۋما- تۋىستارىنىڭ، وسى ەلدىڭ الدىندا باسىمىزدى يەمىز. ول ۇرپاققا ۇران بولاتىن ەرلىك كورسەتتى. ەل مەن ەر - ەگىز ۇعىم. ەل باتىرلاردى تاربيەلەيدى. سىن ساعاتى تۋعان كەزدە باتىرلار ەلىن قورعايدى. ەلگە قاۋىپ تونگەن ساتتە بەرىكجان ەرلان ۇلى قايسارلىق تانىتىپ، وتانىن قورعاۋ جولىندا جانىن قيدى. ارينە، بارلىق قيىندىقتى ەل كوتەرەدى. ءبىراق، كىنالى ادامدار جازاسىن تارتادى. ول ءۇشىن مەملەكەت، زاڭ بار. مۇنداي قيىن جاعدايدا بىرلىگىمىزدى، ىنتىماعىمىزدى كورسەتۋىمىز قاجەت. سابىرلىلىق تانىتايىق. ەلباسىمىز قازا تاپقان ازاماتتاردىڭ وتباسىلارى نازاردان تىس قالماسىن دەپ ارنايى تاپسىرما بەردى. سوعان سايكەس بەرىكجان قاليەۆتىڭ شاڭىراعى مەن ۇل- قىزدارىنا كومەگىمىزدى كورسەتەمىز»، - دەدى اكىم.
قارالى راسىمگە اقتوبەدەن ارنايى كەلگەن ق ر ۇلتتىق ۇلانىنا قاراستى 6655-اسكەري ءبولىم كومانديرىنىڭ تاربيە جانە الەۋمەتتىك- قۇقىقتىق جۇمىستار جونىندەگى ورىنباسارى، مايور باقبەرگەن انەشيەۆتىڭ ايتۋىنشا، اسكەري بولىمگە شابۋىل جاساعان قارۋلى توپتىڭ ماقساتى قارۋ- جاراق قويماسىنا ەنۋ بولاتىن. اسكەري ءبولىمنىڭ قاراۋىلى قاسكويلەرگە تويتارىس بەرىپ، ولاردىڭ كوزدەگەن ماقساتىنا جەتۋىنە كەدەرگى بولدى. ءۇش قىزمەتكەر سول جەردە ەرلىكپەن قازا تاپتى. سونىڭ ءبىرى اتقىشتار باتالونىندا اسكەري قىزمەت اتقارعان كىشى سەرجانت بەرىكجان قاليەۆ ەدى. قازىرگى تاڭدا ۇلتتىق ۇلان قولباسشىلىعى تاراپىنان قازا تاپقاندار وتباسىنا ماتەريالدىق جاردەم كورسەتىلۋدە. سونىمەن قاتار ولار مەملەكەتتىك ماراپاتتارعا ۇسىنىلماقشى.
اۋىلداستارىنىڭ سوزىنە قاراعاندا، بەرىكجان كوپ بالالى وتباسىندا ءوستى. اكەسى ەرلان ومىردەن ەرتە كەتكەنىمەن، اناسى گۇلجيان بارىنە قامقورشى بولا ءبىلدى. بەرىكجاننىڭ ءوزى دە جان جارى نۇرسۇلۋمەن بىرگە ەكى ۇل، قوس قىزىن قاتارىنان كەم قىلماي، تاربيەلەپ كەلە جاتقان- دى. امال نە، عۇمىرى قىسقا بولدى ەسىل ەردىڭ.
ب. قاليەۆتىڭ سىنىپ جەتەكشىسى، زەينەتكەر- ۇستاز باقىتجان ەلەۋسىنوۆانىڭ ءمالىم ەتكەنىندەي، بەرىكجان كىشكەنتاي كەزىنەن وتە جيناقى، ءتارتىپتى، ۇقىپتى بالا بولدى. سپورتقا جانى قۇمار ەدى. كۇرەس جانە ۆولەيبولمەن شۇعىلداندى. «ەلباسىمىز اقتوبەدەگى لاڭكەستەر ارەكەتىنە ءتيىستى باعاسىن بەرىپ، ۇلتتىق ازا تۇتۋ كۇنىن جاريالاپ، ەندى ءبىز قىرشىن كەتكەن ازاماتتارىمىزدى ەسكە الۋدامىز. سولاردىڭ ىشىندە بەرىكجانىمىز دا اسكەري بورىشىن وتەۋ كەزىندە قىلمىسكەرلەرگە قاسقايىپ قارسى تۇرىپ، ەرلىكپەن قازا تاپتى. سوڭىندا قالعان ۇل- قىزدارى ءوسىپ- جەتىلسىن. جان جارى، اعايىن- تۋمالارى امان بولسىن. ۇرپاقتارى اكەسى سياقتى ەلىن سۇيگىش، پاتريوت ازامات بولىپ ءوسسىن. وسىنداي قازاعىمنىڭ باتىر ۇلدارى باردا ەلىمىزدى ەشبىر جاۋ الا المايدى. ەڭ باستىسى، بىرلىگىمىز بەن ەلدىگىمىزگە بەكەم بولايىق» ، - دەدى ب. ەلەۋسىنوۆا.
جانىبەك اۋدانىنىڭ اكىمى ناۋرىزباي قاراعويشيننىڭ ويىنشا، بەرىكجاننىڭ بەيبىت ومىردەگى ەرلىگى جەتكىنشەك ۇرپاققا ۇلگى- ونەگە بولارى حاق. ونىڭ باتىرلىعىن دارىپتەۋ ارقىلى جەتكىنشەك ۇرپاقتى ەلجاندىلىققا تاربيەلەۋ باعىتىندا اۋدانداعى ءبىلىم وردالارىندا سىنىپ ساعاتتارى ۇيىمداستىرىلادى، باسقا دا شارالار قولعا الىنادى. ەردىڭ ەسىمىن ماڭگى ەل ەسىندە قالدىرۋ - كەيىنگىلەرگە پارىز. تاۋەلسىز ەلىمىزدىڭ تىنىشتىعىن ساقتاۋ باعىتىندا ناقتى ءىس- شارالار جالعاسا بەرەتىن بولادى.
اۆتور: ەلجان ەرالى
