قارالى كۇنگە بايلانىستى «استانا وپەرا» ەرتەڭگى كونسەرتىن باسقا كۇنگە اۋىستىرادى
تەاتر ديرەكسياسى اقتوبەدەگى لانكەستىك ارەكەت سالدارىنان قازا بولعانداردىڭ وتباسىنا شىن جۇرەكتەن كوڭىل ايتادى.
«اسكەري قىزمەتكەرلەر باتىرلىق تانىتتى. قۇقىقتىق ءتارتىپ ورگاندارى قىزمەتكەرلەرى ومىرلەرىن قيىپ، لاڭكەستەر ارەكەتىنە توتەپ بەردى. ولاردىڭ كاسىپقويلىعىنا قۇرمەتپەن قارايمىز، ايبىندى دا، ەرجۇرەك ولار اقتوبە قالاسىنىڭ بەيبىت تۇرعىندارىن قورعادى»، - دەپ اتاپ ءوتتى ونەر ۇجىمى.
رەپەرتۋارلىق جوسپارعا سايكەس، «ماحاببات گۇلى» كونسەرتى 9 -ماۋسىمدا كامەرالىق زالدا ساعات 19:00 دە ءوتۋى ءتيىس ەدى، ەندى ول 11 -ماۋسىمعا ساعات 18:00 گە اۋىستىرىلدى (سەنبى).
كونسەرتكە قاتىسۋشىلار - ليريكالىق- كولوراتۋرالىق سوپرانو يەسى، قازاقستاننىڭ ەڭبەك سىڭىرگەن ءارتىسى عاليا بايعازينوۆا، جارقىراعان جاس باريتون ازات مالىك، دارىندى سكريپكاشى شىنار بارلىقوۆا، «استانا وپەرا» بالالار بالەت ستۋدياسىنىڭ وقۋشىلارى.
كەشتە پ. چايكوۆسكي، س. راحمانينوۆ، ن. ريمسكي- كورساكوۆ، ر. شۋمان، د. ۆولف، گ. فورە، د. بۋدەي، ن. ۆيەتتي، ل. دەليبتىڭ تانىمال رومانستارى مەن اسپاپتى شىعارمالارى، سونداي- اق ي. شتراۋس، ش. لەكوك، ف. لەگار، ن. دوستال، د. وبەر جانە باسقالارىنىڭ وپەرەتتالارىنان اريالار ورىندالادى.
فورتەپيانو پارتياسىندا - حالىقارالىق بايقاۋلاردىڭ لاۋرەاتى راۋشان بەسكەمپىروۆا، كونسەرتتى جۇرگىزەتىن - «مادەنيەت قايراتكەرى» مارجان جاكەنوۆا.
