الماتىدا جاپوندىق كومپانيا كوپ دەڭگەيلىك پاركينگتەر جاساۋ بويىنشا جوبانى جۇزەگە اسىرماق نيەتتە

الماتى. قازاقپارات - الماتى قالاسى اكىمدىگىنىڭ دەلەگاتسياسى جوعارى دەڭگەيدە دامىعان قوعامدىق كولىك جۇيەسىن، جول قوزعالىسىن باسقارۋ جانە توتەنشە جاعدايلاردىڭ الدىن الۋ جۇيەسىن زەرتتەپ، يگەرۋ ماقساتىندا توكيو قالاسىنا باردى.

بۇل تۋرالى بۇگىن الماتى قالاسىنىڭ ينۆەستورلارعا قىزمەت كورسەتۋ ورتالىعى ءمالىم ەتتى.

ءىس-ساپار بارىسىندا قازاقستاندىق دەلەگاتسيا توكيو قالاسىنىڭ پوليتسيا دەپارتامەنتىنىڭ جول قوزعالىسىن باسقارۋ ورتالىعىندا بولدى. ونداعى ماقسات - ءوزارا تاجىريبە الماسۋ جانە الماتى قالاسىندا دا وسىنداي ورتالىق قۇرۋ.

ودان باسقا، تاراپتار قوعامدىق كولىك سالاسىنداعى ىنتىماقتاستىقتى نىعايتۋ مۇمكىندىكتەرىن تالقىلادى.

ايتا كەتەلىك، الماتى اكىمدىگىنىڭ دەلەگاتسياسى جاپوندىق بيزنەس- قاۋىمداستىقتىققا وزدەرىنىڭ باسىمدىققا يە ينۆەستيتسيالىق جوبالارىن تانىستىردى. سولاردىڭ ىشىندە الماتىدا جەڭىلرەلستىك كولىك جۇيەسى جايلى اڭگىمەلەدى.

ودان باسقا، قازاقستاندىق تاراپ بيزنەسكە مەملەكەتتىك قولداۋ كورسەتۋ جۇيەسىنە جانە شەتەلدىك ينۆەستورلارعا بەرىلەتىن جەڭىلدىكتەرگە جان- جاقتى توقتالدى.

كەزدەسۋ بارىسىندا ءىرى جاپوندىق كومپانيالار بۇل جوبالارعا قىزىعۋشىلىعىن ءبىلدىرىپ، ۇزاق مەرزىمدى ىنتىماقتاستىققا دايىن ەكەندىكتەرىن ايتتى.

مىسالى، NH Parking System Co.LTD كومپانياسى الماتى قالاسىندا اۆتوماتتاندىرىلعان كوپدەڭگەيلى پاركينگ جاساۋ بىرلەسكەن جوباسىن ۇسىندى. بۇل جوبانى جۇزەگە اسىرۋ قوعامدىق ورىندار مەن تۇرعىن ۇيلەر ماڭىنا اۆتوكولىك قويۋ ماسەلەسىن شەشۋگە سەپتىگىن تيگىزەدى.

ودان باسقا، جاپوندىق «Tokio Ropە» كومپانياسى الماتىدا تەمىر تور ءوندىرىسى جەلىسىن قولعا الماق نيەتتە.

«Tokio Ropە» - سەيسميكالىق قۇرىلىمداردى نىعايتۋعا ارنالعان مەتالل تورلاردى وندىرەتىن الەمدەگى كوشباسشى كومپانيا.

ول سونىمەن قاتار، جوعارى تەحنولوگيالىق بولات ارقاندار، كوپىرلەرگە ارنالعان تەمىر ارقاندار جانە كۇن ەنەرگەتيكاسى ءۇشىن سىمدار جاسايدى.

اۆتور: ايبوتا جاپپاربەرگەن