الماتىدا بالالار جازۋشىلارى اراسىندا «دارابوز» بايقاۋىنىڭ جەڭىمپازدارى بەلگىلى بولدى - فوتو
قازىلار القاسىنىڭ تاڭداۋى بويىنشا بايقاۋدىڭ گران- پري جۇلدەسى مەن 1 ميلليون تەڭگە سىياقىسىن جازۋشى سالىقباي ابىلدابەك جەڭىپ الدى. ءبىرىنشى ورىن جانە 700 مىڭ تەڭگە نۇربەك نۇرجانعا بۇيىردى. ەكىنشى ورىن العان جازۋشى اقىلبەك شاياحمەتكە 500 مىڭ تەڭگە تابىس ەتىلدى. ءۇشىنشى ورىن العان ماركيزا بازارباي قىزى 300 مىڭ تەڭگەنى يەلەندى.
سونىمەن قاتار، قازىلار القاسى قاتىسۋشىلاردىڭ ءبىرى - جازۋشى قاستەي بايانباي ۇلىن «بالالار ادەبيەتىن دامىتۋعا سىڭىرگەن ەڭبەگى ءۇشىن» دەپ اتالاتىن ارنايى جۇلدەسىمەن ماراپاتتادى.
بايقاۋدىڭ جالپى جۇلدە قورى - 2750000 تەڭگە.
«دارابوز» بايقاۋىن ءبىز بۇدان 11 جىل بۇرىن باستاپ ەدىك. ونى جۇزەگە اسىرۋعا جازۋشى شاكەن كۇمىسبايەۆ وراسان زور ۇلەس قوستى. 11 جىل ىشىندە بايقاۋعا قاتىسۋعا 4500 عا جۋىق وتىنىمدەر كەلىپ ءتۇسىپتى. مەن بۇل جەردە بالالار ءۇشىن ەڭبەك ەتىپ جاتقان قاتىسۋشىلارىمىزعا شەكسىز العىسىمدى بىلدىرەمىن. ءبىزدىڭ جەتىستىكتەرىمىز ءبىر جاعىنان جاقسى جازىلعان كىتاپتاردى وقىعانىمىزعا بايلانىستى. سوندىقتان، سىزدەردىڭ ەڭبەكتەرىڭىز وتە ماڭىزدى ەڭبەكتەر. بالالار جانە بالالار ادەبيەتى - بۇل ەلىمىزدىڭ بولاشاعى»، - دەدى ءوز سوزىندە مەسەنات باۋىرجان وسپانوۆ.
ەستەرىڭىزگە سالا كەتەلىك، بايقاۋدىڭ ماقساتى - قازاقستاندا بالالار ادەبيەتىن دامىتۋ جانە ونى ناسيحاتتاۋ.
ول بيىل كەزەكتى رەت 20 -ساۋىردە باستالدى.
ءاربىر قاتىسۋشى «دارابوز» سايتىنىڭ ارناۋلى پاراقشاسىنا 20 -مامىرعا دەيىن تىركەلىپ، ءوز شىعارماسىن جىبەردى. بايقاۋعا بيىل 300 گە جۋىق قازاق تىلىندەگى ەڭبەكتەر قابىلداندى.
ۇزدىكتەردى قازىلار القاسى داۋىس بەرۋ ارقىلى تاڭدادى.
ادەبي جۇمىستاردى سارالاۋ بارىسىندا اۆتور ەڭبەگىنىڭ ادەبي- كوركەمدىك ەرەكشەلىگى، مازمۇنى، جازىلۋ ءستيلى جانە ادەپتى جازىلعاندىعى قاتاڭ قاداعالاندى.
ايتا كەتەلىك، ق ر ۇلتتىق مەملەكەتتىك كىتاپ پالاتاسىنىڭ مالىمەتى بويىنشا، قازاقستاندا بۇگىنگى تاڭدا 1335 مەملەكەتتىك جانە جەكە باسپاحانالار بار. ءبىراق، بالالار ادەبيەتىنە ارنايى مامانداندىرىلعاندارى شامالى. سوڭعى 11 جىل ىشىندە ەلىمىزدە 8523 كوركەم شىعارما جارىق كورسە، سولاردىڭ ىشىندە تەك 220 شىعارما عانا قازاق تىلىندەگى بالالار ادەبيەتىنە ارنالعان.
