ەلدىڭ امان، جۇرتتىڭ تىنىش بولۋى ءۇشىن ەلباسى مالىمدەمەسىنىڭ ماڭىزى وتە زور - س. ابدراحمانوۆ
بۇل تۋرالى ق ر پارلامەنتى ءماجىلىسىنىڭ دەپۋتاتى ساۋىتبەك ابدراحمانوۆ ءمالىم ەتتى.
«بۇگىن ەلباسى نۇرسۇلتان نازاربايەۆ ەرەكشە ماڭىزدى مالىمدەمە جاسادى. بۇل مالىمدەمەدە اقتوبەدە ورىن العان قاندى وقيعاعا باعا بەرىلگەن. ەلدەگى جاعداي، ونىڭ ىشىندە اقتوبەدەگى احۋال مەملەكەتتىڭ تولىق باقىلاۋىندا ەكەندىگى ايتىلعان. قانىشەرلەردىڭ تولىق قولعا تۇسەتىنى جانە زاڭنىڭ تالابى بويىنشا جازاسىن الاتىندىعى مالىمدەلگەن، سونىمەن بىرگە پرەزيدەنت ءوز سوزىندە ەلدىڭ حالقى وسىنداي كۇندەردە ىنتىماقشىل بولۋعا، اۋىزبىرلىكشىل بولۋعا، ءوزىنىڭ الداعى كۇندەرگە ۇمتىلعان اسقاق مۇرات ۇستانعان ەل ەكەنىن كورسەتۋگە ءتيىس ەكەندىگىن قاداپ ايتتى»، - دەپ توقتالدى س. ابدراحمانوۆ.
«مۇنىمەن قوسا، مەملەكەتتىڭ تاعدىرىنا، تامىرىنا بالتا شابۋعا تىرىساتىن ادامداردىڭ قىلمىسى ەڭ اۋىر جازاعا لايىق دەپ ايتىلعان. اتاپ ايتقاندا، ءولىم جازاسىنا كەسىلۋى مۇمكىن ەكەندىگى ايتىلدى. بۇل مالىمدەمەنىڭ ماڭىزى وتە جوعارى، ويتكەنى قازاقستاندا كوپتەگەن جىلدان بەرى ءولىم جازاسىنا موراتوري جاريالانعان. ارينە، تىنىش كۇندە، ەل جايما-شۋاق ءومىر ءسۇرىپ جاتقان كەزەڭدە ول ورىندى دەپ ويلايمىز، ءبىراق مىنانداي ەلدىڭ بىرلىگىنە، مەملەكەتتىڭ ۇيىسقان تىرلىگىنە قاندى قولىن سالعان ادامدارعا ەشقانداي كەشىرىم بولماۋى كەرەك. ويتكەنى، ادام نە ىستەگەندە دە ءوزىنىڭ ولمەيتىنىن، قالاي دا ءتىرى قالاتىنىن بىلگەن كەزدە، ول ەشتەڭەدەن تايىنباۋى مۇمكىن. ءبىراق، ءوزىنىڭ قىلمىسى ءۇشىن ەڭ اۋىر جازاعا تارتىلۋى، ءومىرى قيىلۋى مۇمكىن دەگەندى ويلاعان كەزدە، قىلمىسكەرلەر كەيبىر قادامداردان تارتىنۋى ىقتيمال»، - دەيدى ول.
وسى ورايدا دەپۋتات بۇنداي قىلمىسقا قارسى قاتاڭ ءتارتىپ كەرەك ەكەنىن جەتكىزدى.
«سوندىقتان ەلدىڭ امان، جۇرتتىڭ تىنىش بولۋى ءۇشىن وسى مالىمدەمەنىڭ ماڭىزى وتە زور. ەرتەڭ، 9 -ماۋسىم كۇنى ەلدە ۇلتتىق ازا تۇتۋ كۇنى دەپ جاريالانىپ وتىر. ول كۇنى بۇكىل حالقىمىز كەشەگى بوزداقتاردى قايعىرا ەسكە سالاتىن بولادى، ويىن- ساۋىق شارالارىنان باس تارتىپ، ەلدىڭ بىرلىگى مەن بولاشاعى تۋرالى تەرەڭ- تەرەڭ ويلار ايتىلاتىن بولادى»، - دەدى س. ابدراحمانوۆ.
اۆتور: رۋسلان عابباسوۆ
