ءداستۇرلى يسلامعا قاتىسى جوق اعىمدار تىنىشتىعىمىزدى بۇزدى - س. گەرويەۆ
استانا قالاسىنداعى «ۆايناح» شەشەن- ينگۋش ەتنومادەني ورتالىعى قوعامدىق بىرلەستىگىنىڭ جەتەكشىسى سالمان گەرويەۆ ازا تۇتۋ كۇنىندە قازاقستاندىقتار ەرلىكپەن قازا تاپقان باتىرلارىن جوقتايدى دەيدى.
«اقتوبەدە بولعان وقيعا بۇكىل حالىقتى الاڭداتىپ وتىر. تاۋەلسىزدىك العاننان بەرى بەيبىت تە تىنىش ومىردەن باسقانى كورمەگەن قازاقستاندىقتار ءباز- بىرەۋلەردىڭ كەلىپ، نەشە جىلعى قازىنامىز - بەيبىتشىلىگىمىزدى بۇزعانىن قابىلداي المايدى. ءداستۇرلى يسلامعا ءۇش قايناسا دا سورپاسى قوسىلمايتىن ءدىني اعىمنىڭ وكىلدەرى ءبىزدىڭ تىنىشتىعىمىزدى بۇزدى. سوندىقتان، ناعىز مۇسىلماننىڭ ەشبىرى دە مۇنداي جاعدايدى قابىلداي المايدى. اسىل ءدىنىمىز يسلام ادامعا زورلىق- زومبىلىق كورسەتۋگە تىيىم سالعان. ءتىپتى، بۇكىل تىرشىلىك يەسىنە قيانات جاساۋعا رۇقسات جوق. ال، بەيبىت حالىقتى ءولتىرۋ - يسلامداعى اۋىر جازالاردىڭ ءبىرى. اللا تاعالا بەرگەن جاندى اللا عانا الادى»، - دەيدى اۋىر كۇرسىنگەن س. گەرويەۆ.
ونىڭ ايتۋىنشا، ەتنومادەني ۇيىمدار بۇرىنعىداي ءبىر شاڭىراقتىڭ استىندا بىرلىك پەن ىنتىماعىن ساقتاي بەرمەك. جانە س. گەرويەۆ جالپىۇلتتىق ازا تۇتۋ كۇنىندە قازاقستاندىقتار ەرلىكپەن قازا تاپقان باتىرلارىن جوقتايدى، دەدى.
«قازا تاپقانداردىڭ جاقىندارىنا ءبىز دە قايعىرىپ كوڭىل ايتامىز. جالپىۇلتتىق ازا تۇتۋ كۇنىندە بۇكىل قازاقستاندىقتار ەرلىكپەن قازا تاپقان باتىرلارىمىزدى جوقتاپ، جاقىندارىنا كوڭىل ايتادى»، - دەدى س. گەرويەۆ.
اۆتور: كەنجەكەي توقتامۇرات قىزى
