م. قۇل- مۇحاممەد اقتوبەدە «نۇرلى جول» باعدارلاماسى اياسىنداعى جوبالاردىڭ جۇزەگە اسىرىلۋ بارىسىمەن تانىستى - فوتو

استانا. قازاقپارات - «نۇر وتان» پارتياسى ءتوراعاسى ءبىرىنشى ورىنباسارىنىڭ اقتوبە وبلىسىنا جاساعان جۇمىس ساپارى اياقتالدى.

ونىڭ قورىتىندى بولىمىندە مۇحتار قۇل- مۇحاممەد «نۇرلى جول» جانە يندۋستريالدىق- يننوۆاتسيالىق باعدارلامالار اياسىنداعى جوبالاردىڭ جۇزەگە اسىرىلۋ بارىسىمەن تانىستى.

بۇل تۋرالى «نۇر وتان» پارتياسىنىڭ باسپا ءسوز قىزمەتى حابارلادى.

1- قىركۇيەكتە اقتوبە قالاسىندا 320 ورىندىق جاڭا مەكتەپ اشىلادى. اتالعان ءبىلىم ورداسى «نۇرلى جول» پرەزيدەنتتىك باعدارلاماسى بويىنشا سالىنۋدا. بۇل باعدارلاما اياسىندا 5000 شاقىرىمدىق اۆتوكولىك جولدارى مەن 2500 شاقىرىم تەمىر جول ماگيسترالىن سالۋدان بولەك، الەۋمەتتىك سالانى جاڭعىرتۋ دا قاراستىرىلعان.

مۇحتار قۇل- مۇحاممەد ينفراقۇرىلىمدى دامۋدىڭ كەڭ اۋقىمدى باعدارلامالارىن جۇزەگە اسىرۋ ساپاسىن «نۇر وتان» پارتياسى ايرىقشا قاداعالايتىنىن اتاپ ءوتتى.

«ءبىز ءار تەڭگەنىڭ ءتيىمدى ءارى حالىقتىڭ يگىلىگىنە جۇمسالعانىن ءجىتى باقىلايتىن بولامىز»، - دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى.

«نۇرلى جول» باعدارلاماسى قازاقستاننىڭ يندۋستريالدىق- يننوۆاتسيالىق سەكتورىنا دا وڭ اسەرىن تيگىزۋدە. مىسالى، اقتوبەدە زاماناۋي رەلسارقالىق زاۋىتى ىسكە قوسىلدى. ونىڭ بارلىق ءونىمى جاڭا تەمىر جولدار قۇرىلىسىنا پايدالانىلۋدا.

كاسىپورىن ديرەكتورى اندرەي كۋزمين مۇحتار قۇل- مۇحاممەدكە جاڭا جوبا بويىنشا 750 ادامنىڭ جۇمىسپەن قامتىلعانىن ايتىپ بەردى. بيىل 100 مىڭ توننا ءونىم وندىرىلمەك. زاۋىتتىڭ جوبالىق قۋاتى بۇدان ءتورت ەسەگە كوپ ەكەنىن اتاپ وتكەن ءجون.

زاۋىتتىڭ ەڭبەك ۇجىمىمەن كەزدەسۋ بارىسىندا مۇحتار قۇل- مۇحاممەد جاڭا وندىرىستىك الپاۋىتتىڭ تەك ىشكى نارىقتى عانا ەسەپكە الماي، ەكسپورتتى دا ماقسات تۇتۋ كەرەكتىگىنە نازار اۋداردى.

«ءبىز ءۇشىن ەۋرازيالىق ەكونوميكالىق وداققا جول اشىق. سونداي-اق، ءبىز د س ۇ- عا مۇشەمىز. بۇل ەلىمىزدەگى اقتوبە رەلسارقالىق زاۋىتى سىندى كاسىپورىندارعا اسا زور مۇمكىندىك بەرەدى»، - دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى.