ۇكىمەت بيۋدجەتكە قاتىستى جاۋاپكەرشىلىكتى ارتتىرۋ ءۇشىن بيۋدجەت كودەكسىنە وزگەرىستەر ەنگىزۋدى قاراستىرىپ جاتىر - ب. ساعىنتايەۆ
ۇكىمەت باسشىسىنىڭ ورىنباسارى دەپۋتاتتار ساۋالىنا جاۋاپ بەرە كەلە، ءتيىمسىز پايدالانىلعان قاراجاتتار ماسەلەسىنە دە توقتالدى. « ء بىز بىلتىردان باستاپ جاڭا جۇيەمەن جۇمىس ىستەپ كەلەمىز. ءتيىمسىز پايدالانىلدى دەلىنەتىن 232 ميلليارد تەڭگەگە كەلسەك، ول نەگىزىنەن مەملەكەتتىك ورگانداردىڭ شوتتارىندا قالعان قالدىقتار، كەيىن قايتارىلعان كرەديتتەر مەن ترانسفەرتتەردى قۇرايدى. ال ەسەپ كوميتەتىنىڭ كورسەتكەن سوماسىنا كەلسەك، ولار 232 ميلليارد تەڭگەگە قوسا، تەكسەرۋ كوميسسيالارىنىڭ انىقتاعان بۇزۋشىلىقتارىن دا قوسىپ وتىر. ءبىز ونىمەن كەلىسەمىز»، - دەدى ب. ساعىنتايەۆ.
ۇكىمەت باسشىسىنىڭ ورىنباسارى بيۋدجەتتى اتقارۋداعى جاۋاپكەرشىلىككە توقتالا كەلە، بىلتىرعى جىلى 53 جاۋاپتى تۇلعا تارتىپتىك جاۋاپكەرشىلىككە تارتىلعانىن اتاپ ءوتتى. ونىڭ ايتۋىنشا، بيىل مەملەكەتتىك اۋديت قۇرىلعان. بۇل دا قارجىلىق بۇزۋشىلىقتاردىڭ تومەندەۋىنە سەپتىگىن تيگىزەتىن بولادى. «ءبىز بيۋدجەتكە قاتىستى جاۋاپكەرشىلىكتى ارتتىرۋ ماقساتىندا بيۋدجەتتىك كودەكسكە وزگەرىستەر ەنگىزبەكشىمىز. ول بويىنشا جۇمىس توبى قۇرىلدى. ءبىز الداعى ۋاقىتتا زاڭ جوباسىن پارلامەنتكە ۇسىناتىن بولامىز»، - دەدى ب. ساعىنتايەۆ.
اۆتور: قانات مامەتقازى ۇلى
