اقتوبە وبلىسىندا قاندى وقيعاعا قاتىستى تاعى ءبىر قىلمىسكەر ۇستالدى - ق ر ءى ءى م
بۇل تۋرالى قازاقپارات اگەنتتىگىنە ق ر ءى ءى م مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ حابارلادى.
«قۇقىق قورعاۋ جانە ارنايى ورگاندار قىلمىسكەرلەردى ۇستاۋ ءۇشىن، سونداي-اق اقتوبە قالاسىنىڭ اۋماعىندا قاۋىپسىزدىكتى قامتاماسىز ەتۋ ءۇشىن كەشەندى شارالار قابىلداۋدا. بۇگىن تاڭعى ساعات التىدا قوبدا اۋدانىنداعى قوبدا كەنتىندە قاندى وقيعاعا قاتىسقان قىلمىسكەرلەردىڭ ءبىرى ۇستالدى. قالعان التى قىلمىسكەردى ىزدەستىرۋ جالعاسۋدا»، - دەدى ول.
بۇدان بۇرىن حابارلانعانداي، بەلسەندى قارۋلى قاقتىعىستاردىڭ بارىسىندا 13 قىلمىسكەردىڭ كوزى جويىلدى، 4 جاراقات العان بولاتىن. سونىمەن قاتار، 7- ماۋسىمداعى مالىمەت بويىنشا 7 قىلمىسكەر ىزدەستىرىلىپ جاتقاندىعى ايتىلعان ەدى.
اقتوبەدەگى قاندى وقيعا كەزىندە ازاماتتاردىڭ اراسىندا ۇشەۋى قازا بولسا، ەكەۋى جاراقاتتاندى. قىلمىسكەرلەردى قۇرىقتاۋ بارىسىندا 5 پوليتسەي جاراقات الدى. اسكەري قىزمەتشىلەر اراسىندا ۇشەۋى كوز جۇمىپ، التاۋى جاراقاتتانعان.
اۆتور: رۋسلان عابباسوۆ
