باپكەرلەر اشۋعا بەرىلگەن ۆلاديمير سەدوۆتى وليمپيادادان شەتتەتتى

استانا. قازاقپارات - اۋىر اتلەتيكادان قازاقستان قۇراماسىنىڭ باس باپكەرى الەكسەي ني زىلتەمىرشى ۆلاديمير سەدوۆتىڭ ارەكەتىنە قاتىستى تۇسىنىكتەمە بەردى.

ونىڭ ايتۋىنشا، وسى ارەكەتتەن كەيىن سەدوۆ ريو وليمپياداسىنان شەتتەتىلدى، دەپ حابارلايدى Baq.kz.

«ونىڭ جاعدايى ءبىر جىل بويى جينالا بەردى. وتكەن جىلى ول حيۋستون چەمپيوناتىنا بارا الماي، سپورتتىق مانسابىن اياقتاۋعا شەشىم قابىلدادى. ءبىز ونى كوماندادان الىپ تاستادىق. ال قاڭتار ايىندا وتەشەۆ پەن قىدىربايەۆتىڭ دوپينگىنەن كەيىن ول ءوز شەشىمىن وزگەرتتى. ول بىزگە حابارلاسىپ، ءبارىن پىسىقتاپ الدى. ءبىز كەلىسىم بەردىك. ەندى، ول مىقتى سپورتشى، ءبىز وعان دايىندىق جاساۋعا مۇمكىندىك بەردىك. ازيا چەمپيوناتىنا دايىندالدى. سوسىن ول جارىستان كەيىن بيىلعى قازاقستان چەمپيوناتىنا دايىندالىپ ۇلگەرمەيتىنىن ءتۇسىندى. مەن ونىڭ بۇگىنگى ارەكەتىن پسيحولوگيالىق پروبلەمامەن بايلانىستىراتىن ەدىم»، - دەدى الەكسەي ني Vesti.kz پورتالىنا بەرگەن سۇحباتىندا.

باس باپكەردىڭ ايتۋىنشا، وسى ارەكەتتەن كەيىن سەدوۆ ريو وليمپياداسىنان شەتتەتىلەدى.

«ول جامباستان جاراقات العان. ءبىز باپكەرلەرمەن كەڭەسىپ، يلين سياقتى دەمالسىن دەپ ويلايدىق. سوعان قاراماستان، بۇگىن كەلىپ، «شىققىم كەلەدى» دەپ ايتتى. مىنەكي، قالاي شىققانىن ءوزىڭىز كوردىڭىز. ونى ەشكىم ۇستاي المادى. بىزگە قاراعان دا جوق، بارىمىزگە ايقايلاپ وتە شىقتى. مەن ونى بۇرىننان بەرى بىلەمىن. ونداي ارەكەتتەرى بار. باسەكەلەستىككە شىداي الماعاندا ءبارىن كىنالاي باستايدى. ءبىز ونى وليمپيادا ويىندارىنان شەتتەتەمىز. وندايعا جول بەرۋگە بولمايدى. ءبىز ونى تاستاپ جاتقان جوقپىز. باسىلسىن. ەرتەڭ تاعى سويلەسەمىز. ءبىراق ول ريوعا بارمايدى»، - دەپ اتاپ كورسەتتى ني.

ايتا كەتەيىك، تالدىقورعاندا ۆلاديمير سەدوۆ ەكى دۇركىن وليمپيادا چەمپيونى يليا يليننىڭ قارسىلاسى - رەسەي فەدەراتسياسىنىڭ زىلتەمىرشىسى يۆانوۆ بەينەلەنگەن جەيدەنى كيىپ شىعىپ، شۋ شىعاردى.