بۇگىن استانادا شاڭحاي ىنتىماقتاستىق ۇيىمى ەلدەرى قورعانىس مينيسترلەرىنىڭ كەڭەسى وتەدى
قازاقستاننىڭ ەلورداسىنا شاڭحاي ىنتىماقتاستىق ۇيىمىنا مۇشە مەملەكەتتەردىڭ قورعانىس مينيسترلەرى كەلە باستادى. ش ى ۇ قاتىسۋشى ەلدەرى قورعانىس مينيسترلەرىنىڭ كەڭەسى شەڭبەرىندە استانادا ش ى ۇ مۇشە مەملەكەتتەرى اسكەري ۇرمەلى وركەسترلەرىنىڭ «بەيبىتشىلىك كەرنەيى» اتتى 3-حالىقارالىق فەستيۆالى وتەدى.
ش ى ۇ قاتىسۋشى ەلدەرى اسكەري مۋزىكانتتارىنىڭ فەستيۆالىنە قىرعىز رەسپۋبليكاسى، قىتاي حالىق رەسپۋبليكاسى، رەسەي فەدەراتسياسى، تاجىكستان رەسپۋبليكاسى مەن قازاقستان رەسپۋبليكاسى اسكەري وركەسترلەرىنىڭ جەكە قۇرامى قاتىسادى.
كەشە ساعات 20:00 دە استانانىڭ تورىندە ورىن تەپكەن «بايتەرەك» مونۋمەنتىنىڭ الاڭىندا بارلىق ونەر سۇيەر قاۋىم ش ى ۇ مۇشە مەملەكەتتەرى اسكەري وركەسترلەرىنىڭ جاندى داۋىستاعى ورىنداۋلارىنا قۇلاق قۇرىشتارىن قاندىردى. وندا پلاتس-كونسەرتى بار كونسەرتتىك ونەر كورسەتۋ ءوتتى. فەستيۆال 8- ماۋسىمدا «استانا وپەرا» مەملەكەتتىك وپەرا جانە بالەت تەاترىنىڭ الدىندا عالامات پلاتس-كونسەرتپەن اياقتالادى.
ق ر قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق اسكەري وركەستردىڭ مۋزىكانتتارى قازاقتىڭ ۇلتتىق ناقىشتاعى اۋەندەرىنە اسا ءمان بەرىپ، سازگەرلەرىمىزدىڭ ايگىلى مۋزىكالىق شىعارمالارى مەن قازاقتىڭ ۇلتتىق اندەرىنەن پوپۋرري ۇسىنعانىن ەستەرىڭىزگە سالا كەتەيىك.
