م. قۇل-مۇحاممەد پەن ب. ساپاربايەۆ ءوڭىردىڭ زيالى قاۋىمى جانە جاستار بىرلەستىكتەرى وكىلدەرىمەن كەزدەستى

استانا. قازاقپارات - «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد جانە اقتوبە وبلىسىنىڭ اكىمى بەردىبەك ساپاربايەۆ ءوڭىردىڭ زيالى قاۋىمى مەن جاستار بىرلەستىكتەرى وكىلدەرىمەن كەزدەستى.

بۇل تۋرالى «نۇر وتان» پارتياسىنىڭ باسپا ءسوز قىزمەتى حابارلادى.

ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ پروفەسسورلىق-وقىتۋشىلىق قۇرامىمەن كەزدەسۋ بارىسىندا قاسيەتتى رامازان ايىنىڭ قارساڭىندا ورىن العان قايعىلى وقيعا تۋراسىندا ءسوز بولدى. ءوز سوزىندە مۇحتار قۇل-مۇحاممەد مۇنداي قىلمىستاردىڭ الدىن الۋدىڭ ماڭىزدىلىعىن اتاپ ءوتتى.

«كۇنى كەشە عانا قاندىقول قاراقشىلار قولىنان قانشاما اقتوبەلىك وتان قورعاۋشى جاستاردىڭ قانى توگىلدى. مىنانداي بەيبىت زاماندا كىسى ءولتىرۋ وتە اۋىر ءارى كەشىرىلمەس قىلمىس. قىلمىسكەرلەر باسقا جاقتان كەلگەن جوق، ءوز ورتامىزدان شىقتى. ەندەشە ولاردىڭ تەرىس جولعا تۇسۋىنە تاربيە بەرە الماعان ءبىز دە كىنالىمىز. سوندىقتان ءبىز الداعى ۋاقىتتا وسىنداي قاندى وقيعالار بولماۋى ءۇشىن قولدان كەلگەننىڭ ءبارىن ىستەۋىمىز كەرەك»، - دەدى مۇحتار قۇل-مۇحاممەد.

كەزدەسۋگە 400 دەن اسا زيالى قاۋىم وكىلدەرى مەن قوعام قايراتكەرلەرى جانە ءوڭىر ستۋدەنتتەرى قاتىستى. ولاردىڭ اراسىندا اۋعان سوعىسىنىڭ ارداگەرى، «ەر باقىت» پاتريوتتىق سپورت كلۋبىنىڭ جەتەكشىسى مارات قويلىبايەۆ، ق ح ا مۇشەسى، وبلىستىق ءماسليحات دەپۋتاتى، ەكونوميكالىق كوللەدج ديرەكتورى سەرگەي ۆيشنياك، جەر تۋرالى زاڭنامانى ءتۇسىندىرۋ جونىندەگى وبلىستىق ءۇش جاقتى كوميسسيانىڭ مۇشەسى، «ازات وردا» قوزعالىسىنىڭ بەلسەندىسى كوشكەنباي احمەتوۆ، قالالىق قوعامدىق كەڭەستىڭ حاتشىسى، «جاس وتان» جاستار قاناتى بەلسەندىسى ادىلەت عابدوللا جانە تاعى باسقالارى بار.