سالتانات باقايەۆا: ماعان ءتوزىپ جۇرگەن جولداسىما راحمەت

استانا. قازاقپارات - سالتانات باقايەۆا بۇگىندە وتباسى مەن مانساپتى ءوزارا ۇيلەستىرە بىلگەن اكتريسا.

ول «ارناۋ» توبىندا ءان سالادى، مۇحتار اۋەزوۆ اتىنداعى قازاق ۇلتتىق دراما تەاترىندا جۇمىس ىستەيدى. مۇنىمەن قاتار، توي-تومالاقتا ونەر كورسەتىپ، دومبىرادا كۇي تارتاتىنى بار. اكتريسا Stan.kz تىلشىسىنە بەرگەن سۇحباتىندا سوڭعى جاڭالىقتارىمەن ءبولىسىپ، ءوزىن الداعان الاياق بويجەتكەننىڭ ارەكەتى تۋرالى ايتىپ بەردى.

ون ايلىق بالاسىمەن ۇيدە وتىرىپ قالعان سالتانات ونەردەن ءسال الىستاپ قالعانىن جاسىرمايدى. ول ءتىپتى وزىنە جاڭا ۇسىنىس تۇسكەن كەزدە قالاي بولار ەكەن دەپ كوپ ويلانعان. ناتيجەسىندە نار تاۋەكەلگە بەل بۋىپ، «ايمان-شولپان» تەلەحيكاياسىندا باستى ءرولدى سومداۋعا كەلىسكەن.

- سالتانات، ءدال قازىر ءسىز «ايمان-شولپان» تەلەحيكاياسىندا ەكى بىردەي باستى ءرولدى سومداپ جاتىرسىز. رەجيسسەرلەر ءسىزدىڭ جۇمىسىڭىزعا دەگەن ەرەكشە قۇشتارلىعىڭىزدى ايتۋدا. ال وزىڭىزگە بۇل وبرازدار قانشالىقتى جاقىن؟ ولار ءبىر-بىرىنە ۇقساپ كەتپەي مە؟

- راسىمەن دە، ۇقساپ كەتپەسىن دەگەن نيەتپەن ءجىتى باقىلايمىن. رەجيسسەرلەرگە «ايماننىڭ مىناداي ادەتتەرى بار ەدى. ولار شولپانعا ءوتىپ كەتپەسىن» دەپ ايتىپ وتىرامىن. مۇنىمەن قاتار، مونتاج جاساعان كەزدە رەجيسسەرلەر ماعان حابارلاسىپ «سالتانات، سەن مىناداي ءىس-قيمىلداردى ارتىعىمەن جاساپ جىبەرگەن ەكەنسىڭ. ولاردى ازايت» دەپ ايتادى.

ياعني ولاردىڭ دارا وبرازدار بولىپ قالۋلارىنا ءتۇسىرىلىم كومانداسى تولىعىمەن اتسالىسىپ جاتىر. اللا بۇيىرتسا، جاقسى جۇمىس شىعادى دەگەن نيەتتەمىن. سەبەبى، مۇنداي اۋقىمدى جوباعا ءوزىم ءبىرىنشى رەت قاتىسىپ جاتىرمىن. شىن مانىندە، 100 ءبولىم دەگەن وڭاي دۇنيە ەمەس. بار ماسەلە - كورەرمەندى ۇستاي الۋدا. مەنىڭ ويىمشا، ءبىزدىڭ سەناري وتە قىزىقتى. ول شىتىرمان وقيعالارعا تولى. ۋاقىتىم كوپ بولا بەرمەيتىندىكتەن، ءالى تولىقتاي تانىسىپ ۇلگەرمەدىم.

- ال ايمان مەن شولپاننىڭ قايسىسى ءسىزدىڭ بولمىسىڭىزعا جاقىنىراق؟

- ايمانعا قاراعاندا، شولپان جاقىنىراق. ونى ومىردە قانداي ادام بولسام، ءدال سولاي سومداۋعا تىرىسامىن. ال ايمان شەتەلدە وسكەن، مىنەزدى، تاكاپپار قىز. ونى وزىمە كوپ ۇقساتا بەرمەيمىن.

- سالتانات، ءسىز بۇگىندە اسىل جار، اياۋلى انا، يبالى كەلىن، كاسىبي اكتريساسىز. تارازىنىڭ ەكى باسىن تەڭ ۇستاۋ قولىڭىزدان قالاي كەلىپ ءجۇر؟ مۇنىڭ بارلىعىنا شابىتتى قايدان الاسىز؟

- جۇمىستان شابىت الامىن با دەپ ويلايمىن. (كۇلدى.) ءتۇسىرىلىم اراسىندا ۇيگە بارىپ بالامدى ەمىزىپ كەلەمىن. وسىنىڭ بارلىعىنا شىداپ جۇرگەن جولداسىما ريزاشىلىعىم شەكسىز. كەز كەلگەن وتاعاسى ايەلىنىڭ ۇيدە وتىرىپ، بالا-شاعاسىنا قاراپ وتىرعانىن قالايدى. نۇرجان تەك ءوزىن عانا ويلاماي، ماعان «سەن قالاعانىڭشا جۇمىسىڭدى ىستەي بەر»، «سەنى حالىق كورۋى كەرەك» دەپ جاعدايىما تۇسىنىستىكپەن قارايدى.

مەنىڭ وسىلاي شارشاماي جۇرگەنىم وتباسىمنىڭ ارقاسىندا عوي. مۇنىمەن قاتار، قازاقتا «قىزدىڭ قىرىق جانى بار» دەگەن اتالى ءسوز بار عوي. مەنىڭشە، ادام بالاسىنىڭ مۇمكىنشىلىكتەرى شەكسىز. كەيدە بارلىعىنا ءوزىمىز كەدەرگى كەلتىرىپ جاتامىز. وسىنداي ساتتەردە باسقا امالىم جوق. سوندىقتان ۇلگەرۋگە مىندەتتىمىن دەپ ويلايمىن.

- مۇحتار اۋەزوۆ تەاترىندا «تاڭسۇلۋ» قويىلىمىندا باستى ءرولدى سومدادىڭىز. سول رولىڭىزدە دومبىرامەن جاندى داۋىستا ءان سالىپ، جۇرتتى تاڭ قالدىرعانىڭىز بار. ءسىزدىڭ ءبىز بىلمەيتىن تاعى قانداي قىرلارىڭىز بار؟

- قازىر قولىما دومبىرا الىپ كۇي تارتسام، جۇرتتىڭ قايران قالاتىنى راس. ءبىراق مەن 12 جىل كۇلاش بايسەيىتوۆا مەكتەبىندە دومبىراشىلار سىنىبىندا وقىعانمىن. قازىر باسقا ىستەرمەن كوبىرەك اينالىسىپ، قولىم دومبىراعا جۇرمەيدى.

دەگەنمەن، بۇل كۇي تارتاتىن ونەرىمدى كوپشىلىك بىلە بەرمەيدى. قۇربىلارىم كونسەرتكە مىندەتتى تۇردە كۇي تارتىپ شىقشى دەپ ءوتىنىش بىلدىرەدى. مۇنىمەن قاتار، دومبىرامەن ءان سالعانىمدى انام دا ارماندايدى. بولاشاقتا حالىقتى ساحنادا دومبىرامەن ءان سالىپ قۋانتۋىم مۇمكىن.

- ءبىراز ۋاقىت بۇرىن جەلىدە ءوزىڭىزدىڭ الاياق قىزعا الدانعانىڭىز تۋرالى جازدىڭىز. ءبىراق قالاي الدانعانىڭىزدى جانە ءىستىڭ نەمەن اياقتالعانىن ايتپادىڭىز.

- ءيا، بۇل راس. اسەم ەگەمبەرديەۆا ەسىمدى قىز مەنىڭ باعالى تاستارىم مەن التىندارىمدى ۇرلادى. ارتىنشا ونىڭ بارلىعىن ءارتۇرلى لومباردقا وتكىزىپ جىبەرگەن. ءبىرى سارى اعاشتا، ەكىنشىسى باسقا جاقتاردا جاتىر ەكەن. اعامنىڭ كومەگىمەن ونى از ۋاقىت ىشىندە ۇستادىق. ۇرىلارعا قاتىستى ارنايى ليميت بولادى ەكەن. ياعني جازا سول ليميتكە بايلانىستى تاعايىندالادى.

الگى قىز مۇنى جاقسى بىلگەن. دەسە دە، ول مەنىڭ التىندارىم قۇنسىز دەپ ويلاسا كەرەك. ولاردى تولىقتاي ۇرلاعان. قازىر اسەم تۇرمەدە وتىر. ول وزىنە قانداي ۇكىم شىعاتىنىن ەكى اي بويى كۇتەتىن بولادى. ارينە، ونى كەشىرگىم-اق كەلگەن. ءبىراق ول تىم كوپ نارسە ۇرلاعان. بۇيىرتسا، باعالى بۇيىمدارىمدى ءبىر اي ىشىندە قايتارىپ الامىن دەگەن ويدامىن. ودان باسقالاردىڭ دا ساقتانىپ جۇرگەنىن قالايمىن.

- جەلىدە ءسىزدىڭ شاشىڭىزدىڭ سۇلۋلىعىنا تامساناتىندار كوپ. مۇنى ءوزىڭىز دە بىلەتىن شىعارسىز. وعان قالاي كۇتىم جاسايسىز؟

-  راسىمەن دە، كوبىسى شاش سۇلۋلىعىنا قاتىستى قۇپياممەن ءبولىسۋدى سۇراپ جاتادى. ءبىراق ارنايى ماسكا جاساپ نەمەسە دارۋمەندىك ينەلەر سالدىرمايمىن. ءتىپتى كوپ ۋاقىت بولمەيمىن دەسەم دە بولادى. اپتاسىنا ەكى رەت قانا جۋامىن. بارلىعى تۇقىم قۋالاۋشىلىقتىڭ اسەرى بولار. دەسە دە، بوسانعان كەزدە بىردەن قاتتى ءوسىپ، قاتتى تۇسە باستايدى.

- سالتانات، سىزگە كوپ راحمەت! الداعى ۋاقىتتا شىعارماشىلىق تابىس تىلەيمىز!

- سىزدەرگە دە راحمەت! ءالى دە قىزىقتى جاڭالىقتارىممەن قۋانتاتىن بولامىن.