18:56, 07 - ماۋسىم 2016 | GMT +5
مۇحتار قۇل-مۇحاممەد اقتوبە وبلىسىنىڭ يمامدارىمەن كەزدەستى
استانا. قازاقپارات - بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى جۇمىس ساپارىمەن اقتوبە وبلىسىنا كەلدى، دەپ حابارلايدى ساياسي ۇيىمنىڭ باسپا ءسوز قىزمەتى.
ساپار بارىسىندا مۇحتار قۇل-مۇحاممەد پارتيانىڭ وبلىستىق فيليالى ۇجىمىمەن جۇزدەستى. سونىمەن قاتار، ساپار اياسىندا ءوڭىر يمامدارىمەن كەزدەسۋ بولىپ ءوتتى.
«نۇر عاسىر» مەشىتىندەگى ءوڭىردىڭ ءدىني جەتەكشىلەرىمەن كەزدەسۋ بارىسىندا پارتيا ءتوراعاسىنىڭ ءبىرىنشى ورىنباسارى جازىقسىز جانداردىڭ قۇربان بولۋىنا اكەلىپ سوققان تەررورشىلاردىڭ ارەكەتىن قاتاڭ ايىپتادى.
«كىسى ولتىرگەن ادامداردى ەشتەڭەمەن اقتاۋعا بولمايدى. كەز كەلگەن پەندەگە عۇمىر سىيلايتىن دا، ۋاقىتى كەلگەندە ونى الاتىن دا ءبىر اللانىڭ ءوزى. ەندەشە كىسى ولتىرگەن جاۋىزدى قۇدايعا قارسى شىققان قىلمىسكەر دەۋىمىز كەرەك. ولاردى مۇسىلمان، ءتىپتى ادام دەپ ايتۋعا دا بولمايدى»، - دەدى مۇحتار قۇل-مۇحاممەد.
ايتا كەتەيىك، اتالعان شاراعا وبلىستىڭ بارلىق اۋداندارىنان كەلگەن 50 دەن استام يمام قاتىستى.
