قازاقستاندا قارۋ ساتاتىن دۇكەندەر جابىلۋى مۇمكىن

اقتوبە. قازاقپارات - اقتوبەدە ورىن العان وقيعادان كەيىن قازاقستاندا قارۋ دۇكەندەرى جابىلۋى مۇمكىن.

بۇل تۋرالى «نۇر وتان» پارتياسىنىڭ ءبىرىنشى ورىنباسارى مۇحتار قۇل-مۇحاممەد لاڭكەستىكتەن قازا تاپقان زەينەتكەر نيكولاي ونيشەنكونىڭ وتباسىنا كەلگەن كەزدە ايتتى.

زەينەتكەر «پاللادا» دۇكەنىنىڭ جانىنان ءوتىپ بارا جاتىپ، كەزدەيسوق كوز جۇمدى.

ونيشەنكونىڭ جانۇياسى كەزىندە ۇيلەرىنىڭ جانىنا قارۋ دۇكەنىن سالۋعا كەلىسپەي، شاعىمدانعانىن ايتتى.

- قازىر قارۋ دۇكەنىنە قاتىستى زاڭناما بويىنشا اۋقىمدى ماسەلەلەر پاكەتىن قاراپ جاتىرمىز. ونداي دۇكەندەرگە ءبىر قالادا عانا ەمەس، ەل بويىنشا تىيىم سالۋ قاجەت، - دەپ اتاپ ءوتتى ول.

اۆتور: قانات مامەتقازى ۇلى