قۇل- مۇحاممەد اقتوبەدەگى تەراكتىگە بيلىك پەن قۇقىق قورعاۋشىلاردى كىنالادى
اقتوبەگە شۇعىل ىسساپارمەن كەلگەن «نۇر وتان» پارتياسىنىڭ ءبىرىنشى ورىنباسارى يمامدارمەن كەزدەسۋىندە ەلباسىنىڭ بارلىق پارىزدى ورىنداعان ناعىز مۇسىلمان ەكەنىن اتادى.
بۇل تۋرالى ايماقتاعى NUR. KZ ءتىلشىسى حابارلايدى.
«پرەزيدەنتىمىز مۇسىلماندىق پارىزىن تۇگەلىمەن ورىنداعان ادام. مەككەگە دە، مەدينەگە دە بارعان. ءال حارامنىڭ قاقپاسىن جىلىنا ءبىر رەت اشقىزىپ كىرىپ، مۇسىلماندىق پارىزىن ورىنداعان كىسى. قۇراندى دا بىلەدى. ءوز اتا- باباسىنىڭ باسىنا بارعان كەزدە يمامنىڭ ايتقانىنا جۇگىنىپ وتىرماي، سوڭىندا ءوزى قالىپ فاتيحانى دا، ىقىلاستى دا، ءياشيندى دە وقىعانىن مەن ءوز كوزىممەن كوردىم»، - دەدى مۇحتار قۇل- مۇحاممەد.
ەلباسىنىڭ اتىنان ەلدەگى جاعدايدى باقىلاپ، قازا بولعاندارعا كوڭىل ايتۋعا كەلگەن مۇحتار ابرار ۇلى ازالى ۇيدەن ەڭسەسى ەزىلىپ شىققانىن ايتىپ بەردى.
«قاسىرەتتى وقيعالاردىڭ ورىن الۋى ءبىزدىڭ ساي- سۇيەگىمىزدى سىرقىراتىپ وتىر. قانشاما بالا جەتىم قالدى. جاڭا عانا كۇيەۋىنەن ايرىلىپ، اڭىراپ جىلاپ وتىرعان ايەلدى كورگەن كەزدە بەردەكەڭ ەكەۋمىز كىرەرگە جەر تاپپادىق. ءدال ءوزىمىزدىڭ باۋىرىمىز سولاردى ءولتىرىپ كەتكەندەي قايتا- قايتا كەشىرىم سۇراپ، جۇباتۋ ءسوزىن ايتتىق. ون جاسار بالاسى اكەسىن ىزدەپ جىلاعان كەزدە ساي- سۇيەگىمىز سىرقىرادى. شىنىن ايتۋ كەرەك، قارا جەردىڭ استى بولسا، سوعان كىرىپ كەتە جازدادىق»، - دەدى مۇحتار قۇل- مۇحاممەد.
ەلدەگى تولقۋدى دەر كەزىندە زەرتتەي الماعان قۇقىق قورعاۋ قىزمەتكەرلەرىنىڭ دە كىناسى بارىن ايتتى.
«قاسيەتتى رامازان كۇنىندە قاسىرەتتى وقيعاعا جينالىپ وتىرۋىمىزدىڭ ءوزى ءبىزدىڭ جۇمىسىمىزدان كەتكەن قاتە كەمشىلىكتەردەن دەپ بىلەمىن. ادامدى كىنالاۋ وڭاي. ال ەندى وسىعان كىم كىنالى دەيتىن بولساق، قانىشەرلەردىڭ ارەكەتىن دەر كەزىندە زەرتتەي الماعان، بولجاي الماعان، اۋىزدىقتاي الماعان قۇقىق قورعاۋ ورىندارىنىڭ دا كىناسى بار شىعار. تاربيەمىز جەتپەگەن، ايتار ءسوزىمىز وتپەگەن، دايەگىمىز جەتپەگەن بولۋى دا مۇمكىن»، - دەدى ول.
«مەن بولىپ جاتقان وقيعاعا سىزدەر مەن بىزدەر كىنالى دەگەندە تىكەلەي ماعىناسىندا تۇسىنبەڭىزدەر، ونىڭ ىشىندە مەن دە كىنالىمىن. وبلىستىڭ اكىمى دە كىنالى دەگەن ءسوز، جەرگىلىكتى جەردە ءسوزى وتپەگەن بيلىك تە كىنالى. سەبەبى. بىرەۋدى كىنالى دەپ كورسەتە سالۋ وڭاي. كىنانى ادام وزىنەن ىزدەۋ كەرەك»، - دەيدى بيلىك پارتياسىنىڭ وكىلى.
«نۇر وتان» پارتياسىنىڭ ءبىرىنشى ورىنباسارى اكەسىن ىزدەپ جىلاعان بالانىڭ كورىنىسى كوز الدىنان كەتپەي وتىرعانىن يمامدارمەن كەزدەسۋ سوڭىندا قايتارا ايتتى.
«مەن سونداي جولعا تۇسكەن ادامداردىڭ بىرازىمەن سويلەستىم. قازاقشا ايتقان كەزدە، ءالىپتى تاياق دەپ بىلمەيتىن ادامدار. شالا ساۋاتتى ءدىندارلاردان ءبىلىم العانداردى كىم جەڭەدى؟ ءبىلىمى، اقىلى اسقان ادام جەڭەدى. تەرىس جولعا ءتۇسىپ كەتكەن ادامداردىڭ بارلىعىن تاربيەلەۋگە بولادى. تاربيەگە كونبەيتىن ادام بولمايدى، تاربيەلەي المايتىن ادام بولۋى مۇمكىن. باۋىرلارىم، مەن كىشكەنە اشىنىڭقىراپ ايتىپ وتىرعان شىعارمىن. قازاسى بار ۇيدەن شىققان كەزدە جەردىڭ ۇستىمەن بارىپ، استىمەن شىقتىق. ءالى كۇنگە دەيىن بالانىڭ جىلاعانى كوز الدىما كەلگەندە جانىمدى قويارعا جەر تابا الماي وتىرمىن»، - دەدى مۇحتار قۇل- مۇحاممەد.
