ونەربايەۆتىڭ ۇلدارى اكەسىنىڭ جولىن قۋماقشى
بەلگىلى ءانشى كىشى ۇلىنىڭ بولاشاقتا كاسىبي مۋزىكا مامانى بولاتىنىن ايتادى. بۇل تۋرالى baistars.kz پورتالى حابارلايدى.
حالىققا كەڭىنەن تارالعان «قاراعىم- اي»، «اناشىم»، «باۋىردى ساعىنۋ»، «اۋىلىم» سياقتى اندەردىڭ ورىنداۋشىسى قازىرگى تاڭدا رەسپۋبليكانىڭ بارلىق ايماقتارىن ارالاپ، جەر-جەردەگى ءوزىنىڭ تىڭدارماندارىمەن جۇزدەسىپ ءجۇر. بيىل ۇلكەن ساحنادا جۇرگەنىنە 37 جىل تولعان ونەر يەسىنىڭ بۇل ءان ساپارىنىڭ باستى ەرەكشەلىگى - وعان بالالارىنىڭ قاتىسۋى بولىپ وتىر. وڭىرلەردەگى كونسەرتتەردە ونەربايەۆتىڭ ۇلكەن ۇلى ماقسات ءان ايتسا، ال كەنجەسى مارعۇلان كۇيساندىقتا وينايدى.
- ءيا، ۇلدارىم ماقسات پەن مارعۇلاندى مەن وزىممەن بىرگە تەگىننەن- تەگىن ەرتىپ جۇرگەنىم جوق. ۇلكەن ۇلىمنىڭ كىشكەنتايىنان كورگەنى - كونسەرت، قايدا بارسام دا سوڭىمنان قالمايتىن. ءبىر تۇسىنگەنىم، ونەرگە ەس-ءتۇسسىز عاشىق ادام ودان ءبارىبىر الىستاي المايدى ەكەن. ءسويتىپ، قازىر ۇلكەن ازامات بولسا دا، انگە دەگەن اۋەستىگىنىڭ باسىلماعانىن بايقاپ، وزىممەن بىرگە ەرتىپ ءجۇرمىن. ال مارعۇلانىم - استاناداعى ونەر ۋنيۆەرسيتەتىنىڭ 3-كۋرس ستۋدەنتى، بولاشاقتا مۋزىكانىڭ كانىگى مامانى بولعالى تۇر. كۇيساندىقتا جاقسى وينايدى. قازاقتىڭ اياۋلى قىزى عازيزا جۇبانوۆانىڭ پەرزەنتى - دينا مامبەتوۆانىڭ شاكىرتى، - دەيدى ن. ونەربايەۆ.
ەل تاۋەلسىزدىگىنىڭ 25 جىلدىعى مەن ءوزىنىڭ 55 جىلدىعىنا وراي كورەرمەندەرىنە ەسەپ بەرىپ جۇرگەن ءانشى قازىرگى تاڭدا ەش جەردە جۇمىس ىستەمەيتىنىن، مەملەكەتتىك قىزمەتتەن قول ۇزگەنىن تىلگە تيەك ەتتى. «باسقاسىن ايتپاعاندا، مەن ءبىر جىلدارى راديودا دا، تەلەارنادا دا، ءتىپتى مۋزىكا مەكتەبىندە دە قىزمەت ەتتىم. ول جەرلەردە قاراپايىم ديكتورلىقتان باستاپ، اكتەر دە، ديرەكتور دا بولدىم. تەك قانا جەكە انشىلىكپەن اينالىسقانىم دا بار. ءبىر سوزبەن ايتقاندا، مەن - شىعارماشىلىق ادامىمىن. سول سەبەپتى، ونەرىمدى بارىنەن دە جوعارى قويامىن. قازىردە تەك وسىنىڭ جولىندا عانا نەلىكتەن جۇرگەنىم الگىندەي سوزدەرىمنەن كەيىن تۇسىنىكتى بولار» دەپ سىر بولىسەدى ول.
كۇزگە سالىم الماتىداعى رەسپۋبليكا سارايىندا ۇلكەن ەسەپ بەرۋ كەشىن وتكىزگەلى وتىرعان نۇرلان ونەربايەۆ شىعارماشىلىققا شىنداپ كىرىسكەنىن ايتىپ، جاڭا اندەردى جازدىرتىپ جاتقانىن جانە قوستى.
