تەمىرتاۋ تۇرعىنى اۆتوكولىك جۋاتىن سۋسابىن ويلاپ تاپتى
ونىڭ ءارى ارزان، ءارى ساپالى دۇنيەسى دۇكەن سورەلەرىندەگى شەتەلدىك جۋعىش قۇرالداردى ەداۋىر كەيىنگە ىعىستىرعان.
«سۋسابىندى جاساۋدىڭ تەحنولوگيالىق ۇدەرىسى اسا قيىن ەمەس، - دەيدى كاسىپكەردىڭ ءوزى. - ارنايى قۇرامدى بەلگىلى ءبىر تەمپەراتۋرادا ارالاستىرىپ، تەك سونىڭ رەت- رەتىمەن قوسىلۋىن قاداعالاپ وتىرۋ كەرەك».
«حيم- گرۋپپ قازاقستان» ج ش س- نەن العاشقى سۋسابىندار «بونا» ساۋدا ماركاسىمەن جاقىندا عانا شىعارىلدى، دەپ جازادى «ەگەمەن قازاقستان» گازەتى.
«مەن اۆتوسۋسابىننىڭ 17 ءتۇرىن جانە پوليرول، بالاۋىز، اينەك تازالاعىش، موتور تازالاۋ، ديسكى تازالاۋ قۇرالدارى، تەرەك بۇتاقتارىنان، جاندىكتەردەن قورعايتىن قۇرالدار سياقتى جاناما زاتتار شىعارامىن»، - دەيدى دميتري.
بارلىق ونىمدەردى تەحنيكالىق نۇسقاۋلىقتار مەن ءتيىستى تارتىپتەرىنە سايكەس وندىرەدى. نەگىزىنەن جەرگىلىكتى شيكىزاتتاردى پايدالانىپ، وتاندىق حيميا وندىرىسىندە جوق كەيبىر قۇرامدارعا عانا شەتەلدىك كومپانيالارعا تاپسىرىس بەرىپ الدىرادى ەكەن.
سەحتىڭ ءوندىرىس قۋاتى ايىنا 40 توننا ءونىم شىعارۋعا جەتەدى. العاشقىدا جارتى توننا عانا ءونىم شىعارىلعان ەدى. قازىردىڭ وزىندە ساتىپ الۋشى ۇيىمدارمەن كەلىسىمشارت جاسالىپ، ءبىرقاتار تۇراقتى تۇتىنۋشىلار پايدا بولدى. اۆتوسۋسابىن كولىك كىرىن بار- جوعى ەكى مينۋتتا جوق قىلادى دەسەدى. بۇدان سوڭ، ارينە، تەمىرتاۋلىق كولىك جۋۋشىلار جاپپاي جەرگىلىكتى ءونىمدى پايدالانۋعا كوشكەن. «بىزگە وسى سۋسابىنداردىڭ ساپاسى ۇنايدى. بۇرىن پايدالانىپ كەلگەندەرىمىزدەن الدەقايدا جاقسى. كولىگىن جۋدىرعاندار دا ماقتاپ كەتەدى. ونىڭ ۇستىنە، وتاندىق ءوندىرۋشىنى قولداعانىمىز دۇرىس قوي»، - دەيدى كولىك جۋۋ ورنىنىڭ قىزمەتكەرى ەلەنا ماريانكو.
تەمىرتاۋلىق كاسىپكەر كۇزگە جاقىن جاڭادان بەس جۇمىس ورنىن اشۋدى جوسپارلاپ وتىر. كۇزدە كولىك اينەگىن قىراۋدان قورعايتىن قۇرال شىعارماقشى.
ءوندىرىس كولەمىن ارتتىرۋ ءۇشىن دميتري تاعى دا مەملەكەتتىك باعدارلاماعا ارقا سۇيەمەك.
