ءبىز ەلىمىزدەگى تۇراقتىلىقتى بارىنشا باعالاي ءبىلۋىمىز كەرەك - ق ك ح پ

استانا. قازاقپارات - قازاقستان كوممۋنيستىك حالىق پارتياسى وتكەن جەكسەنبى كۇنى اقتوبەدە تەرىس اعىمداعى ءدىن ۇستانۋشىلار جاساعان تەرراكتىنى سىنعا الدى.

بۇل پارتيانىڭ قوعامعا جولداعان ۇندەۋىندە كورسەتىلدى.

«شابۋىل كەزىندە ەلىمىزدىڭ جازىقسىز ازاماتتارى مەن قۇقىققورعاۋ ورگاندارىنىڭ قىزمەتكەرلەرى قازا تاپتى، زارداپ شەككەندەرى دە بار»، دەلىنگەن پارتيانىڭ مالىمدەمەسىندە.

«بۇل - مۇسىلمانداردىڭ قاسيەتتى رامازان ايىنداعى جاسالعان ارسىز قىلمىس. كىنالىلەر قاتاڭ جازالاناتىنىنا سەنىمدىمىز»، دەپ اتاپ وتكەن ق ك ح پ وكىلدەرى. «اقتوبەدە بولعان وقيعا ءبىز قوعام بولىپ وسى زاۋالدىڭ تارالۋىنا قارسى تۇرۋىمىز كەرەكتىگىن كورسەتتى.

ءبىز ەلىمىزدەگى تۇراقتىلىقتى بارىنشا باعالاي ءبىلۋىمىز كەرەك، كۇش قوسا وتىرىپ ورتاق ۇيىمىزدەگى بەيبىتشىلىك پەن تىنىشتىقتى ساقتاۋىمىز كەرەك»، دەپ ءمالىم ەتىلگەن ۇندەۋدە.

ەسكە سالا كەتسەك، اقتوبە قالاسىندا 5 -ماۋسىمدا ساعات 14.28 دە تەرىس اعىمداعى ءدىن ۇستانۋشىلار قارۋ- جاراق يەمدەنۋ ماقساتىمەن «پاللادا» دۇكەنىنە شابۋىل جاساعان. ولار قولىنان دۇكەن ساتۋشىسى قازا تاپقان. وقيعا ورنىنا ءبىرىنشى جەكە كۇزەت ۇيىمىنىڭ 2 قىزمەتكەرى جەتىپ، ونىڭ ءبىرى وققا ۇشقان، ەكىنشىسى جاراقات العان. بۇدان كەيىن پوليتسيا قىزمەتكەرلەرى كەلىپ، قىلمىسكەرلەر ولارعا قارۋلى قارسىلىق تانىتقان. اتىس بارىسىندا 3 پوليتسيا قىزمەتكەرى جارالانىپ، قىلمىسكەرلەر پاترۋلدىك ماشينامەن بوي تاسالاعان. ولار دۇكەننەن قارۋ الىپ كەتكەن.

بۇدان كەيىن قارۋلى قىلمىسكەرلەر ەكى توپقا بولىنگەن. 6 قىلمىسكەردەن جاساقتالعان ءبىرىنشى توپ «پانتەرا» قارۋ- جاراق دۇكەنىنە شابۋىلداپ، وندا ءبىر ادامدى پىشاقتاپ ولتىرسە، ەكىنشىسىن جاراقاتتاعان. وقيعا ورنىنا جەتكەن پوليتسيا قىزمەتكەرلەرى 3 قىلمىسكەردى اتىپ ولتىرسە، بىرەۋى جاراقاتتانعان. بوي تاسالاعان ەكەۋى قالا سىرتىنان تابىلىپ، كوزدەرى جويىلدى.

ەكىنشى توپ اۆتوبۋستى باسىپ الىپ، وندا جولاۋشىلاردى ءتۇسىرىپ جىبەرگەن. وسىدان كەيىن ۇلتتىق گۆارديانىڭ 6655 اسكەري ءبولىمى اۋماعىنا كىرە بەرىس قاقپانى اۆتوبۋسپەن بۇزىپ كىرگەن جانە اسكەري قىزمەتشىلەرمەن، وقيعا ورنىنا جەتكەن پوليتسيامەن اتىسقان.

قارۋلى قارسىلىققا تاپ بولعان قىلمىسكەرلەردىڭ ءبىر توبى توسقاۋىلعا ءتۇسىپ قالسا، ەكىنشى توبى قاشىپ كەتكەن. اتىس بارىسىندا 1 قىلمىسكەر ءولىپ، تاعى ءبىرى جاراقاتتانعان. ال ۇلتتىق گۆارديانىڭ 3 اسكەري قىزمەتشىسى قازا تاۋىپ، 6 اۋى جارالانعان.

ءتۇن ىشىندە جۇرگىزىلگەن جەدەل ىزدەۋ شاراسى كەزىندە پوليتسيا قىزمەتكەرلەرىنە قارۋلى قارسىلىق كورسەتكەن تاعى 5 قىلمىسكەر وققا ۇشىپ، 2 ەۋى ۇستالدى.