الماتىدا ءورت ءسوندىرۋشى ءوزىن- ءوزى ولتىرمەك بولعان ادامدى قۇتقارىپ قالدى

الماتى. قازاقپارات - الماتىدا ءورت ءسوندىرۋشى قىزمەتكەر ءوزىن-ءوزى ولتىرمەك بولعان ەر ازاماتتى قۇتقارىپ قالدى.

بۇل تۋرالى بۇگىن الماتى قالالىق ت ج د رەسمي وكىلى ساندۋعاش بايماۇحانبەتوۆا حابارلادى.

«تاياۋ كۇنى الماتى قالالىق ت ج د باستىعىنىڭ اتىنا «ۆەرسال» تۇرعىن ءۇي كەشەنى اكىمشىلىگىنەن العىس حات كەلىپ ءتۇستى. وندا حات اۆتورى وسى تۇرعىن ءۇي كەشەنىنىڭ رەسەپشن- وپەراتورى مامانداندىرىلعان №8- ءورت ءسوندىرۋ ءبولىمىنىڭ ءورت ءسوندىرۋشى قىزمەتكەرلەرىنىڭ ءوزىن-ءوزى ولتىرمەك بولعان ادامدى قۇتقارىپ قالعاندارى ءۇشىن ولارعا ءوز اتىنان جانە تۇرعىن ءۇي كەشەنى اكىمشىلىگى اتىنان ريزاشىلىعىن بىلدىرگەن»، - دەدى س. بايمۇحانبەتوۆا.

حات اۆتورىنىڭ ايتۋىنشا، تۇرعىن ءۇي كەشەنىندەگى ءبىر تۇرعىن 4- قاباتتىڭ بالكونىنان سەكىرىپ، ءوزىن-ءوزى ولتىرمەك بولعان. سول سەبەپتەن تۇرعىن ءۇي كەشەنىنىڭ قىزمەتكەرلەرى شۇعىل الماتى قالالىق ت ج د «101» كەزەكشى بولىمىنە حابارلاسىپ، كومەك سۇراعان.

«ەڭ باستىسى، جاس جىگىت امان قالدى. سول ءۇشىن ونى قۇتقارىپ قالعان ازاماتتارعا شىن جۇرەكتەن العىسىمىزدى بىلدىرەمىز»، - دەلىنگەن حاتتا.

ايتا كەتەلىك، 29 -مامىردا 13 ساعات 4 مينۋتتا «101» كەزەكشى بولىمىنە الماتى قالاسىنىڭ مەدەۋ اۋدانى، شيەۆچەنكو كوشەسى 7 مەكەنجايىندا ءبىر ادامنىڭ ءوزى- ءوزى ولتىرۋگە ارەكەت جاساپ جاتقانى تۋرالى حابار كەلىپ تۇسكەن. بەس مينۋتتان كەيىن وقيعا ورنىنا ءورت سوندىرۋشىلەر مىنگەن اۆتوساتى كەلىپ جەتتى.

«وقيعا ورنىندا ءورت سوندىرۋشىلەر ەر ازاماتتىڭ بالكون جاقتاۋىنان اسىپ، سەكىرمەككە ۇمتىلىپ جاتقانىن كورەدى. مامانداندىرىلعان №8- ءورت ءسوندىرۋ ءبولىمىنىڭ اعا ينجەنەرى، ازاماتتىق قورعانىس لەيتەنانتى نۇربول وتەگەنوۆ سول ارادا ءورت ءسوندىرۋ ساتىسىمەن جىلدام كوتەرىلىپ، ءوزىن- ءوزى ءولتىرۋشى ءبىر قولىن جىبەرىپ، كوشە جاققا بۇرىلىپ ەندى سەكىرەيىن دەپ جاتقان ساتتە ونى قولىنان ۇستاپ ۇلگەرىپ، كوتەرىپ بالكوننىڭ ىشىنە قاراي يتەرىپ جىبەرەدى. كەيىن، ونى مىقتاپ ۇستاعان كۇيى پاتەردىڭ ىشكى ەسىگىن اشىپ، باسقا دا ءوزارا ارەكەتتەستىك كۇشى قىزمەتكەرلەرىن ىشكە جىبەرەدى»، - دەدى س. بايمۇحانبەتوۆا.

اۆتور: ايبوتا جاپپاربەرگەن