قارجى مينيسترلىگى جالعان كاسىپكەرلىكتىڭ الدىن الۋعا باعىتتالعان كارتا ازىرلەۋدە

استانا. قازاقپارات - قارجى مينيسترلىگى جالعان كاسىپكەرلىكتىڭ الدىن الۋعا باعىتتالعان كارتا ازىرلەمەك.

بۇل تۋرالى بۇگىن ءماجىلىستىڭ قارجى جانە بيۋدجەت كوميتەتىنىڭ كەڭەيتىلگەن وتىرىسىندا قارجى ۆيتسە-ءمينيسترى رۋسلان دالەنوۆ ءمالىم ەتتى.

«بىزدە باسقانىڭ ەمەس، جالعان كاسىپكەرلىكتىڭ ناتيجەسى كەرەمەت. سالىقتىق تەكسەرىستەر بويىنشا بىزدە 2015 -جىلى اۋدارىلماعان تولەمدەر - 54,5 ميلليارد تەڭگە بولىپ وتىر. بۇل ونىڭ الدىنداعى جىلمەن سالىستىرعاندا 2 ەسەگە ارتىق. سونىڭ ىشىندە 24 ميلليارد تەڭگە ءوندىرىپ الىنسا، 2600 جالعان كاسىپكەرلىك انىقتالدى، 2 مىڭعا تارتا ق ق س تولەۋشىلەر ەسەپتەن شىعارىلدى. 3 ميلليارد تەڭگە قولما- قول اقشاعا اۋدارۋ بارىسىندا ۇستالدى، بيۋدجەتكە كەلتىرىلگەن زالال كولەمى 60 ميلليارد تەڭگەمەن وتەلدى. 3200 جالعان اقشا كۋپيۋرالارى انىقتالىپ، 32 زاڭسىز كازينو جابىلدى»، - دەدى رۋسلان دالەنوۆ.

ونىڭ ايتۋىنشا، جالعان كاسىپكەرلىك ەل ەكونوميكاسىنا ايتارلىقتاي زالال كەلتىرىپ وتىرعان قۇقىق بۇزۋشىلىق بولىپ تابىلادى. ولاردىڭ قىزمەت ناتيجەسىندە بيۋدجەتكە ميلليونداعان سالىقتىق تۇسىمدەر اۋدارىلماي قالىپ جاتىر.

«ولاردىڭ بارلىعى سالىقتان جالتارۋدى ويلايدى. دەگەنمەن، ءبىز الداعى ۋاقىتتا جالعان كاسىپكەرلىكتىڭ الدىن الۋعا باعىتتالعان كارتا ازىرلەمەكپىز. ءبىز ءۇشىن ەڭ باستى ماسەلە - تىركەۋ. بۇگىنگى كۇنى كاسىپورىندى تىركەۋ دە، ونى قايتا تىركەۋ دە، قوسىپ تاستاۋ دا جەڭىل، وڭاي. بۇل تىم نازىك ماسەلە. سوندىقتان دا، ءبىز بۇل جەردە تەڭگەرىمدىلىككە قارايمىز، وسى پروبلەماعا مۇقيات كەلەتىن بولامىز»، - دەدى ۆيتسە- مينيستر.

اۆتور: قانات مامەتقازى ۇلى