الماتى قالاسىنىڭ باس ساۋلەتشىسى قىزمەتىنەن بوساتىلدى

الماتى. قازاقپارات - الماتى قالاسىنىڭ باس ساۋلەتشىسى عابيت سادىربايەۆ قىزمەتىنەن بوساتىلدى.

بۇل تۋرالى الماتى قالاسىنىڭ اكىمى باۋىرجان بايبەك بۇگىن ءتيىستى بۇيرىققا قول قويدى. وعان عابيت سادىربايەۆتىڭ جۇمىستان بوساتۋ تۋرالى ارىزى نەگىز بولدى.

الماتى قالاسى اكىمىنىڭ باسپا ءسوز قىزمەتىنىڭ حابارلاۋىنشا، الماتى قالاسىنىڭ باس ساۋلەتشىسى قىزمەتىن اتقارۋشى بولىپ ايتىلەۋ جانات ءابدىحالىق ۇلى تاعايىندالدى. ول بۇعان دەيىن وسى باسقارماسى باسشىسىنىڭ ورىنباسارى قىزمەتىن اتقارىپ كەلدى.

ايتا كەتەلىك، عابيت سادىربايەۆ 1954 -جىلى تۋعان. ۆ. ي. لەنين اتىنداعى پوليتەحنيكا ينستيتۋتىن ءتامامداعان. ماماندىعى - ساۋلەتشى. پوليتەحنيكا عىلىمدارىنىڭ كانديداتى.

ەڭبەك جولىن 1977 -جىلى الماتى قالاسىنداعى «كازگورسترويپروەكت» جوبالاۋ ينستيتۋتىندا ساۋلەتشى بولىپ باستاعان.

2007 -جىلى وڭتۇستىك قازاقستان وبلىسى اكىمىنىڭ كەڭەسشىسى بولىپ تاعايىندالدى.

2012 -جىلدان بەرى الماتى قالاسى ساۋلەت جانە قالا قۇرىلىسى باسقارماسىنىڭ باسشىسى قىزمەتىن اتقارىپ كەلدى.

2014 -جىلى «قۇرمەت» وردەنىمەن ماراپاتتالعان. «قازاقستاننىڭ قۇرمەتتى ساۋلەتشىسى» اتاعىن يەلەنگەن.

اۆتور: ايبوتا جاپپاربەرگەن