الماتى سوتتارىندا كادرلىق اۋىس- تۇيىستەر ورىن الدى

الماتى. قازاقپارات - بۇگىن الماتى قالاسى سوتتارىندا سۋديالاردى قىزمەتكە تاعايىنداۋ جانە قىزمەتتەن بوساتۋ راسىمىنە وراي تانىستىرۋ شاراسى ءوتتى، دەپ حابارلايدى الماتى قالالىق سوتىنىڭ باسپا ءسوز قىزمەتىنەن.

سونىمەن، ليۋدميلا بەكتەمىروۆا الماتى قالاسى بوستاندىق اۋدانىنىڭ №2- اۋداندىق سوتىنىڭ سۋدياسى قىزمەتىنەن، ءبىرجان كارىبجانوۆ الماتى قالاسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنىڭ سۋدياسى قىزمەتىنەن جانە گۇلنار مەيىرجانوۆا الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ سۋدياسى قىزمەتىنەن بوساتىلا وتىرىپ، بارلىعى الماتى قالالىق سوتىنىڭ سۋديالارى بولىپ تاعايىندالدى.

سونىمەن قاتار، كادرلىق وزگەرىستەر قالانىڭ اۋداندىق سوتتارىندا دا بولدى. الماتى قالاسىنىڭ اۋەزوۆ اۋداندىق سوتىنىڭ ءتوراعاسى قىزمەتىنە قانات سىرلىبايەۆ الماتى قالاسى مەدەۋ اۋداندىق سوتىنىڭ سۋدياسى قىزمەتىنەن بوساتىلا وتىرىپ تاعايىندالدى.

ال، الماتى قالالىق سوتىنىڭ سۋديالارى راۋشان قۋاندىقوۆا مەن ءلاززات نۇرمۇحانوۆا وتستاۆكاعا شىعۋلارىنا بايلانىستى قىزمەتتەرىنەن بوساتىلدى.

الماتى قالالىق سوتىنىڭ قىلمىستىق ىستەر جونىندەگى القا ءتوراعاسى باقىتجان قارامانوۆ سالتاناتتى جاعدايدا سوت ۇجىمىنا جاڭادان تاعايىندالعان سۋديالاردى تانىستىرا وتىرىپ، ولارعا ەڭبەكتەرىنە تابىستار تىلەدى. ال وتستاۆكاعا شىققان سۋديالارعا سوت جۇيەسىنە سىڭىرگەن كوپ جىلعى ەڭبەكتەرى ءۇشىن راحمەت ايتىپ، ريزاشىلىعىن ءبىلدىردى.

قازاقستان رەسپۋبليكاسى پرەزيدەنتىنىڭ 2016 -جىلعى مامىر ايىنىڭ 31 جۇلدىزىنداعى جارلىعىنا سايكەس، سۋديالار وزدەرىنىڭ قىزمەتتىك مىندەتتەرىن اتقارۋعا كىرىستى.

اۆتور: ايبوتا جاپپاربەرگەن