اقتوبەدە قارۋلى قاراقشىلاردىڭ قولىنان مەرت بولعان اسكەري قىزمەتشىلەر قارۋسىز بولعان - ق ر ىشكى ىستەر ءمينيسترى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ىشكى ىستەر ءمينيسترى قالمۇحامبەت قاسىموۆ ءمالىم ەتتى.
وتىرىستى اشقان ق ر پرەمەر-ءمينيسترى كارىم ءماسىموۆ ەڭ الدىمەن بارشا مۇسىلمان قاۋىمىن قاسيەتتى رامازان ايىنىڭ باستالۋىمەن قۇتتىقتادى. «وكىنىشكە وراي وسى قاسيەتتى ايدا اقتوبە قالاسىندا قاندى وقيعا ورىن الدى. بىرنەشە ادام قازا تاپتى. جاراقات العاندار دا بار. بۇل وتە وكىنىشتى جاعداي»، - دەگەن ك. ءماسىموۆ ورىن العان جايتقا بايلانىستى ىشكى ىستەر ءمينيسترى قالمۇحانبەت قاسىموۆقا ءسوز بەردى.
ونىڭ ايتۋىنشا، 5 -ماۋسىم كۇنى جەرگىلىكتى ۋاقىت بويىنشا ساعات 14.28 دە تەرىس اعىمداعى ءدىن ۇستانۋشىلار قارۋ-جاراق يەمدەنۋ ماقساتىمەن «پاللادا» دۇكەنىنە شابۋىل جاساعان. دابىل كنوپكاسىن باسىپ ۇلگەرگەن دۇكەن ساتۋشىسىن قىلمىسكەرلەر پىشاقتاپ ولتىرگەن. وقيعا ورنىنا ەڭ ءبىرىنشى بولىپ «جەدەل كۇزەت» ج ش س جەكە كۇزەت ۇيىمىنىڭ 2 قىزمەتكەرى جەتىپ، ونىڭ ءبىرى بىردەن وققا ۇشىپ مەرت بولسا، ەكىنشىسى جاراقاتتانعان. وسىدان كەيىن پوليتسيا قىزمەتكەرلەرى دە كەلىپ، قىلمىسكەرلەر ولارعا قارۋلى قارسىلىق تانىتقان. اتىس بارىسىندا 3 پوليتسيا قىزمەتكەرى جارالانىپ، ال قىلمىسكەرلەر پاترۋلدىك ماشينامەن بوي تاسالاعان. ولار دۇكەننەن 17 مىلتىق، 3 گاز تاپانشاسىن، وقتار مەن پىشاقتار الىپ كەتكەن. ۇرلانعان قارۋ- جاراق پەن وق-دارىلەردىڭ سانىن ناقتىلانۋدا، دۇكەندە تۇگەندەۋ جۇرگىزىلۋدە.
«پاللادا» دۇكەنىنە شابۋىل جاساعاننان كەيىن قارۋلى قىلمىسكەرلەر ەكى توپقا بولىنگەن. 6 قىلمىسكەردەن جاساقتالعان ءبىرىنشى توپ «پانتەرا» قارۋ-جاراق دۇكەنىنە شابۋىلداپ، وندا ءبىر ادامدى پىشاقتاپ ولتىرسە، ەكىنشىسىن جاراقاتتاعان. وقيعا ورنىنا جەتكەن پوليتسيا قىزمەتكەرلەرى 3 قىلمىسكەردى اتىپ ولتىرسە، بىرەۋى جاراقاتتانعان. ال ەكەۋى بوي تاسالاپ ۇلگەرگەن. دەگەنمەن، ولار ءسال كەيىنىرەك قالا سىرتىنان تابىلىپ، كوزدەرى جويىلدى. ەكىنشى توپ اۆتوبۋستى باسىپ الىپ، وندا جولاۋشىلاردى ءتۇسىرىپ جىبەرگەن. وسىدان كەيىن ۇلتتىق گۆارديانىڭ 6655 اسكەري ءبولىمى اۋماعىنا كىرە بەرىس قاقپانى اۆتوبۋسپەن بۇزىپ كىرگەن جانە اسكەري قىزمەتشىلەرمەن، وقيعا ورنىنا جەتكەن پوليتسيامەن اتىسقان. قارۋلى قارسىلىققا تاپ بولعان قىلمىسكەرلەردىڭ ءبىر توبى توسقاۋىلعا ءتۇسىپ قالسا، ەكىنشى توبى قاشىپ كەتكەن. اتىس بارىسىندا 1 قىلمىسكەر ءولىپ، تاعى ءبىرى جاراقاتتانعان. ال ۇلتتىق گۆارديانىڭ 3 اسكەري قىزمەتشىسى قازا تاۋىپ، 6 اۋى جارالانعان. ولاردىڭ بارلىعى دا قارۋسىز بولعان، ىشكى رەجىمگە سايكەس قىزمەتتەرىن اتقارىپ جۇرگەن»، - دەدى مينيستر.
ق. قاسىموۆ قازىرگى ۋاقىتتا اقتوبە وبلىسىندا لاڭكەستىككە قارسى وپەراتسيا رەجىمى ەنگىزىلگەنىن، ەلىمىزدىڭ ىشكى ىستەر ورگاندارىنىڭ بارلىق جەكە قۇرامى كۇشەيتىلگەن قىزمەتكە كوشىرىلگەنىن اتاپ ءوتتى.
«ىشكى ىستەر مينيسترلىگى جەرگىلىكتى اتقارۋشى ورگاندارمەن بىرلەسىپ، قازا تاپقان جانە جاراقاتتانعان ۇلتتىق گۆارديانىڭ اسكەري قىزمەتشىلەرى مەن پوليتسيا قىزمەتكەرلەرىنە ماتەريالدىق كومەك كورسەتۋ شارالارىن قابىلداۋدا»، - دەدى ول.
اۆتور: مارلان جيەمباي
