اقتوبەدە قوعامدىق-ساياسي جاعداي تۇراقتى - ب. ساپاربايەۆ

استانا. قازاقپارات - اقتوبەدە قوعامدىق- ساياسي جاعداي تۇراقتى.

بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا اقتوبە وبلىسىنىڭ اكىمى بەردىبەك ساپاربايەۆ ءمالىم ەتتى.

«قازىرگى كەزدە وبلىستا قوعامدىق- ساياسي جاعداي تۇراقتى جانە جەرگىلىكتى اتقارۋشى جانە قۇقىق قورعاۋ ورگاندارىنىڭ تولىقتاي باقىلاۋىندا. قاراقشىلىق شابۋىل تۋرالى مالىمەت كەلىپ تۇسكەننەن كەيىن جەرگىلىكتى باسپا ءسوز، الەۋمەتتىك جەلىلەر ارقىلى حالىققا سابىرلىق تانىتىپ، عيماراتتان شىقپاۋ، ءجۇرىستى ازايتۋ تۋرالى مالىمەتتەر بەرىلدى»، - دەدى ول.

وبلىس اكىمىنىڭ ايتۋىنشا، وڭىرلىك جەدەل شتاب قۇرىلىپ، ىشكى ىستەر دەپارتامەنتى باستىعىنىڭ قاراۋىندا لاڭكەستىككە قارسى ورتالىق جۇمىس ىستەپ تۇر. بارلىق قۇقىق جانە ارناۋلى ورگاندار اراسىنداعى ءىس-قيمىل ۇيلەستىرىلگەن. بارلىق كوممۋنالدىق قىزمەتتەر، قوعامدىق كولىكتەر، مەديتسينالىق مەكەمەلەر شتاتتىق رەجىمدە جۇمىس ىستەۋدە.

«ۇلتتىق ءبىرىڭعاي تەستىلەۋ 7 -ماۋسىمعا اۋىستىرىلدى. تولىقتاي العاندا وبلىس حالقى لاڭكەستىككە قارسى وپەراتسيانىڭ جۇرگىزىلۋىنە تۇسىنىستىكپەن قاراۋدا. قازا تاپقان اسكەري قىزمەتشىلەردىڭ وتباسىلارىنا ماتەريالدىق كومەك كورسەتىلەتىن بولادى»، - دەدى ب. ساپاربايەۆ.

اۆتور: كەنجەكەي توقتامۇرات قىزى