كۇش قۇرىلىمدارى اقتوبەدەگى وقيعانىڭ سۇمدىق سەناريگە ءوربۋىنىڭ الدىن الدى - ە. قارين

استانا. قازاقپارات - كۇش قۇرىلىمدارى اقتوبەدەگى وقيعانىڭ سۇمدىق سەناريگە ءوربۋىنىڭ الدىن الدى.

قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين Facebook-تەگى پاراقشاسىندا وسىنداي پىكىر ءبىلدىردى.

«اقتوبەدەگى وقيعاعا قاتىستى ءار ءتۇرلى پىكىرلەر وقىپ وتىرمىن. ونىڭ اراسىندا «ارنايى قىزمەتتەر قايدا قاراعان»، «ولار قالايشا وسىعان جول بەرىپ قويدى»، ءتىپتى «وسىنى ىشكى پروبلەمالاردان نازار بۇرۋ ءۇشىن كۇش قۇرىلىمدارىنىڭ ءوزى ۇيىمداستىرىپ وتىرعان جوق پا ەكەن» دەگەنگە ساياتىن تالقىلاۋلار دا بولىپ جاتىر.

ايتسە دە، مەن كۇش قۇرىلىمدارىنىڭ اقتوبەدەگى وقيعانىڭ ودان دا سۇمدىق سەناريگە ءوربۋىنىڭ الدىن العانىنا سەنىمدىمىن. مۇنداي توپتىڭ كەنەت شابۋىلى كۇش قۇرىلىمدارىنىڭ، جالپى بيلىكتىڭ جۇمىسىن داعدارتىپ، ەلدى بۇدان دا زور دۇرلىكتىرۋى مۇمكىن ەدى، الايدا ارنايى قىزمەت وقيعانى باقىلاۋدا ۇستاپ، ولارعا تويتارىس بەردى، قاسكويلەردىڭ ويلاعاندارىن ىسكە اسىرۋعا جول بەرمەدى»، - دەپ جازادى الەۋمەتتىك جەلىدەگى پاراقشاسىندا ەرلان قارين.

ونىڭ ايتۋىنشا، قارۋ-جاراق دۇكەنىنە، اسكەري بولىمگە شابۋىل نەگىزىنەن مەيلىنشە كوپ قارۋ-جاراققا يەلىك ەتۋ ماقساتىندا جاسالعان. ياعني، قاسكويلەر بۇنى بۇعان دەيىن دە، كەشە دە جۇزەگە اسىرا المادى. «ەندى ويلاپ كورىڭىز، ولار بىردەن سونشاما قارۋ-جاراقتى باسىپ السا نە بولار ەدى؟!» - دەپ جازادى ە. قارين Facebook-تەگى پاراقشاسىندا.

بۇدان بولەك، تەرروريزم جونىندەگى ساراپشى 2015 -جىلدىڭ قاراشاسىنان بەرى ەلىمىزدەگى تۇرمەلەردى ارالاپ، وندا سيريادا سوعىسىپ، كەيىن قازاقستانعا ورالعان نەمەسە ءۇشىنشى ەلدەردە تۇتقىندالعان ازاماتتارمەن كەزدەسكەنىن اتاپ وتەدى. ونىڭ ايتۋىنشا، وسىعان ۇقساس وقيعالار بويىنشا سوتتالعانداردىڭ تاعدىرى دا، ماسەلەسى دە ءار ءتۇرلى.

«بىرەۋلەرى قازاقستانعا ناقتى ماقساتپەن، ناقتى جوسپارمەن ورالعان. سونىڭ بىرەۋى سيريادا مينا-جارۋ ءىسى بويىنشا ءۇش ايلىق كۋرستان دا وتكەن. ول ىرگەدەگى مەملەكەت ارقىلى ءوزىنىڭ تۋعان قالاسىنا ورالعان. سوندا پاتەر جالداپ تۇرادى، ساق بولعانى سونشالىقتى سيمكاسىن كۇنىنە نەشە مارتە وزگەرتىپ وتىرىپتى، قالاداعى ءدارىحانالاردىڭ ءارقايسىسىن ارالاپ ءجۇرىپ، اسىقپاستان جارىلىسقا كەرەكتى زاتتاردى ميلليگراممداپ بىرتىندەپ، تاپتىشتەپ جيناعان. اقىرى ارنايى قىزمەت ونى انىقتاپ، تۇتقىندادى.

ول ماعان ءوزى سونشالىقتى ساقتىق جاساعانىنا قاراماستان، ساۋدا ۇيىندە ۇستالعانىنا قاتتى تاڭعالعانىن ايتتى. قازىر قاتاڭ رەجيمدەگى كولونيادا مەرزىمىن وتەۋدە. مۇنداي وقيعالار كوپتەپ سانالادى. مەن بۇنى تەرروريزممەن كۇرەستىڭ ۇدايى ءارى كوبىنەسە كوزگە كورىنبەيتىن جاقتاردان دا ءجۇرىپ جاتقاندىعىن ءبىلدىرۋ ءۇشىن ايتىپ وتىرمىن.

ال ونداي كۇرەستەگى جەتىستىكتەر مەن جەڭىستەر تۋرالى جۇرتشىلىققا ايتىپ جاتۋدىڭ قاجەتى دە شامالى. ويتكەنى ەرەجە سولاي. سوندىقتان دا، مەن اقتوبەدەگى وقيعاعا بايلانىستى كۇش قۇرىلىمدارى سۇمدىق سەناريدىڭ ءوربۋىن بولدىرماي، الدىن الا ءبىلدى دەپ سەنەمىن»، - دەپ جازادى ساراپشى.

اۆتور: قانات مامەتقازى ۇلى